التعامل مع نوبات الهلع والقلق والتوتر في الشغل

ممكن تعتبر اضطراب الهلع حالة صعب التعامل والتأقلم معاها، وأحيانا بيكون التعامل مع اعراض اضطرابات الهلع حاجة صعبة جدا خاصة في الشغل، لأنك هتكون قلقان من ان زمايلك في الشغل ممكن يلاحظوا خوفك وقلقك ويعرفوا معاناتك مع النوع ده من الاضطراب، الازمة الكبيرة بقى بتكون لما يجى اضطراب الهلع مع رهاب الخلاء لأن ده بيتسب في مشكلات كتيرة في الشغل، يعنى مثلا ممكن رهاب الخلاء يخليك مش قادرتعمل تنقلاتك الضرورية للشغل وبيكون الموضوع صعب جدا، وممكن كمان القلق من أنواع معينة من المخاوف او الفوبيا يسبب نوبات من الهلع اللى بتزود الضغط خلال يوم الشغل، ممكن كمان تحس بالخجل من حالتك او تقلق من خسارة وظيفتك بسبب اضطرابات الهلع.

عشان كدة ممكن يكون التعامل مع اضطراب الهلع في مكان الشغل حاجة صعبة جدا، وفى طرق كتيره ممكن نتعلم من خلالها التعامل مع اعراض اضطراب الهلع اثناء العمل، وهنقولك دلوقتى على شوية نصايح هتريح بالك وتساعدك تحافظ على وظيفتك.

حدد الحاجات اللى بتحفز عندك نوبات الهلع أو القلق أو التوتر في الشغل

التشخيص السليم لاضطراب الهلع بيعتمد غالبا على أن الشخص يكون بيتعرض لنوبات هلع متكررة ومفاجئة وغير متوقعة، وعلى الرغم من كدة في مواقف كتير هي اللى بتحفز ظهور اعراض القلق واعراض اضطرابات الهلع المختلفة، ومعرفة محفزات القلق والخوف والفوبيا دى هي اللى هتساعدك على التعامل بشكل أفضل لو حصلت أي نوبة هلع، يعنى مثلا ممكن تكون بتقلق زيادة الصبح، عشان كدة لو حاولت تاخد خطوات ثابتة لتقليل القلق الصبح هتحس بتحسن كبير، زي مثلا انك تحسن عادات النوم وتحافظ على روتين صباحي ثابت وتمارس التأمل بانتظام.

أعرف أعراض نوبات الهلع والقلق في الشغل

اعراض اضطراب الهلع ممكن تكون مرعبة جدا، لأن الشخص غالبا بيحس انه بيتخنق او عنده أزمة قلبية، والاعراض الجسدية الصعبة اللى بتحصل وقت نوبة الهلع هتزود الزعر والقلق وهتوصل لنوبات هلع كاملة، وعشان تفهم اعراضك بوضوح لازم تحدد انت حاسس بأية بالظبط وتعرف ازاى افكارك بتتحول لقلق، يعنى مثلا في ناس فاكرة انها مجرد ما تقلق هتلاقى نفسها بتترعش ومعدتها بتوجعها، ودة بيكون بسبب أفكار مشوهة بتزود من قلقك ورعبك، وخليك فاكر لو مقدرتش تحدد أعراضك مش هتقدر تتعامل معاها صح.

طور قدراتك عشان تقدر تتعامل مع اضطراب الهلع في الشغل

اتعامل مع نوبات الهلع والقلق والتوتر في الشغل

عشان تنجح في التعامل مع اضطراب الهلع حاول تكون في حالة استرخاء، ولازم تخصص وقت كل بوم لممارسة تقنيات الاسترخاء، زى مثلا أنك توقف دماغك عن التفكير او تخلى عضلاتك في حالة استرخاء، ممكن تعمل كمان تعمل تمارين التنفس ودي هتساعدك كتير، لو انتظمت على تقنيات الاسترخاء دي هتقدر تسترخي بشكل أفضل وهتقدر تستخدمها بسهولة لو جالك أي اضطراب هلع وقت وجودك في الشغل.

اعمل خطة تواجه بيها القلق اللي بجيجلك بسبب الشغل

بعد ما عرفت الأسباب اللى بتحفز اضطراب الهلع عندك وعرفت اعراضها ومارست مهارات الاسترخاء، انت دلوقتى جاهز إنك تعمل خطة تستخدمها لمواجهة الاضطراب لو حصلك وانت في الشغل، ودة هيقلل جدا قلقك من التعرض لاضطراب الهلع وانت في الشغل.

ممكن تكون خطتك مثلا عشان تقلل القلق إنك تسمع موسيقى هادية في الشغل أو تمارس التأمل وقت استراحة الغذاء او ممكن كل شوية خلال اليوم تتنفس بعمق وتوصل النفس لبطنك.

خلى دايما قدامك قائمة فيها الحاجات اللى ممكن تخليك أهدي عشان تفتكر تعملها لو حسيت بقلق خلال وقت الشغل.

استعين بناس ممكن تساعدك وتدعمك عشان تتعامل مع نوبات الهلع في الشغل

ممكن تخلى قلقك سر ميعرفوش زمايلك في الشغل، بس لازم تثق في عائلتك واصدقائك والمتخصصين انهم ممكن يساعدوك، ممكن المساعدة والدعم اللى هيقدمهولك ده يساعدك إنك تخفف الضغط النفسى اللى بتحس بيه من خوفك على شغلك وممكن كمان يخفف احساسك بالوحدة لما بتخفى الاعراض اللى بتحس بيها عن زمايلك في الشغل.

اتكلم مع دكتــور عشان تسيطر على نوبات الهلع في الشغل

لو الاعراض مستمرة عندك وحسيت إنك محتاج لدعم إضافي، لازم تستشير دكتور، وهو هيناقش معاك خيارات العلاج المتاحة سواء ادوية او زيارة طبيب نفسي، احكى للدكتور عن الاعراض اللى بتجيلك في الشغل واسمع النصايح اللى هيقولهالك، على الرغم ان كتير من الناس اللى عندهم اضطراب الهلع بيرفضوا ويقاموا تعاطى ادوية إلا انها ممكن تساعد بشكل كبير في تقليل القلق وتحسين المزاج،الأدوية مش حل دائم بس هي ممكن تساعدك تعدى يوم الشغل مع اتباع تقنيات التأقلم اللى بتريحك.

اترك تعليق