أنواع الإدمان وطرق علاجها

الإدمان مرض معقد جدا، لكن بعد دراسة لسنين كثيرة تمكن الباحثين من الوصول لفهم أعمق عن الإدمان، وأكدوا أن الإدمان مرض بيصيب الدماغ وانه مش فشل او اخفاق من الشخص، وكلنا بمجرد ما بنسمع موضوع الإدمان بنفكر اول حاجة في تعاطى المخدرات مع ان في أنواع كثيرة جدا من الإدمان، والمقال دة هيعرفنا اكتر على النوعين الاساسين من الإدمان بحسب تصنيف الخبراء وهما:

  • الإدمان الكيميائي: هو إدمان مواد كيميائية زي الكحول او المخدرات.
  • الإدمان السلوكي: هو إدمان سلوكيات قهرية، وبتكون سلوكيات متكررة ومستمرة.

أزاي بيحصل الإدمان؟

عشان يحصل الإدمان الشخص بيمر بشوية مراحل أساسية بتوصله للإدمان والمراحل دي هى:

  • مرحلة الارتباط الشرطي: بيربط بين إحساس السعادة عند الشخص وسلوك معين بيقوم بيه، المخ يفرز مادة اسمها الدوبامين، والدوبامين مش هو المادة المسئولة عن شعور السعادة لكنها هي المادة اللي بتخلى المخ يعمل ارتباط شرطي بين سلوك معين واحساس السعادة، ودة اللى بيدفع الشخص انه يكرر نفس السلوك د مرات كثيرة في المستقبل لحد ما يوصل لمرحلة ان ممارسة السلوك ده نوع من أنواع الإدمان.
  • مرحلة الانجذاب الشديد والتعود: نتيجة افراز الدوبامين والسعادة اللي بيحس بيها الشخص من ممارسة سلوك معين، بتتولد عنده رغبة في تكرار نفس السلوك عشان يوصل لنفس الإحساس الممتع اللي حس بيه في المرات الأولى من ممارسة السلوك، ولكن بعد فترة بيعتاد المخ على السلوك ده وتكون الاستجابة اقل، وبالتالي بمرور الوقت بيحتاج الى كميات أكبر أو ممارسة السلوك أكتر للوصول لنفس الشعور.
  • مرحلة فقدان الشغف بأي نشاط تانى: مع تطور مراحل الإدمان بيبدأ الشخص يفقد شغفة واهتمامه بأي نوع تانى من الهوايات والأنشطة اللي كان بيحبها وبيستمتع بيها قبل كدة، ودة غالبا بيكون نتيجة ان الدماغ بعجز عن افراز مادة الدوبامين كاستجابة للمحفزات والأنشطة الطبيعية زي الجنس او أنواع الفنون، ودة بيدفع الشخص للانغماس في سلوك الإدمان لمجرد الشعور بالرضا.
  • مرحلة فقدان السيطرة: التعبير الأمثل عن الإدمان ان الشخص بيفقد السيطرة على التحكم في تعاطى مواد معينة او القيام بسلوكيات معينة مدمن عليها، ودة ممكن يوصل الشخص للإصابة بمشكلات صحية او فشل في علاقاته الاجتماعية او فقدان وظيفته، وعلى الرغم من كل ده لو حاول الشخص انه يبعد ان الإدمان او يبطل بيفشل حتى لو بذل قصارى جهدة.

تعرف اية عن إدمان المواد الكيميائية؟

عرف الأطباء إدمان المواد الكيميائية على انه نوع من الاضطرابات العقلية والنفسية، يطلق علية “اضطراب تعاطى المخدرات” وفى منه حالات خفيفة ومتوسطة وشديدة، وأهم أعراض إدمان المواد الكيميائية هي:

  • رغبة شديدة لتعاطى المادة المخدة ممكن تعطل قدرتك على التفكير وعلى ممارسة الأنشطة الحياتية عموما بشكل طبيعي.
  • التعود على المخدر بعد فترة وبالتالي الحاجة لتعاطى كميات أكبر مع مرور الوقت للوصول لنفس إحساس النشوة اللي كان المخدر بيعملها في بداية التعاطي.
  • انزعاج شديد وعدم ارتياح في حالة عدم القدرة على الحصول على المادة المخدرة.
  • الموافقة على القيام بأعمال فيها خطورة على الحياة أثناء الوقوع تحت تأثير المادة المخدرة، زي السواقة او ممارسة اعمال خطرة.
  • مشاكل في الحياة الاجتماعية ومع الأصدقاء، وفقدان الشغف لأي أنشطة.
  • مش قادر تبطل تعاطى المادة المخدرة حتى لو كنت عاوز تبطل.
  • ظهور أعراض انسحابيه عند محاوله الإقلاع عن تعاطى المخدر.

ومن أشهر المواد الكيميائية اللي ممكن تسبب إدمان عند تعاطيها:

  • الكحول
  • المواد الافيونية، زي الهيروين، ومسكنات الألم الطبية زي الاوكسيكودون والمورفين.
  • الحشيش
  • النيكوتين
  • الأمفيتامينات
  • الكوكايين
  • الميثامفيتامينات

أية معلوماتك عن الإدمان السلوكي؟

في خلاف على ان الإدمان السلوكي هو نوع من أنواع الإدمان او لأ، وعلى الرغم من التشكيك في فكرة الوصول الى إدمان سلوكيات، الا اننا في الواقع بنشوف بعض السلوكيات بتتحول مع أصحابها لإدمان زي إدمان القمار وإدمان الشوبينج وإدمان الجنس، ده حتى في إدمان لممارسة الألعاب الرياضية وإدمان للأنترنت والفيس بوك والسوشيال ميديا، وفى أسباب نفسية ممكن توصل للإدمان، وفى علامات عامة للإدمان السلوكي نقدر نتأكد منها من وصول الشخص لمرحلة الإدمان وهي:

  • قضاء وقت طويل جدا في ممارسة السلوك اللي الشخص مدمن عليه.
  • التأثير السلبي عالسوشيال ميديالى الحياة اليومية ومسئوليات الشخص وعلاقاته الاجتماعية.
  • استخدام السلوك الإدماني للهرب من أي مشاعر سلبية في الواقع.
  • إخفاء ممارسة السلوك والكذب على الناس في الوقت اللي بيضيع في ممارسة السلوك.
  • صعوبة التوقف عن ممارسة السلوك.
  • مشاعر من القلق والاكتئاب والتوتر وظهور اعراض انسحابيه عند محاولة التوقف عن ممارسة السلوك.
  • الرغبة ف ممارسة نفس السلوك حتى مع الإحساس بالضيق.

ومن أنواع الإدمان السلوكي اللي الناس ممكن تلجا لمتخصص لعلاجها:

  • إدمان الشوينج
  • إدمان التمارين الرياضية
  • إدمان الأكل
  • إدمان الجنس
  • إدمان التليفزيون
  • إدمان الفيس بوك (او السوشيال ميدا عموما)

علاج اضطراب تعاطى المخدرات

غالبا الشخص المدمن بيواجه صعوبة كبيرة في انه يقلع عن الإدمان لوحدة دون الاستعانة بمتخصص، لأن في معظم الحالات بتكون الخطوة الأولى من العلاج في بعض أنواع تعاطى المخدرات زي الكحول والهيروين هي إزالة السموم من الجسم تحت اشراف طبي، والخطوة دي هي أكثر حاجة بتساعد الأشخاص على تجاوز الاعراض الانسحابين للإقلاع عن الإدمان بأمان.

وعلاج إدمان المخدرات بيتطلب وجود شوية حاجات أساسية وهي:

  • دخول مستشفى او مصحة لعلاج الإدمان: لان ده هيكون أفضل مكان يتوافر فيه الدعم والرعاية صحية، وبتتراوح الفترة اللازمة للبقاء في المستشفى من عدة أسابيع لعدة أشهر او سنة.
  • علاج نفسي: العلاج النفسى يعتبر من أهم الاساسيات اللي ممكن تساعد على التعافي من الإدمان، خاصة في حالة ان الشخص كان بيستخدم المخدرات او الادوية المهدئة للهروب من مشاعر سلبية مؤلمة، والمعالج النفسي ممكن يكون أحسن شخص يقدر يحدد الأسباب اللي وصلت الشخص للتعاطي وبالتالي يحدد أفضل طرق العلاج.
  • الأدوية: بتساعد الادوية في حالات كتيرة على التعافي من الإدمان، خاصة انها ممكن تمنع الانتكاسات عند بعض الناس اللي بيعانووا من اضطراب التعاطي لمواد زي الكحول او الافيون او النيكوتين، والأدوية بتقلل بشكل كبير رغبة الشخص في تعاطى المادة المخدرة وبتقلل كمان من الاعراض الانسحابية، ويفضل استخدام الأدوية مع الأساليب العلاجية الأخرى.
  • مجموعات الدعم: في برامج دعم متعددة بتساعد بشكل كبير في علاج الإدمان، وبرامج الدعم بتعتمد على طرق المساعدة الذاتية او الدعم الجماعي من اشخاص تانية في طريقها للتعافي، وغالبا الطريقة دي بتحقق نجاح كبير في رحلة التعافي بفضل الراحة والتوجيه اللي الشخص بيحصل عليه من خلال المجموعات.

علاجات الإدمان السلوكي

العلاج النفسي: هو اهم علاج من علاجات الإدمان السلوكي، والعلاج السلوكي المعرفي (CPT) بيكون أفضل الطرق لعلاج الإدمان السلوكي، لأنه بيركز على الانتباه للأفكار والمشاعر اللي بتسبب الضيق، وبتعلم الشخص مهارات التأقلم وبيقلل الحاجة للسلوكيات اللي بتسبب الإدمان، ومجموعات المساعدة الذاتية ممكن يكون ليها دور كبير في علاج الإدمان السلوكي، وفى النهاية لازم نكون عارفين ان الإدمان بشكل عام قابل للعلاج.

اترك تعليق