اضطراب نوبات الهلع وعلاقته بالتوتر النفسي

اية هي نوبات الهلع؟

هي نوع من أنواع رد الفعل اللى الجسم بيقوم بيها نتيجة التعرض للخوف، والنوبات دي بتكون رد فعل طبيعي للجسم بعد التعرض لخطر او ضغط او انفعال.

خلال نوبة الهلع هتحصلك شوية اعراض سريعة زى:

  • سرعة شديدة في نبضات القلب.
  • إحساس بالدوخة والاغماء.
  • الإحساس بحر شديد او برد شديد.
  • عرق ورعشة.
  • إحساس بالغثيان.
  • وجع في الصدر والبطن.
  • صعوبة في التنفس زى الخنقة.
  • إحساس برعشة في الرجلين وصعوبة في الوقوف.
  • إحساس بالانفصال عن الجسم والعقل وعن كل حاجة محيطة.

وخلال نوبة الهلع هتبقى مرعوب إنك:

  • تفقد السيطرة على نفسك.
  • يجيلك اغماء مفاجئ.
  • تحصلك ازمة قلبية.
  • تموت فجأة.

ممكن تلاقى نفسك بقيت خايف تخرج لوحدك وخايف تروح أي مكان عام عشان مرعوب تحصلك نوبة هلع تانية، بس لو الخوف ده بقي زيادة جدا ممكن يكون عندك حاجة اسمها اجروفوبيا (رهاب الخلاء)، ممكن تراجع موقعنا عشان تعرف اكتر عن النوع ده من الرهاب.

أمتي ممكن تحصلك نوبة الهلع؟

ممكن تحصل نوبات الهلع لأي حد في أوقات مختلفة، في بعض الناس ممكن تحصلهم نوبة الهلع مرة واحدة ومتتكرش تانى، وفى ناس بتتعرض للنوبات دي باستمرار او على فترات قريبة، وممكن تلاحظ ان في أماكن معينة او مواقف او أنشطة معينة مرتبطة بنوبات الهلع دي، يعنى مثلا ممكن تحصل نوبة الهلع قبل ميعاد انت خائف وقلقان جدا منه، وعادة اغلب نوبات الهلع بتستمر من 5 دقايق ل 20 دقيقة، والاعراض المزعجة بتوصل لزروتها في نص نوبة الهلع، وممكن تستمر معاك الاعراض المزعجة للنوبات دى وقت أطول لأنك هتتعرض لنوبة هلع تانية او إنك بتعانى من اعراض تانية للقلق.

اية هي الحاجات اللى ممكن تساعدك إنك تتغلب على نوبات الهلع؟

ممكن نوبات الهلع تكون مخيفة ومرعبة جدا بالنسبالك، هنقولك على شوية حاجات ممكن تساعدك إنك تتغلب عليها وتتأقلم معاها، يا ريت تكتب النصائح دي او تطبعها وتخليها في مكان قريب منك دايما.

خلال نوبة الهلع:

  • ركز على طريقة تنفسك، حاول تركز إنك تاخد نفسك ببطء وتخرجه وانت بتعد من واحد لخمسة.
  • ركز على حواسك، يعنى مثلا ممكن تاكل لبانة او بونبون بطعم النعناع، أو تضغط على كرة مطاطية في ايدك.
  • جرب تقنيات التأريض (وهي إنك تحاول تستخدم حواسك الخمسة اللمس والشم والتذوق والنظر السمع في نفس الوقت عشان تلهى نفسك عن النوبة اللى بتتعرض ليها)، دة هيخليك تحس إنك مسيطر على نفسك بشكل أحسن خلال نوبة الهلع.

بعد نوبة الهلع:

  • فكر ازاى تهتم بنفسك، لازم تشوف احتياجات جسمك بعد التعرض لنوبة الهلع، يعنى مثلا ممكن تكون محتاج ترتاح شوية في مكان هادئ او تاكل وتشرب حاجة.
  • اتواصل مع أي شخص بتثق فيه عشان يساعدك بعد نوبة الهلع، ولازم توضح للشخص ده نوع المساعدة اللى انت محتاجها.

اية هو اضطراب الهلع؟

لو كنت بتعانى من نوبات هلع كثيرة في أوقات غير متوقعة وملهاش سبب واضح، ممكن حالتك تتشخص إنك مصاب باضطراب الهلع، ووارد جدا ان يكون في اشخاص بيعانوا من اضطراب الهلع بالمصاحبة أنواع معينة من الفوبيا في نفس الوقت، والناس اللى بيعانوا من اضطراب الهلع وارد ان تعدى عليهم فترات ميتعرضوش فيها لأي نوبات خالص او يتعرضوا لنوبات قليلة جدا، وفى فترات تانية ممكن تزيد النوبات جدا.

العلاقة بين اضطراب الهلع والحساسية الزيادة

في أبحاث أكدت ان الأشخاص اللى بيعانوا من اضطرابات الهلع غالبا بيكون عندهم حساسية زايده تجاه الأشياء (زي ضوء الشمس او الروائح المختلفة او أي تغيرات في الطقس) بس لحد دلوقتى مفيش أي ادلة كافية تأكد صحة الأبحاث دي، وكمان مش واضح إذا كان وجود مستوى عالي من الحساسية تجاه الأشياء هو السبب اللى بيأدى للإصابة باضطراب الهلع، ولا الحساسية الزيادة دي هي اللى بتحصل نتيجة الإصابة بالنوع ده من الاضطراب.

اترك تعليق