أهلًا، أنا أحمد الفرماوي.

سنة 2016 -يوم عيد ميلادي بالظبط- إتشخصت بـ اضطراب القلق العام أو الـ Generalized Anxiety Disorder .. إنما الحقيقة إني على قد ماتخضيت من التشخيص على قد ما استريحت.. ويكاد يكون ده من أحسن العيد ميلادات اللي عدت عليا في حياتي.
..
قبلها بكام يوم أنا كنت حرفيًا مش قادر أقف من غير مأحس إني هأقع في أي وقت.. بطني ورجليا وجعاني طول الوقت.. حساسية في كل حتة.. أرق حـاد.. كنت بنام نص ساعة في اليوم وأصحى مفنجل.. صداع نصفي .. ضربات قلب الجيران تسمعها غير إحساس الموت اللي مابيفارقنيش!
..
علميًا الـPanic Attacks المفروض مدتها قصيرة.. ثواني أو دقايق. أنا قعدت أحلف للدكتورة إني فضلت كدة يومين كاملين.. أطول يومين في حياتي.
..
بس عامة..
التشخيص كان من أحسن الهدايا اللي جاتلي في عيد ميلاديأحمد الفرماوي

 

ليه؟ 
لإني عرفت الإجابة على سؤال سألته فيه جوجل بخمسين طريقة وماعرفتش أطلع بحاجة مفيدة.. لأني فعليًا مكنتش عارف أدور على إيه! أو بمعنى أصح “أدور على إيه ولا إيه؟”
..
أكتب حساسية يوديني على إسلام ويب.كوم .. أكتب شد عضلي يوديني على موضوع.كوم .. أكتب أرق حاد يفتحلي معلومة.كوم .. أكتب أعراض متنوعة يوديني على فتكات.. مهزلة والله.
..
التشخيص قد ما هو سخيف .. بس هو بيني وبينك ما فرقليش كتير.. لأني أساسًا عايش المشكلة.. فالتشخيص مجرد هايحط النقط على الحروف.. وهايخليني أعرف أوصف وأدي إسم للي إنا حاسس بيه ده عالأقل! ودي حاجة كويسة جدًا لأن المرض النفسي مش حاجة بتتشاف بسهولة وأعراضه مش واضحة للناس التانية زي المرض العضوي وحتى لما الناس تعرف هم معندهمش فكرة يتعاملوا إزاي معاه.
..

بس يعني .. فـ من هنا ابديت فكرة بزرميط.كوم واللي بدأ كـ Blog في الأول بكتب فيه عن القلق والأفكار السلبية عشان أحاول أساعد الناس باللي أعرفه وأقدر عليه وبعدين كبر بأخصائيين ودكاترة وناس بتكتب وكلهم بيساعدوا .. أنا الصراحة فخور جدًا ببزرميط .. كمان لأنه اتعمل في وقت مكنش فيه اي معلومات متوفرة للناس وبلغة عامية بسيطة زي مابنتكلم مع بعض في الحقيقة.

 لو عايـز تتواصل معايا بخصوص “الموقع” تقدر تبعتلي أي وقت:

ابعتلي على الفيسبوك