أولًا لازم تعرف كويس جدًا إن مش كل حاجة بتحلم بيها ليها معنى. ماشي؟ تفسير الأحلام بتاعت الأسد الأحمر اللي إنت شوفته في  الحلم بيجري ورا فراشة عالنيل ده مش مديرك اللي هايرفدك كمان تلات نقط. الأحلام والكوابيس هي طريقة تنفيس عقلك الباطن عن اللي بيحس بيه. وده معناه إن فيها رسايل آه. إنما رسايل عشان تفهم نفسك أكتر، مش رسايل بتقولك اللي هايحصل في علم الغيب.

إحنا هنا ولا بنتكلم عن الرؤية ولا اللي مكشوف عنهم الحجاب على رأي ألفرد أدلر. إحنا هنا بنتكلم عن إيه اللي المفروض تقراه وتفهمه في أحلامك وإيه الرسايل اللي عقلك الباطن بيبعتهالك عشان تفهم نفسك أكتر.

ثانيًا إيه هو العقل الباطن أساسًا؟

شوف يا سيدي العقل الباطن هو كل العمليات اللي بيقوم بيها عقلك العادي إنما بدون وعي و/أو تفكير منك ودي حاجة مُفيدة جدًا ومش مطلوب منك أبدًا تتحكم في قوة عقلك الباطن والكلام ده عشان تنجح ولا حاجة.

العقل الباطن مش سحر ولا حاجة وإنما هو تراكم تجارب نفسية وخبرات حياتية طويلة شكلت تفكير أوتوماتيك بيحصل في دماغك بدون ما يعدي على مناطق الإدراك أو الذاكرة.. يعني إيه؟

يعني لو حصلك مشكلة كبيرة ما مع شخص مُعين ولنفرض إنه ملتحي مثلًا.. ممكن جدًا تنسى المشكلة لكن يترسب في دماغك نوع من أنواع الحذر تجاه أي حد ملتحي تاني.. بدون إبداء أسباب منطقية بالنسبالك مثلًا.. حتى لو بتتعامل معاه عادي جدًا. ده مثال للتوضيح مش أكتر ومثال سطحي كمان :).

فاتبتدي تستخدم كلمات زي “مابستريحلهمش” للتعبير عن الحالة الغير مفهومة دي. فكرة استخدام قوة عقلك الباطن اللي أتكلم عليها سيجموند فرويد كانت باختصار بتتمثل في البحث عن الأسباب اللي ورا كلمة زي “ما بستريحلهمش” عشان تبتدي تمنطق أحاسيسك وتقدر تفهم نفسك أكتر وبالتالي تنجح في حياتك أكتر.

بعد ما فهمنا إيه هو العقل الباطن .. نرجع لمرجوعنا بقى

قبل ما نخش في قصة تفسير الأحلام لازم نعرف إيه هي الأحلام

الأحلام ببساطة هي عبار عن مجموعة من الصور دماغك بتعرضها وإنت نايم.

الأحلام حاجة حقيقية جدًا والدليل على كدة قدرتهـا الهايلة إنها تخليك مبسوط، مستريح، متضايق أو حتى خايف سواء فترة النوم أو بعد ما تصحى حتى وعشان كدة اهتم كتير من الباحثين بموضوع تفسير الأحلام جدًا.

الأحلام ممكن تحصل أي وقت خلال مراحل النوم.. إنما أكتر أحلام مؤثرة بتحصل في مرحلة النوم العميقة واللي بيحصل فيها حركة سريعة في العين إسمها Rapid Eye Movement .. وساعتها الدماغ بتبقى في أقصى درجات نشاطها (أيوا وإنت نايم).

في دراسات بتقول إننا بنحلم من أربع لست أحلام في اليوم الواحد .. إحنا بس مابنفتكرهمش كلهم.

طيب ليه بنحلم أساسًا؟

الإجابة الصحيحة الوحيدة اللي موجودة لحد دلوقتي هي إن محدش عارف بالظبط وإنما كلها اجتهادات من علماء علم النفس والأعصاب وغيرهم.. منهم اللي بيأكد إن الأحلام مُهمة جدًا للصحة النفسية والعقلية للناس ومنهم اللي بيأكد إنها شوية حاجات كدة مالهاش أي تلاتين لازمة. ورأيي الشخصي إن مافيش حاجة بتحصل في الدنيا دي من غير لازمة.. كون إن إحنا مافهمناش الحكمة ورا حاجة مُعينة ده مش معناه إنه عبث.

طيب ليه بيجيلنا كوابيس؟

الكوابيس أو الأحلام المُزعجة بتيجي للصغير والكبير عادي جدًا .. ومن ضمن أسبابها الضغط النفسي والقلق النفسي والصدمات اللي بتحصل في الحياة، والمرض والمشاكل النفسية والأسباب العضوية اللي بتأثر على جودة النوم نفسه، وغيره من الأسباب.. لكنها في الأول وفي الآخر تصنف أحلام .. إنما مُزعجة مش أكتر.

ليه الأحلام مليانة رموز وخيالات مع إن تفكيرنا في العادي مش كدة؟

شوف يا سيدي .. إنت عندك حاجة إسمها عقل باطن (اتكون من مجموعة من الخبرات الحياتية اللي عيشتها وعلاقات وتربية وظروف الخ..) وعندك عقل واعي (بيتحكم فيه إدراكك وذاكرتك ومنطقك الخ..).

أقدر أقولك إن لو في عقل من الاتنين دول بيخدعك .. ومحتاج تسيطر عليه عشان تنجح زيا مابيقولوا في الأفلام.. فـ هو عقلك الواعي (مش الباطن).. أبسط مثال على كدة إنت ذاكرتك ممكن تخونك فتاخد قرار غلط .. إدراكك مُعتمد على حواسك الخمسة اللي ممكن تخونك برضه بكل سهولة (زي شوية الصور اللي فيها خدع بصرية ونزلناها على صفحة الفيسبوك بتاعت بزرميط)، المنطق بتاعك ممكن يخونك لأنه ممكن يتحيز، وهكذا..

لو عايز تنجح فعلًا إنت مش محتاج كتاب “قوة عقلك الباطن” .. إنما محتاج تتحكم في عقلك الواعي.

عقلك الباطن بقى بيتحرر من مُعظم القيود دي .. عامل زي الغريزة كدة.. هو عمال يجمع شوية حاجات كتير ومعلومات كتير وبيخزن بيخزن بيخزن.. طول اليوم بيحاول يستخدم اللي مخزنه عشان يتعامل مع الحياة.. إنما إيه اللي بيحصل؟

عقللك الواعي بيسيطر عليه وبيحجمه عشان ما يبوظش الدنيا.. وده صح مش غلط.. لأن علنا الواعي هو اللي مخزن المنطق اللي بيقول ما ينفعش تمشي ملط في الشارع مثلًا بس عشان الجو حر ومخزن مع امنطق العرف بتاع المكان واللبس المناسب اللي المفروض يتلبس وغيره وغيره من المعلومات.. تخيل بقى لو سيبت عقلك الباطن الحران ده يتصرف بدون وعي وبدون إدارك؟

ده مثال تشبيهي (مش علمي) عشان نوضح الفرق بين العقل الواعي والعقل اللاواعي.

لو فهمت كل ده هاتفهم بالظبط ليه الحلم (اللي هو المتنفس لعقلك الباطن) مليان رموز. أيوا بالظبط كدة.. عقلك الواعي بيتدخل وبيشفر شوية من المعلومات دي تقوم تطلع شوية طلاسم كدة والدنيا ملخبطة.

ده اللي بيخلي الأطفال تحلم أحلام متناسقة أكتر من الكبار لأن إدراكهم لسة ماكتملش ولسة عقلهم ماتشبعش بكمية القواعد والقوانين والأعراف اللي عندنا وده بيخلي تفسير الأحلام بتاعتهم أسهل.. ده اللي بيخلي أحلامنا أحيانًا فيها إبداع وأحيانًا مش مفهومة إطلاقًا. كمان بيقولك إن اكتر الناس إبداعًا هي اللي عقلها الواعي واخد سُلطة أقل على عقلهم اللاواعي مقارنة بالناس التانية.

هل الأحلام بتتوقع المُستقبل فعلًا؟

في أمثلة لناس كتير حوالينا حلموا بحاجة وشافوها قدامهم تاني يوم، تاني شهر وهكذا.. وطبعًا الأفلام ضخمت القصة دي في عيوننا كمـان وبقى عندنا انطباع غلط عن تفسير الأحلام وإن الأحلام أحيانًا بتتحقق وبتقول إيه اللي هايحصل بكرة.. وده الحقيقة علميًا مش صح.

الفكرة عاملة بالظبط زي جملة “أنا حلمت بيك من قبل ما أشوفك” لو لاحظت معنى حلمت بيك هتلاقي إن معناها “إتمنيت” وده تقريبًا اللي بيحصل في موضوع الأحلام اللي بتتحقق.. الأحلام ممكن تغير موودك تمامًا وتخليك تحقق اللي حصلك في الحلم بإرادتك (سواء كانت إرادتك دي إيجابية أو حتى سلبية).

برضه مش بنتكلم هنا غير عن الحاجات المُثبتة علميًا يا جماعة .. عشان موضوع الرؤية تفسير الأحلام والكلام ده .. وبرضه مُعتمدين على كلام ربنا اللي بيقول فيه (قُلْ لَا يَعْلَمُ مَنْ فِي السَّمَاوَاتِ وَالْأَرْضِ الْغَيْبَ إِلَّا اللَّهُ).. صدق الله العظيم.

تفسير الأحلام: إيه معاني الرسايل اللي بتيجي في الأحلام

موضوع تفسير الأحلام بطريقة دينية وتحليلها على إنها رسايل من ربنا للبني آدمين والكلام ده كله مش بس موجود في مصر أو في العالم العربي بس على فكرة .. إنما موجود في العالم كله.. ومش موضوعنا هنا نتكلم عن الاتجاه ده خالص. إحنا بس هانتكلم عن اللي العلم قالوا لحد دلوقتي (والعلم أساسًا من عند الله).

فرويد من أكتر شخص اهتم بـ تفسير الأحلام واستخدمها بشكل مُكثف جدًا عشان يحلل المرضى بتوعه ويعالجهم عن طريق إنه يربط الأحلام والكوابيس بالرسايل اللي العقل الباطن بيبعتهـا..  ولو قدر يفسر الرسايل دي هايوصل للمشكلة.. ولو وصل للمشكلة هايعرف يحلها. دي باختصار كانت منهجية فرويد.

المُهم بقى هنا جمعنالكوا اجتهادات الناس (ومنهـم فرويد) عشان يفسروا الرموز اللي بتيجي في الأحلام وإيه علاقتها بيك وبتفكيرك سواء تفكيرك الواعي أو تفكير اللاواعي اللي هو نشاط عقلك الباطن:

• الحيوانات في الحلم: بتعبر دايمًا عن وجه ونوع ارتباطك بالطبيعة.. لو عايش في المدينة بشكل يومي وما بتتعاملش مع أي مظاهر طبيعية ففي الغالب الحيوانات مش هاتزورك كتير في الحلم.
  .
  
• الأطفال في الحلم: بيعبروا عن الحاجات الجديدة.. داخل على مشروع جديد، مُتفائل بفكرة جديدة، حاجة في شغلك مستنيها، الخ.. وممكن جدًا يبقى نفسك في الأطفال عادي 🙂 .
  .
  
• حد بيجري وراك؟ واحد من أكتر الأحلام المُنتشرة بين الناس. وفي الغالب السبب بتاعه نابع من القلق اللي البني آدم بيحس بيه .. شعور إن حد بيجري وراك في الحلم بيبقى في الغالب قوي جدًا لدرجة إنك بتفتكر تفاصيل الحلم بسهولة لما تصحى. في معظم الأوقات، السبب في الحلم ده مش خوف إن حد بيجري وراك في الواقع، قد ما هو تعبير على إنك إنت شخصيًا اللي بتهرب من حاجة معينة في حياتك.
  .
  
• الهدوم / اللبس في الحلم: بص الملابس عامة مُرتبطة برأي الناس.. بمعنى إنها في الحلم بتعبر عن إحنا شايفين إزاي الناس شايفانا.. مظهرنا يعني.
  .
  
• الرموز الدينية: ليها علاقة مُباشرة بالمواقف اللي بيتعرضلها البني آدم ومالهاش تفسير لوحدها كدة، جامع، كنيسة، صليب، هلال، الخ..
  .
  
• المدرسة / الفصل في الحلم: عادي إنك تحلم بالفصل أو المدرسة لو كنت تلميذ أو مُدرس لأن ده مكان بتقضي فيه معظم يومك.. إنما لما تحلم بيه وإنت كبير وماروحتش المدرسة من سنين فده معناه إنك محتاج تبذل مجهود أكتر عشان تفهم نفسك أكتر.
  .
  
• الامتحان المفاجئ اللي مش محضرله في الحلم: من أكتر الأحلام المُنتشرة ومن أكتر الرسايل الواضحة والصريحة اللي بيديهالك عقلك الباطن. الامتحان أو الاختبار اللي إنت مش جاهزله ده معناه إنك محتاج تتعلم من أخطاءك.. ممكن جدًا تبقى عملت أو خايف تعمل حاجة وتفشل عشان ماتعلمتش من غلطاتك ومن خبرتك. يعني بيعبر عن القلق العادي اللي الشخص ممكن يحس بيه لو عنده حاجة مُهمة داخل عليها.
  .
  
• الموت في الحلم: مش حاجة درامية خالص.. إنما هو تعبير عن إن فيه تغيير جذري حاصل في حياتك هايخليك تتخلى عن حاجات بتعملها مقابل حاجات تانية ومش عشان الحلم فيه موت يبقى شرط إن التغيير اللي حاصل ده يبقى سيئ خالص.
  .
  
• الوقوع المُخيف في الحلم: الوقوع في الحلم بيعبر عن حاجة كبيرة في حياتك ماشية غصب عنك وعمال تفقد السيطرة عليها. وبنقول وقوع مُخيف عشان مش بنتكلم هنا عن الوقوع اللي بتحس إنك مستمتع بيه.
  .
  
• توقف أي حاسة عندك (زي الكلام): بيعبر عن الإحساس بالقلق سواء القلق ده نفسي ومرضي أو سواء قلق عادي أو سواء قلق مؤقت من حاجة بتحصل في حياتك.
  .
  
• إحساس إنك مشلول في الحلم: هو إحساس طبيعي “عضوي” بيحصل لو حلمت في الوقت اللي بتنتقل فيه بين مراحل النوم المختلفة لمرحلة النوم العميق .. وأحيانًا بيعبر عن إحساس البني آدم النفسي إنه مش متحكم في حياته بشكل كافي.
  .
  
• الأكل في الحلم: بيعبر عن الطاقة، العلم أو التغذية بشكل عام. فمعنى كدة إن الأكل الكويس ده معناه إنك راضي عن المُدخلات اللي داخلالك (سواء جسديًا أو روحيًا أو علميًا) وهكذا.. وممكن تكون نايم جعان عادي جدًا 🙂 “الجعان يحلم بسوق العيش” ده مثل بيحصل وحقيقي على فكرة.
  .
  
• البيت في الحلم: بيعبر عن تفكيرك ،، عن عقلك. الأدوار الكتير غالبًا بتعبر عن مستويات تفكيرك المختلفة.. البدروم غالبًا بيعبر عن الحاجات اللي انت ناسيها أو مُتناسيها. أوض النوم بتعبر عن العلاقات القريبة لقلبك وفي الغالب الحلم بيبقى مرتبط بيها أكتر.
  .
  
• قتلت حد في حلمك؟ ماتقلقش إنت مش السفاح الجديد ولا حاجة.. هي الفكرة إنك عايز تقتل حاجة مُعينة جواك (إحساس، عادة، الخ..) مواصفات الشخص اللي بتقتله ممكن تعبر شوية عن إيه نوع الحاجة اللي عايز تنهيها دي.
  .
  
• الجواز في الحلم: ممكن جدًا تبقى عايز تتجوز في الحقيقة عـادي قول ماتتكسفش 🙂
  .
  
• إنك تفوت طيارتك أو رحلتك في الحلم: ده حلم برضه منتشر بين الناس وفي الغالب بيعبر عن مضايقتك من ضياع فرصه مُعينة (ركز معايا هو مش بيعبر عن ضياع فرصة مُعينة،، هو بيعبر عن مضايقتك إنت من ضياع الفرصة ومدى انشغال عقلك بيها)
  .
  
• الفلوس في الحلم بتعبر عن التغيير .. على حسب بقى جاتلك إزاي أو بتعمل بيها إيه.
  .
  
• الجبال في الحلم: لو بتتسلق جبل ونجحت فإنت حاسس بالإنجاز ودي حاجة كويسة استغلها وانبسط.. لو شايف الجبال من بعيد فده معناه إنك حاسس إنك محطوط تحت المكروسكوب في حاجة مُعينة.
  .
  
• العُري في الحلم: مش حاجة قليلة الأدب خالص على فكرة، وإنما بتعبر عن حاجتك لاعتراف الناس بيك أكتر من كدة لازم تحلل إحساسك ده.. وهل الناس اللي انت عايزهم يعترفوا بيك يستاهلوا المجهود والتفكير ده كله ولا لأ.
  .
  
• العلاقات الجنسية: أسهل حلم ده.. وهو بيعبر بشكل مباشر عن رغبتك في إقامة علاقة جنسية.. ولا أي اختراع. وهو من الأحلام القوية برضه وبيوصل أحيانًا كتير لدرجة الاحتلام خلال نومك.
  .
  
• المدرسين بتوعك في الحلم: مش عادي إنك تحلم بيهم لو سيبت المدرسة بقالك فترة.. المدرس بتاعك في الحلم بيعبر عن المثل الأعلى.. سواء محتاج مثل أعلى.. شايف نفسك مثل أعلى.. عندك مثل أعلى مأثر في حياتك.. وهكذا.. على حسب علاقتك بقى بالمدرس ده وانت صغير..
  .
  
• سنانك وقعت في الحلم؟ خايف لاتعجز أو إنك تبقى مش شيك ومش مُغري للناس انها تعرفك وخاصة الجنس التاني.
  .
  
• محبوس في الحلم؟ برضه حلم منشر بشكل كبير بين الناس وبيعبر عن إحساسك السئ عشان في حاجة بتحصل في حياتك مش عارف تاخد فيها قرار.
  .
  
• السواقة في الحلم: السواقة عامة سواء سايق طيارة، عربية، موتوسيكل الخ.. بتعبر عن انطباعنا في مدي التحكم بمسار حياتنــا والطريق اللي ماشيين فيه.
  .
  
• البحر / النهر / المياه في الحلم: المياه غالبا بتعبر عن مشاعرنا أو عقولنا اللاواعية. نوعية المياه (زي بحر هايج أو بحر / نهر هادي ) غالبًا بتتأثر بمدى تحكمنا بمشاعرنا في الواقع.
  .
  
• طاير في الحلم؟ خير: الطيران في الحلم ده معناه إنك حاسس إنك قادر تتحكم في حياتك بالشكل اللي إنت شايفه صح.. وعندك إحساس إنك متجه ناحية أهدافك اللي محددها في حياتك. لو بتطير فوق خالص فدي حاجة جميلة وبيأكد المعنى اللي فات.. لو طاير وسط قريب من الأرض قوي وعمال تفادي حاجات عشان تعرف تطير ده بيدي نفس المعنى برضه مع وجود شوية معوقات كدة.
  .
  
• الناس اللي تعرفها في الحلم: رؤية الناس التانية في الحلم غالبا ما بتكون انعكاس للجوانب المختلفة منك إنت شخصيًا.  يعني على حسب بتشوف مين في الحلم على حسب إنت حاسس محتاج تتطور إيه في نفسك. لو والدك مثلًا كان بيشوفك راجل البيت فلما تشوفه في الحلم فإنت بيبقى عندك إحساس إنك محتاج تهتم بالجزئية دي (مراعاة البيت). طبعًا ده مثال للشرح مش لتفسير حلمك!!
  .
  

خد بالك إنك ممكن تحلم بحاجات كتير مالهاش معنى غير إنك كنت بتفكر فيها كتير وإنت صاحي مش أكتر.. سواء بتفكر فيها كتير عشان بتتمنى تحصل أو بتفكر فيها كتير عشان خايف تحصل. شخص واحشك وبتفكر فيه.. نفسك في أطفال.. عايز تركب طيارة.. بتخاف من المرتفعات وخايف تقع.. وهكذا.. فلازم تدور جوا نفسك عشان تعرف تفرّق هل دي رموز ولا مجرد انعكاس لحاجات في اليوم بتاعك ومكملة معاك.

تنويه: الحاجات دي اجتهادات من علماء مُختلفين مش أكتر ومحاولة منهم لربط الرموز دي بالأفكار اللي عقلك الباطن بيفكر فيها وبتطلع وإنت نايم نتيجة إن عقلك الواعي قدرة تحكمه بتبقى قليلة بالليل (الأفكار اللي هربت يعني 🙂 ) ومش محاولة لتفسير المستقبل والغيب والكلام ده كله.