النهاردة، قعدت بتاع 5 ساعات على موقع اسمه Bambu MakerWorld، بتفرج على موديلات ناس عاملاها بالطابعة ثلاثية الأبعاد 3D Printing. حاجات صغيرة وحاجات كبيرة. ألعاب، أدوات بيت، حاجات للمكتب، مجسمات، وحتى قطع غيار.. ده لإن الموضوع شاغل بالي من فترة وأعتقد زيي زي ناس كتير شايف الموضوع حلو وفي نفس الوقت ممكن يبقى بيزنيس.
بدأت أدور أكتر.. الطابعة اللي كنت ببص، سعرها مش بطال كمشروع لكن كتير كهاوية، وطبعًا كل الفيديوهات اللي بيطلعاهالي الـ Algorithms بتاعت كل السوشيال ميديا بتقول ان الدنيا جنة.. دي هواية حلوة وبيزنيس حلو كمان.
طب لو فعلاً قعدت أحسبها بصراحة، الموضوع ده ممكن يبقى شغل ولا آخره هواية بس؟ هو غالبًا ينفع بس يمكن محتاج مجهود وdedication معين. وإيه حجم ونوع المجهود ده؟
هواية ولا مشروع ولا الإتنين؟
في حاجة جوانا كلنا بتنجذب لفكرة إن “الهواية بتاعتي تجيبلي فلوس.” الفكرة دي حلوة لأنها بتدمج حاجتين: المتعة والإنتاج. بتحسسك إنك مش “بتضيع وقتك”، إنك بتعمل حاجة “مفيدة”.
والـ algorithm بتاع يوتيوب وتيك توك وميتا عارفين الميل ده فينا، فبيغرقونا في محتوى من نوع: “اشتريت طابعة، خلال شهرين رجعت تكلفتها” و”بدأت من الصفر، دلوقتي عامل دخل شهري” وغيرها من الفيديوهات.
كل ده ممكن يكون حقيقي لشخص أو اتنين. بس الفجوة بين قصص الناجحين دول والواقع بتاعك إنت لما تبدأ، فيه فجوة كبيرة جداً .. مش كتير بيتكلموا فيها، والقليلين اللي بيتكلموا فيها الـ Algorithm مش هايوصلك بيهم .. لإنه من مصلحته يفضل المحتوى اللي بيبيع عن المحتوى اللي مش بيبيع.
أنا مش بكدب على نفسي وبقولك إن الفكرة وحشة أو مش ممكنة. لأ، الفكرة ممكنة. بس فيها تفاصيل لازم تعرفها قبل ما تدخل، عشان بعد شهر تحس إنك فاشل أو إن اتضحك عليك..
طب الأرقام إيه
خليني أبدأ بالجزء السهل، اللي معظم الناس بيتكلموا فيه: تكلفة الجهاز والتشغيل.
التكلفة الأولى: طابعات مثلا زي Bambu Lab P أو Creality K أو Anycubic Kobra سعرها العالمي بيترواح من 400 لـ 700 دولار ولو حبيت تجيب معاها الـ AMS (اللي هي الوحدة اللي بتخليها تشيل 4 ألوان) السعر بيزيدله بتاع 250 دولار كمان.
في مصر، طبعاً اللعبة بتختلف لإن هايبقى فيه شحن وضرايب ومكسب، وممكن السعر يطلعلك في حدود 50 إلى 100 ألف جنيه حسب اللي بيستوردها وسعر الدولار وقتها وهكذا.
دماغي: كتير بالنسبة لهواية.. بس مش كتير بالنسبة لمشروع.. وبعدين دي Fixed cost تكلفة ثابتة.. فـ So What؟
التكلفة التانية الأساسية لأي بريتنر هي الحبر.. قصدي الـ Filament يعني.. ودي تكلفة متغيرة حسب انت بتطبع إيه.. الرول الواحد كيلو مثلًا من 700 لـ 1000 جنيه حسب الماركة من اللي أنا شايفة على أمازون؟
وطباعة حاجة حجمها وتفاصيها متوسطة بناءًا على اللي أنا شايفه على Bambu Studio زي المجسم المشهور ده بيكلف تقريبًا 50 جرام.. يعني الكيلو يعمل 20 مجسم.. يعني المجسم تكلفتة من Filament 50 جنيه. مجسم شبه ده موجود على أمازون بـ 100 جنيه.
دماغي: هممم.. الربح مش كبير لإن فيه تكاليف تانية زي إعلانات، توصيل، تغليف، وقت.. وحط تحت وقت خمسين خط.. الحماس قل شوية.
خد بالك بقى إن في حاجات بتاخد أكتر.. خاصة الحاجات الكبيرة و/أو اللي فيها تفاصيل كتير.. يعني تكلفة الـ filament لشبشب زي ده بتوصل فيها لـ 500 جنيه مثلأ. شبشب زي ده على أمازون ممكن يتجاب بـ 300 جنيه مثلا.. كدة الحسبة خسرانة تمامًا.
التكلفة التالتة: هتحتاج كمان حوالي 100 لـ 200 دولار للحاجات الأساسية: من فلامنت (مادة الطباعة)، صفائح بناء إضافية، أدوات تنضيف زي الصنفرة والمبارد، وأحيانًا حاجات تلوين.
دماغي: اللعبة مش كدة، اللعبة لعبة Customization يا معلم.. ماينفعش تعمل حاجات generic موجودة أصلاً.. شغلك لازم يبقى Priceless لا يقدر بثمن.. زي الطباعة عالتيشيرتات والـMugs كدة.. التكلفة التشغيلية (مش البرينتر) تكاد تكون لا تذكر .. لكن فكرة الـ Customization والـ Personalization هي اللي الناس بتدفع فيها فلوس.
الفخ اللي محدش بيقولك عليه
طيب كدة التكلفة البدائية معقولة.. والزاوية بتاعت المشروع مفهومة..
لكن خليني أقولك إن التكلفة الحقيقية مش في الفلامنت ولا في الكهربا ولا ألأدوات. التكلفة الحقيقية في 4 حاجات تانية، وأنا هرتبهم بالأهمية:
أولاً: شغل الإيد بعد ما الطابعة تخلص. الطابعة بتطبع، أيوه. بس في حد لازم يعمل الـ slicing (تقطيع الموديل وتحضيره)، ويراقب الطباعة، ويشيل الدعامات (supports)، ويصنفر القطعة، ويطليها أحياناً، ويعبيها، ويطبع لاصق العنوان، ويسلمها لشركة الشحن بعد مايطبع المعلومات بتاعت العميل. كل ده شغلك إنت. مفيش حاجة منه آلية.
في تحليلات في الحتة دي بتقول إن المادة الخام تمثل بس 15% من التكلفة الحقيقية. الـ 85% الباقيين شغل يدوي.
ثانياً: السوق متغرق. على النت هتلاقي مئات أو آلاف من البائعين لنفس المنتجات تقريباً، بيتسابقوا على السعر الأقل. لو إنت داخل بنفس المنتجات الجاهزة.. فـ عشان تنافس مش هاتعرف تحط سعر يرضيك!
ثالثاً: التميز. البائعين الوحيدين اللي بيكسبوا ربح حقيقي في المجال ده، بيعملوا واحد من 4 حاجات: تصميمات أصلية بإيدهم (مش موديلات منزلها من النت)، تخصيص جامد Customization (كتابة أسماء، تواريخ، مقاسات معينة)، تشطيب عالي الجودة (cosplay، مجسمات للألعاب اللوحية، rendering مدهون)، أو بيحلوا مشكلة محددة لشريحة معينة (زي قطع غيار لجهاز معين أو عربية، إكسسوارات للعبة معينة، وهكئا..).
رابعًا: الوقت.
شبشب زي اللي فوق ده بياخد 74 ساعة طباعة (ده لو محصلش مشكلة أثناء الطباعة واضطريت تعيد من الأول). الناس اللي شوفتها على اليوتيوب فعلأ بتعمل فلوس من الموضوع ده (فلوس من الـ 3D Printing.. ها؟ مش فلوس الفيديوهات اللي بتاعت الـ3d printing) عندهم مش أقل من 10 برينتر أولاً.. ثانيًا: بيعملوا حساب كويس جدًا للمقاسات المطلوبة والتسويق المطلوب عشان بقدر الإمكان يطبعوا أكترمن قطعة من نفس الموديل في نفس الوقت (جنب بعض يعني).
يعني..
من اللي قريته وشوفته في الـ Forums والـ Reviews، الواقع تقريباً كده: أغلب الناس اللي بتشتري طابعة 3D بياخدوها كهواية ومش بيحاولوا يبيعوا حاجة أصلاً، وده عادي، هي أصلا هواية لطيفة وCreative. اللي بيحاولوا يبيعوا، أغلبهم بيقع في الفخ وبيسيبوا الموضوع بعد كام شهر.
الناس اللي بتعرف توصل لدخل ثابت قليلين. وعندهم قاسم مشترك واضح: أولًا niche محدد، عملاء B2B ثابتين، وعمليات منظمة وعدد محترم من الطابعات مش طابعة واحدة. وحتى دول، الموضوع ماخدش معاهم شهر ولا اتنين، ده شغل ست شهور أو سنة على الأقل من البناء المتدرج.
يعني أيوا في ناس بتوصل لمرحلة إن الموضوع يبقى مصدر دخل أساسي، بس دول عادةً عندهم أكتر من طابعة، وقاعدة عملاء B2B واسعة، أو شغالين B2C وشغالين تسويق جامد.. وفي كلتا الحالتين بيشتغلوا محتاجين يتفرغوا للموضوع، يعني مايتحطوش في خانة “الهواية اللي بتجيب فلوس” خالص .. وإنما خانة “الشغل.”
يعني خلاصتي كانت..
لو دخلت الموضوع كهواية تتعلم منها وتمتع بيها، فـ هي هواية كويسة جدًا من وجهة نظري. وسحلة صحية.
لو الموضوع مشروع يبقى تعامله زي أي مشروع محتاج دراسة جدوى وضخ رأس مال وتفرغ كبير نسبيًا.
