إيه الأهـم؟ إنك تبقى شيك؟ ولا إنـك تشوف نفسك شيك؟
الفرق كبير طبعـاً .. إنـك تشوف نفسـك شيك فدي حاجة نفسية بحتـة حلاوتهـا إنـك مش هتركز قوي مع كلام النـاس ورأيهم في اللي إنت لابسة ومش هتركز في الموضة …
أحياناً النـاس بتضرب مثل بأينشتاين اللي كان بيلبس بدلة واحدة طول حياته الرسمية .. كـان عنده سبع بدل شبه بعض بيلبس واحدة كل يوم.. لزوم النضـافة يعني.. طيب ليه أينشتين كـان بيعمل كدة؟ عشـان ما يبزلش مجهـود إضـافي عالصبح إنـه يشوف القميص البربل هيليق على الكرافاتة الكحلي ولا لازم يغير الشراب عشـان الجزمة لونهـا بني؟
بس الحقيقة إن النـاس مش عـايزة تبقى آينشتاين.. آينشتين مُمل.. ثم إنه ذكي جداً .. فمهمــا حاولنـا نقلده في لبسه .. ده مش هيزود أي درجة من ذكائنـا في حــاجة.
موضوع البدل اللي شبه بعضهـا بتاع آينشتاين ده ليه فايدة تانية مُهمـة جداً .. هو إنـه ترفـع من زمـان عن رأي النـاس في لبسه وفي شكله (زي ما هو واضح في كل الصور بتاعته) .. وأعتقد إنـه اعتمد في ده على ذكاءه وإنجازاته اللي بتتكلم عليه في أي مكـان بيروحه.. فمحدش هيسيب كل ده ويقوله: إيه ياض يا أينشتاين تسريحة الشعر العجيبة دي؟
أما إنـك “تبقى شيك” فدي حاجة مُختلفة تماماً لأنهـا بتعتمد بصورة رئيسية جداً على رأي النــاس.. البدلة والطربوش بتوع الخمسينـات كـانوا منتهى الشياكة .. وطبعاً دي حاجات ماينفعش تعملهـا دلوقتي إلا في حفلة للهالويين مثلاً.
إنـك تبقى شيك دي مُعتمدة بشكل كبير على رأي النـاس والمجتمـع فيك ده غير الموضة والألوان التريندات وهكذا.. وده ما يمنعـش إن في نـاس بتمسك العصــايا من النص وتبقى شيك وشايفة نفسهـا شيك.
يعني تبقى شيك من وجهة نظر المُجتمـع وشايفة نفسهـا شيك قدام نفسهـا حتى لو عـايشة لوحدهـا في الدنيا دي (من غير ما تضحك على نفسهـا)..
ليه بنقول من غير ما تضحك على نفسهـا؟
لأن كتير مننـا شايل نظرة المجتمـع وماشي بيهـا حتى وهو في الحمــام.. النـاس دي هتلاقيهـا بتلبس بيجامة بخمستلاف جنيه وهم مقتنعين من جواهم إنـهم لو قعدوا ملط ده هايبقى أريحلهـم.
الفكرة إنـه مادورش جواه فعلاً وأكتشف إنـه نظرته لأهمية البيجامة أم خمستلاف جنيه دي وهو قـاعد لوحده.. دي مش وجهـة نظره.. إنمتا دي وجهة نظر النـاس.
الموضوع ليه علاقة بحتاجة إسمهـا Social Acceptance اللي بيحاول أي حد موجود في مجتمـع مـا إنـه يشتغل عليهـا عشـان يلاقي قبول من اللي حواليه.. هي كويسة وصحية وكل حـاجة.. بس إحنـا بنأفور.
الخلاصة: إنـك تشوف نفسك شيك أهم بكتير جداً من إن النـاس تقبلك.. لأنك لو ما قبلتش نفسك.. ماحدش هايقبلك في كل الحالات.
