ماتحاولش تبطل سجاير وابتدي قلل سجاير (١١ حيلة مجربها شخصيًا)

خلينا نبقى متفقين إن تبطيل السجاير من أصعب القرارات اللي نقدر ناخدها ونستمر عليها. أنا فعًلا مش مصدق كمية المقالات الساذجة اللي من عينة لو بطلت السجاير هاتبقى جامد قد إيه. ولو مابطلتش هايحصل فيك إيه.

على قد ما معظم المعلومات اللي في المقالات دي صح ..  إنما مش دي الحاجات اللي بتخلي الناس تبطل لأن كلنا عارفين معظم الكلام ده.

طبعًا انا مش بقول إن “مافيش تبطيل يا إبراهيم” ماتبقاش ساذج إنت كمان! أنا بقول إن تبطيل أي عادة (خاصة التدخين) أحيانًا كتيرة بيبقى صعب فعًلا .. وعشان كدة قررت إني أجرب بنفسي حاجات تخليني أقلل سجاير.

لما قدرت أقلل سجاير حسيت إني أحسن.. يمكن ده يديني حافز إني أبطلها خالص.. ويمكن أستقر عند عدد السجاير الأقل اللي بشربه النهاردة.. في الحالتين أنا كسبان.

دي ١١ حاجة خلتني أقلل سجاير بشكل كبير جدًا. وعملت تقييم لكل حاجة بناءًا على نسبه تأثيرها الفعلي عليا.

تحديد مواعيد السجاير الأساسية (5/5)

كل واحد ليه روتين معين.. الصبح مع النسكافيه (وأحيانًا أول مايفتح عينه للأسف).. سيجارة بعد الأكل (دي أساسية الصراحة).. وسجارة لما بتتعصب (أساسية برضه).. وهكذا..

خليني هنا أنصحك إنك تحدد المواعيد الأساسية للسيجارة (أقصد الأوقات اللي فعلًا بتطلب فيها سجارة معاك) وماتلعبش فيها مبدئيًا. على وضعك!

التركيز بتاعك في الأول لازم يبقى على السجاير اللي بتولعها كدة ..بدون وعي.. وانت أصلًا مش واخد بالك ودي أكتر بكتير من السجاير الثابتة.

تأخير أول سيجارة في اليوم (5/5)

إحنا بنولع السجاير أوتوماتيك بدون تفكير.. بدون ماتوحشنا وبدون مانحس بنقص نيكوتين حتى.. أنا مش بقول مافيش اعتماد كيميائي في الموضوع .. أنا بس بقول هنا إيه؟ إن جزء كبير من عادة السجاير نفسي مش عضوي.

الجسم الصبح بيمتص أي حاجة بتخشله بشكل أكبر بكتير من أي وقت في اليوم.. عشان كدة الصبح يمكن من أكتر الأوقات المُضرة للتدخين.

وبما إني متعود أشرب السجارة مع النسكافيه الصبح.. قدرت أأخر السيجارة بتاعت الصبح بإني أأخر النسكافيه.

بغسل وشي براحة.. بغسل سناني.. ببتدي أفتح اللابتوب وأشوف الدنيا فيها إيه.. وأحدد تاسكات يومي .. أبتدي أروح أعمل حاجة أشربها.. وبدل النيسكافيه اللي بيتعمل في خمس دقايق .. ابتديت أعمل كابتشينو.. بياخدله بتاع نص ساعة.. على ماتخض اللبن والاسبريسو يغلي في الكنكة وهكذا.. 🙂 .. وبدل ماكنت بشرب أول سجارة بعد ربع ساعة من صحياني بقوا ساعتين مثلًا.. وفي الساعتين دول غالبًا هكون شربت مياه.. خدت الـ vitamins بتوعي.. نقنقت شوية من التلاجة.. وهكذا.

تبديل الإيد اللي بتمسك السيجارة (5/4)

لو كنت بتدخن عادة بإيد معينة، حاول تستخدم إيدك التانية. الاضطراب الطفيف في روتين التدخين ده بيزود وعيك بالسيجارة وبيخلي الموضوع مُتعب شوية لأنك مش متعود عليه. هي حيلة سيكولوجية صغيرة كدة وتأثيرها مش كبير قوي.. أنما أنا لاحظت إني لما بعمل كدة بطفي السجارة بدري مابكملهاش.

تغيير مكان التدخين (5/5)

مشكلتي مؤخرًا أني بقدر أشرب سجاير وأنا شغال.. يعني مش مُجبر أروح Smoking Room ولا أطلع البلكونة والجو ده.. ودي حاجة سيئة جدًا جدًا.. إبتديت أشيل السجاير في العربية ولما أحب أشرب سيجارة أنزل أشربها تحت وأطلع.

مفعول القصة دي سحر! مشكلتها إنها محتاجة عزيمة شوية لأني يومين ولاقيتني حاطط السجاير عالمكتب تاني.. بس لما طبقتها فرقت جامد جدًا جدًا.. مش بس قللت السجاير اللي بشربها وأنا شغال.. كمان خلت المكان اللي أنا بشتغل فيه نضيف وريحته مش وحشة.

أحسن مثال على ده هو الـ Smoking Room بتاعت مطار القاهرة.. لو جربتها أو تعرف حد جربها هاتفهم قصدي إيه 😀

لما بسافر دبي كمان بحس إني منبوذ وأنا بشرب سجاير في جراج مول أو جنب طفاية في الشارع.. وده بيقلل التدخين جدًا.

لما سافرت تركيا ومن كتر مالشعب ده بيدخن في مختلف الفئات العمرية والأنواع والاماكن.. حسيت إني مهما دخنت فأنا برضه بدخن أقل من أي حد فيهم وده خلاني أشرب سجاير أكتر!

فعلًا فعًلا المكان بيفرق جدًا.

ابتديت أغسل سناني أكتر (5/2)

الحيلة هنا إني المفروض كل ما أحس إني عايز أشرب سيجارة، أقوم اغسل سناني فوراً بالفرشة والمعجون. النظرية بتقول إن الشعور بالنظافة عامة ونظافة الفم خاصة بيقللوا الحاجة النفسية للتدخين. دش ساقع ممكن كمان يساعد بشكل كبير لأنه بيفوق ويغير الموود بطريقة كبيرة.. وده بيصرف دماغك عن التدخين لوقت مش قليل.

تبدل السجاير بالأكل (5/1)

الحقيقة أنا جربت الموضوع ده فترة ولاقيت إن ببدل عادة سيئة بعادة تانية سيئة برضه.. وفي آخر التجربة اللي مقعدتش أربع أيام لاقيت إني بشرب سجاير زي مأنا .. وما بين السجاير بكل سناكس والدنيا باظييت خاليييص.

جربت تلف سجاير؟ (5/4)

لف السجاير ليه كذا ميزة وليه عيب واحد.

عيبه الوحيد إن السجاير Unlimited .. يعني الباك الواحد ممكن يلف 120 سيجارة.. يعني أكنك بتشتري 6 علب سجاير مرة واحدة.. ودي مش حاجة لطيفة عشان كون عدد السجاير ده مُتاح قدامك كدة هايزود استهلاكك ليها لو اتعلمت تلف بسهولة وسرعة.

إنما اللف ليه كذا ميزة تانية:

– هاتبان عميق شوية وصاحب مزاج أو حشاش على حسب اللي بيبصلك 😀

– هايقلل الأوقات اللي هاتعرف تشرب فيها سجاير يعني مش هاتلف وانت سايق.. أو وانت واقف.. وانت في الشارع و في هوا أو مطرا.. وانت داخل على لجنة.. كدة يعني 🙂

– ممكن تزود عدد فلاتر السجارة وتقلل التبغ ودي حيلة أنا جربتها بنفسي بما إني بشرب سجاير لف من أكتر من 5 سنين.. حيلة هايلة جدًا.. بتقلل الدخان عشان زودت الفلاتر.. وبتصغر المساحة الفاضلة للتبغ في السجارة (تبغ أقل ومتفلتر أكتر).

– حاجات كتير ممكن تعملها في السجاير اللف .. زي مثًلا تغيير الفلاتر بفلاتر كربون (لو لاقيتها ف مصر قوللي بالله عليك :D) .. تغيير نوع الورق (البفرة) بورق بيتحرق أبطئ .. وهكذا وهكذا..

الدعم والتشجيع (5/3)

أنا مش الشخص اللي بيحتاج تشجيع عشان ياخد قرار عامة.. فالحقيقة الموضوع ده أنا أصلًا مجربتوش .. إنما وارد يشتغل معاك(ي) ووارد مايشتغلش.. بس اللي أكيد إنها حاجة محتاجة تتجرب.

جرب(ي) تشوف حد وتتحدوا بعض وتساعدوا بعض تبطلوا.. حتى لو هو مابيشربش سجاير ممكن يبقى عنده إدمان تاني من نوع تاني.. ومش لازم يبقى عنده إدمان أصلاً عشان يساعدك. المهم يعني إنا  مؤمن إن العلاقات الصحية بتلعب دور كبيرفي صحتنا النفسية فلو عندك حد في حياتك يقف جنبك ويساعدك استغل ده.

مُساعدة مُتخصصة (5/5)

طبعًا التدخين إدمان.. سواء إدمان نفسي أو إدمان كيميائي.. سواء اعترفنا بده أو لأ. والإدمان اضطراب نفسي عادي خالص لو مش عارفين نتعامل معاه خالص ممكن جدًا نشوف أخصائي نفسي أو دكتور نفسي يساعدنا في الرحلة دي.

الرياضة بتعمل إيه؟ (5/5)

الرياضة مُهمة قوي قوي قوي.. لكن الحقيقة إن كتير من اللي بيشربوا سجاير بيبعدوا عن الـنشاطات البدنية بالتدريج .. السجاير أقوى من الرياضة وأقوى من محمد صلاح.. كل ماشربت سجاير أكتر كل مابتديت تنهج أسرع .. ومجهودك البدني يقل أكتر وأكتر وده بيزود استهلاكك للسجاير.

بس لو عايز الضربة القاضية فعًلا للسجاير؟ الرياضة فعلًا هي الحل.

طبعًا إحنا اتفقنا مانبقاش ساذجين في الأول وعارفين إن الموضوع مش صعب بس أنا هنا بتكلم عن 10 دقايق رياضة بالعدد.. وإنك تدخلها واحدة واحدة في روتين حياتك بالتدريج المُمل.

وعايز رأيي في القصة دي؟ أحسن وقت تعمل فيه رياضة عشان تبطل أو تقلل تدخين هو الصبح! لتلات أسباب كل واحد فيهم أهم من التاني.

أولاً: صدرك لسة نضيف نسبيًا مقارنة ببقيت اليوم. فالمجهود البدني أسهل.

ثانيًا: شوية الرياضة اللي هاتعملهم الصبح هايدوك Power لطيف جدًا لباقي اليوم.

ثالثًا: ده هايساعدك بشكل كبير تطبق أول Hack وتأخر أول سيجارة لوقت أكبر.

لو حيبت الموضوع (وغالبًا) هاتحبه.. هاتلاقي نفسك بتزود الـ10 دقايق دي تدريجيًا كل يوم أو بدل ماكنت بتعمل ده يوم آه ويوم لأ.. هتلاقيك بتعمله أكتر.. واحتمال أكتر من مرة في اليوم.

الـ Green Day الإسبوعي (5/5)

دي حيلة كنت بعملها زمان ونفسي أرجع أعملها تاني.. بس فعًلا كانت بتفرق جامد.. وهي إن يبقى في يوم واحد في الأسبوع (وغالبًا هايبقى الجمعة) من غير سجاير خالص.

عشان تعرف تعمل كدة محتاج تبقى متحاوط بناس مابيشربوش سجاير (ويا حبذا ماينفعش تشرب قدامهم سجاير أصلًا).. هاتكسب كمان إنك خصصت وقت لأهلك أو لعيالك أو لمراتك وهكذا.. وباقي الإسبوع يا عم بتاعك إعمل اللي انت عايزه.

ماتحاولش تبطل سجاير وابتدي قلل سجاير

خد بالك إنك لو خدت قرار إنك تقلل يبقى ماتحاولش.. نفذ على طول.. لأن صدقني التقليل أسهل كتير من التبطيل.. والتقليل ممكن جدًا يوصل إنك تبطل .. وإن السجاير أصلًا متوحشكش.. إمشي بمدأ نُص العمى ولا العمى كله.. صدقني لو نجحت إنك تقلل سجارتين تلاتة في اليوم من غير مجهود يُذكر فـ إنت برضه الكسبان.

واحدة واحدة ولما تبتدي تقلل السجاير اللي هي بتولعها عمال على بطال بدون وعي وبدون متاخد بالك.. هاتبتدي تعرف تقلل السجاير الأساسية اللي اتكلمت عنها في أول نقطة وتستبدلها بعادات تانية صحية أكتر.

وطبعًا طبعًا كل اللي أنا قلته ده مالوش أي لازمة ولا تأثير لو إنت أصلًا من جواك مش عايز تعمل ده. قرر تقلل لما فعًلا تحس إنك عايز تعمل كدة. اتبع هنا مبدأ يودا

“Never try. Do or do not”