٥ حاجات تقولك إن قرار الطلاق صح بعد الخيانة

مش كُل المشاكل بتكون نهايتها الطلاق والبيوت ياما بتداري، لكن الثقة هي الخيط اللي لو اتقطع بين اتنين بيتقطع كُل اللي ما بينهم، فيه ناس بتيجي على نفسها وتستحمل وجع الخيانة عشان البيت والعيال، لكن فيه ناس الخيانة بتكسرها وبتسببلها جرح مالوش آخر، وبيكون الحل الوحيد هو الطلاق.

لو اتعرضت للخيانة، متخليش مشاعرك تحركك ناحية الطلاق وإنك تاخد حقك وخلاص من غير ما تدرس الموضوع كويس لإن القرار ده ممكن يكون أهم قرار هتاخده في حياتك، وإحنا في المقال ده هنساعدك وهنقولك خمس حاجات لو ولقيتها يبقى الأفضل هو أبغض الحلال.

الخيانة الزوجية وفقدان الثقة

اللحظة اللي بتكتشف فيها خيانة الطرف التاني بتخليك تكدّب كل المشاعر والحالة اللي كنتوا عايشينها قبل كدة، لدرجة إنك بتقول لنفسك مين اللي قدامي ده واحد معرفوش، وتبدأ الأسئلة تعصُر دماغك والشك يدخل قلبك إن أكيد دي مكنتش أول علاقة يدخلها ولا أول مرة يخونك، ولأن الثقة هي أساس كل العلاقات بتكون أول ضحية وقت الانهيار.

عايزينك تحُط في بالك إن الألم اللي بتحس بيه أو حسيت بيه في الوقت ده مش هيستمر معاك وإنك هتتحسن في يوم من الأيام أيًا كان القرار اللي هتاخده، وعشان صحتك تهمنا بننصحك تزور أقرب دكتور نفسي عشان تتجنب وجود أزمة ثقة تمنعك من تكوين علاقات في المستقبل.

المشكلة الأساسية للخيانة الزوجية

في اللحظة اللي هيعترف فيها الطرف التاني بخيانته، كل حاجة هتبقى أوضح، بس للأسف، هيظهر الصداع اللي هيحصلك من كُتر ما هتسأل نفسك، ياترى الخيانة حصلت بسبب المشاكل اللي بينا؟،ولا الخيانة من الأول كانت هي سبب المشاكل القديمة وأنا كُنت مُغفل؟، أيًا كانت الإجابة فده بيقول إن العلاقة فيهت مشاكل، بس الخيانة هي الوجع اللي مبيتدارش بالعكس ده بيصحي كل القديم، السرطان اللي بينهش في العلاقة ولازم يتعالج سواء قررتوا تكملوا أو لأ.

فيه علاقات بيكون سرطان الخيانة وصل لمراحله الأخيرة وخلاص مالوش علاج والحل هنا الإنفصال، وعلاقات بيكون له علاج والعلاقة بتكمل وانت اللي عليك تحدد ده.

الخيانة الزوجية والإنكار

الحالة اللي بتحلصلك فبتفصلك عن الواقع، واللي بيعاني أكتر في الوقت ده هما الأزواج المُخلصة، بيكون الموضوع بالنسبالهم صدمة لدرجة إنهم بيرفضوا يصدقوا اللي حصل، فيه ناس بتلبّس نفسها العِمة بمزاجها وبتكمل في جواز تعيس لإن ده أسهل لهم من قرار الطلاق بتوابعه،وناس بترفض تعيش مخدوعة.

إحنا مش بنقول إن كل اللي بيكمل في جوازه بعد الخيانة بينكر الحقيقة الواضحة، لأن أوقات الخيانة بتكون بداية جديدة وده مبيحصلش إلا بعد العلاج النفسي للطرفينولكن لو كان الألم هو اللي مسيطر عليك في الوقت ده لدرجة إنك بتفضل السكوت وطلب الطلاق،فده برضو مش صح لإنك لازم تفكر كويس في اللي يرجعلك تقديرك لنفسك والطريقة اللي تاخد حقك بيها.

تغيُر شكل العلاقة بعد الخيانة

لو حد قرر الإنفصال بشكل نهائي بيكون الرجوع مستحيل وكل محاولات الاصلاح مالهاش لازمة، لإن الألم اللي بتسيبه الخيانة بيكون صعب جدًا، أصعب من إن الواحد يجي على نفسه عشان طرف _هو شايفه أناني _إلا في حالة إن الطرفين بيقرروا سوا يلجأوا للعلاج النفسي لإعادة تأهيل العلاقة.

شعورك بالرفض بعد الخيانة

شعور طبيعي إنك تحس بالرفض لإن شريك حياتك اختار غيرك، المشكلة إنك بتفكر إنك متستاهلش الحُب ومحدش أبدًا هيحبك زي ما متحبتش بشكل كافي وإنك هتفضل طول عُمرك ناقص لإنك لو مكنتش كدة مكنش حد سابك ودور عاللي محتاجه برا، وإحنا بنقولك إن كل ده مش صح، ده إنعكاس الخيانة عليك اللي بيخليك تجلد ذاتك.

إحنا عارفين إن ميحسش بالنار إلا اللي فيها، لذلك محاولات اللي حواليك بتكون دايمًا فاشلة في إنها تخليك تبطل تفكر كدة في نفسك، بس  برضو انت محتاج الدعم النفسي من اللي حواليك في علاجك ورحلتك الجديدة.

في الوقت ده  أهم حاجة تعملها إنك تواجه وجعك وتخليك مصحصح  لنفسك ومتخليش ألمك يتحكم فيك، فمتدوقش حد من نفس الكاس اللي وجعك وتقرر بكل تهور إنك تدخل في علاقة جديدة لإنك هتكون بتخرّج نفسك من ظُلم بظُلم حد تاني.