إيه هي الخيانة الزوجية بالنسبالك؟ وإمتى الخيانة تستحق الطلاق؟

أنا مراتي بتخوني على الواتساب! وعند مواجهة المُتهمة بالواقعة اعترفت بارتكابها الجريمة! هذا وقد قررت النيابة – اللي هو أنا – إحالة أوراق هذه الجوازة إلى المأذون! ..

طيب وأنا جوزي بيخوني وبينزل مع زميلته بعد الشغل ولما واجهته اعترف الخاين بالواقعة وقال إنه مُعجب بيها لكن ماحصلش حاجة أكتر من كدة. وعليه مش عارفة أطلب الطلاق ولا أعمل إيه! ..

دول اتنين من عشرات الأمثلة اللي هانسمع فيها ناس كل يوم بتحاول تاخد قرار الطلاق بعد قصص الخيانة الزوجية كل يوم.

المشكلة الأكبر من وجهة نظري إننا: أولاً حافظين! وثانيًا: مش فاهمين (وده موضوع المقال أساسًا).

ركز معايا..

أولاً حافظين إننا طالما اتخانّـا يبقي نطلق! هو أوتوماتيك كدة! لو ماطلقتش اللي خاني أبقى ماعنديش كرامة! أو نضربهم بالنار وهم بالملايات في السرير زي الأفلام العربي! بس دي أوفر شوية خاصة إن معظم الخيانات الزوجية اللي بتحصل مش خيانة جنسية.. فنتطلق!

ثانيًا مش فاهمين إيه هي الخيانة أصلًا! لأن الخيانة أنواعها كتير .. أشهرهم في الأفلام هي الخيانة الجنسية إنما في أنواع تانية يمكن منتشرة أكتر بكتير .. زي الخيانة العاطفية .. وفي خيانة الأمانة بشكل عام والكذب.. وفيه خيانة السوشيال ميديا .. وفيه خيانة الإعجاب .. وهكذا..

كل واحد وواحدة مننا عنده القدرة إنه يحاول يصلح العلاقة بعد مشاكل معينة ومشاكل لأ.. في ناس بالنسبالها العلاقة الجنسية خط أحمر (ده معظمنا).. في ناس مجرد الكذب بالنسبالها خط أحمر.. في ناس تقول على العلاقة الجنسية نزوة لكن لو الخيانة نفسية (حب تاني) فده اللي خط أحمر. وفي ناس بتقدر تسامح مرة والتانية ومتسامحش التالتة. وهكذا..

وده يوضح حاجة مُهمة جدًا وهي إن الخيانة أنواع .. مش درجات!

وسيبك بقى من كلام الأفلام ومشاهد الخيانة والزوج الراجل اللي قتلهم والزوج اللي مش راجل اللي سابهم ومشي! كل ده والله كلام أفلام! سيبك بقى من كل ده وخلينا نركز فيك انت! سيبك من كلام الناس ونظرة الناس وركز في نفسك إنت وركز في أسرتك وخد قرارك من دماغك ولنفسك! لسبيين:

  1. قرارك أيًا كان إيه هو لازم يبقى طالع من دماغك عشان ماتندمش.
  2. مفهوم الخيانة مختلف تمامًا عندك وعند أي حد تاني.

طيب إيه هي أنواع الخيانة الزوجية؟ هم 9 أنواع:

  • الخيانة الجسدية (علاقة جنسية)

علاقة جسدية أو جنسية مع طرف تالت بغض النظر في عاطفة بينهم أو لأ.

  • الخيانة العاطفية (حب تاني)

الارتباط العاطفي أو الإحساس بالراحة مع شخص تاني بغض النظر عن حصل بينهم علاقة جنسية أو لأ.

  • خيانة الفرصة (النزوة)

مش كل أفعال الخيانة الزوجية سببها عدم الرضا عن علاقة الزوجين ببعض ولكن أحيانًا بتكون في فُرصة عارضة اتفتحت قدام أحد الطرفين قرر ينتهزها أو إن الطرف ده بيكون تحت تأثير المُخدرات أو الكحول لإنهم بالفعل بيحبوا أزواجهم. (نزوة يعني).

  • خيانة إعادة الثقة في النفس

ودي لما الشخص بيخون عشان يتأكد إنه لسة مرغوب فيه من ناس تانية وإنه لسة عنده القدرة إنه يدخل في علاقة تانية وينجح عادي وإنه لسة محل لجذب انتباه الآخرين.

  • الخيانة الإلكترونية (السوشيال ميديا)

التواصل مع حد تاني على السوشيال ميديا بخصوص موضوعات ومشاركة المشاعر الجنسية أو الشخصية بشكل عام. خلي بالك الخيانة الإلكترونية كمان بتشمل مواقع البورن.

  • الخيانة المادية (متجوز الشُغل)

دي بالظبط بالظبط بنسمع عنها في المقولة الشهيرة “إنت متجوز الشغل؟”.. واللي يركز فيها شريك من الاتنين على الشغل أو الموبايل أو غيرها من الحاجات المادية لدرجة إنه يهمل العلاقة تمامًا!

  • الخيانة المالية

إن حد يخدع التاني في أي حاجة ليها علاقة بالفلوس سواء حجم الفلوس اللي بيعملها أو المصادر الي بيصرفها فيها

  • خيانة الأمانة

شبه اللي فوق بس أعم شوية. وبتتضمن عدم الصدق (الكذب) بشكل عام.

  • الـخيانة البسيطة (عينه زايغة)

وده مصطلح بيحاول يعبر عن الأفعال البسيطة اللي بتضايق جوزك/مراتك، زي المعاكسة (عينه زايغة) ولكن بدون أي نية للخيانة أيًا كان نوعها.

كل دي أنواع مختلفة من الخيانة الزوجية وتأثيرها مختلف على كل شخص، وفترة التعافي منها بتختلف من شخص للتاني.

يبقى ده وقته نعرف بالظبط التعريفات المختلفة للخيانة عند الأخصائيين النفسيين:

الخيانة الزوجية في الطب النفسي

الأطباء النفسيين بيعرفوا الخيانة بشكل عام على انها وجود طرف ثالث في العلاقة بين الشريكين، وغالبا بتحصل الخيانة نتيجة مشكلة في التواصل بين الشريكين وان مفيش حوار بينهم يوضح كل طرف فيه رغباته واحتياجاته من الطرف الثاني، عشان كدة ممكن واحد من الطرفين يلجأ لطرف ثالث عشان يعوض احتياجاته ودي بتكون بداية الخيانة. 

الخيانة الزوجية من وجهة نظر مستشارين العلاقات الزوجية

استشاريين العلاقات بقي بيعتبروا ان كل شريكين ليهم مفهوم مختلف عن الخيانة، يعنى في ناس مثلا تعتبر متابعة الأفلام الإباحية جريمة كبيرة في حق العلاقة وخيانة كبيرة وفى ناس تانية تشوف ان دي حاجة عادية جدا وممكن حتى يتفرجوا على الأفلام دي مع بعض، وفى ناس تشوف ان الخيانة الجسدية هي دي اللي ممكن نعتبرها خيانة لكن في ناس تانية بقي مجرد خيانة المشاعر عندهم بتكون خيانة لا تغتفر.

وفى قاعدة عامة هتوضحلك الخيانة، وهي إنك تشوف كدة بينك وبين نفسك هل تقدر تشارك كل حاجة بتعملها مع شريكك؟ ولا تفضل إنك تخبى وتدارى عنه؟ ولو لقيت نفسك عاوز تخبى .. اعرف إنك بتعمل حاجة غلط ممكن توصلك للخيانة في يوم من الأيام.

الخيانة الزوجية عند مدربين التنمية البشرية

اغلب مدربي التنمية البشرية بيشوفوا ان الخيانة بتحصل نتيجة وجود انحراف في القيم الشخصية للإنسان، وغالبا بيكون في حاجة ناقصة في العلاقة هي اللي بتخلى الشخص يلجأ لطرف ثالث عشان يشبع الحاجة اللي ناقصة عنده وبالتالي بيدخل في علاقة غلط، لو كل واحد سأل نفسه عن الحاجات اللي نقصاه في العلاقة وحاول يكملها مع شريكة كنا قدرنا نمنع الخيانة.

الخيانة عند مرشدين العلاقات الزوجية

اغلب الناس فاكرين ان الخيانة هي خيانة جسدية، بس ده مش صح لأن كل خيانة بتبدأ بالعاطفة، يعنى لو في شخص مش سعيد في علاقته مع شريكة او في زواجه ممكن جدا ينجذب لناس تانية تخلية يحس بالسعادة والرضا، يعنى مثلا لو شخص تعيس في حياته الشخصية ولقى زميلته في الشغل بتعامله كويس جدا، ممكن ينجذب ليها (من منطلق: يا سلام لو مراتي بتعمل كدة؟!) ممكن الانجذاب ده يكون في البداية اعجاب بالشخصية أو الاسلوب عادي لكن بعد شوية وقت يتطور ممكن يتطور ويوصل للخيانة أيًا كان نوعها.

الخيانة من وجهة نظر الـLife Coach

مفهوم الخيانة في العلاقة متغير جدا وبيختلف من شخص لشخص بحسب النشأة وطريقة التربية، وكل شخص بيتكون عنده المفاهيم في العلاقات من خلال حاجات كتيره زي القصص اللي اتربى يسمعها طول عمره أو نصائح الناس الأكبر في العمر أو الأصحاب أو من حاجات سمعها او شافها في الإعلام، وكمان من ثقافة البيئة اللي الشخص عايش فيها. وهكذا..

الخيانة الزوجية في الإسلام

الخيانة في الإسلام بكل بساطة هي أن حد من الزوجين يعمل أي علاقة حرام مع شخصٍ تاني غير زوجه. يعني سواء كانت زنا، ومقابلات أو عدم غض البصر. ربنا كمان مقالش ماتزنوش! لأ ده قال (وَلَا تَقْرَبُوا الزِّنَا: الإسراء 32) أصلًا .. يعني ماتعملش أي حاجة أساسًا ممكن .. احتمال .. وارد.. تقربك من الزنا! وطبعًا مش محتاجين نوضح إن جواز الراجل من واحدة تانية مش زنا وبالتالي مش حرام وبالتالي مش خيانة.

أيوا أنا عارف كويس إن معظم الستات عندها إن جوزها يغلط مع واحدة أحسن مايتجوز عليها ويغلط معاها كل يوم 😀 بس مش ده موضوعنا دلوقتي!

يبقى هنا ييجي سؤال مُهم:
هل الإسلام بينصحني أكمل في الجواز حتى بعد الخيانة؟!

طبعًا الخيانة بشكل عام من الكبائر في الإسلام.. فمافيش جدال إن الخاين ده غِلط غَلط كبير جدًا (إِنَّ اللَّهَ لَا يُحِبُّ كُلَّ خَوَّانٍ كَفُورٍ: الحج 38). بس ثانية واحدة.. مش معنى إن الطرف التاني خان إنك ماتسامحوش! ربنا نفسه ممكن يقبل توبته على فكره! وبعدين هو اللي غلط وإحنا حاليًا بنتكلم عليك إنت!

إمتى الإسلام نصح بالطلاق بعد الخيانة؟

(إِلَّا أَنْ يَأْتِينَ بِفَاحِشَةٍ مُبَيِّنَةٍ: النساء 19)

يعني إلا لو قفشتها بفعل خيانة صريح ومعندهاش نية للتوبة فبالتالي تكملتك معاها هاتحطك في خانة “الديوث”.

من الآخر كدة.. الإسلام صريح جدًا في إن الطلاق نبتدي نفكر فيه لما “تستحيل العِشرة!” سواء للراجل أو للست أو للاتنين!

يبقى عشان تعرف الإجابة.. انت اللي لازم تسأل نفسك: هل استحالت العشرة بعد الخيانة؟

وعشان متاخدش أي قرار ممكن تندم عليه في المستقبل وتتأكد إنك خدت قرار صح، لازم:

  • تسأل نفسك السؤال ده بعد ماتكون هديت تمامًا. خُد وقتك وبراحتك خالص واتأكد إنك هديت!
  • اتأكدت؟ تمام، يبقى ده وقت إنكوا تتكلموا مع بعض وتسمعوا بهدوء في اللي حصل.
  • اتكلمتوا؟ تمام أقعد مع نفسك بقى وقرر الأول إيه هي الحاجات بالظبط اللي بتعتبرها خيانة لا تُغتفر وإيه هي الحاجات اللي ممكن تسامح فيها لو الشخص التاني فعلًا تاب ومش هايعمل كدة تاني.
  • خد وقتك تاني .. وبعدين خد قرارك واتأكد إنك بتاخد قرارك ده من دماغك إنت وبس بدون تأثير من المجتمع والأهل.

تنويه: أنا متأسف لو فيه أي لخبطة (مش مقصودة) في حتة الدين.. أنا حاولت على قد مأقدر مافتيش وأرجع لمصادر زي إسلام ويب وغيرها .. لكن  برضه الخطأ وارد. شكرًا على تفهمك 😉

اترك تعليق