عايز فلوس حرام ومش عارف تبتدي منين؟

خليني أقولك حاجة مُهمة وخُد بلك كويس. ركز معايا.
ركزت؟
في أكتر من 10 الآف بني آدم كل شهر بيدورا على نفس اللي بتدور عليه وبيكتبوا عايز فلوس حرام في محرك بحث جوجل،  يعني بمعدل 120 ألف بني آدم في السنة بيكتبوا نفس الكلمة .. وده في جوجل بس وفي مصر بس!

عارف ده معناه إيه؟ 

معناه ببساطة إن حتى الحرام بقى مجال فيه مُنافسة كبيرة .. يعني بمعنى أصح وأوضح إن الفلوس الحرام مش أسرع أو أسهل من الفلوس الحلال زي مانت فاهم.

يعني باختصار .. مش معنى إنك عايز فلوس بسرعة إنك بالضرورة تدور على حاجة حرام.

عايز فلوس حرام ولا عايز فلوس بسرعة؟

فـ تعالى بقى نتكلم عن أسرع حاجة تجيب فلوس في مصر

خلينا نتفق على حاجة الأول.

الفلوس بتيجي من الشغل أيًا كان نوعه، سواء الشغل ده حلال أو حرام (حتى لو قررت تسرق)! والشغل بيحتاج إنك تتعلم حاجة جديدة وتعملها. وعشان تتعلم حاجة جديدة لازم تجرب.

أنا مُتفهم كويس جدًا إن الجملة دي تبان كليشيه بنسمعه على طول.

بس هو الحقيقة إنها مش كليشيه.

وكل ما اقتنعت بيها أسرع كل ما عملت في نفسك معروف كبير صدقني. لأنك شأت أم أبيت هو ده الواقع .. وهي دي الحقيقة.

شوف يا سيدي هتلاقي هنا أربع أنواع من الأفكار. بديهي طبعًا إنك تركز على أول تلات حاجات إلا لو مُتحمس تجرب تعلم أو تتعلم حاجة جديدة.

1- حاجات تعرف تعملها ومحتاجة مجهود متوسط

2- حاجات ممكن تتعلمها ومحتاجة مجهود أكتر

3- حاجات مش محتاجة تعليم تمشي حالك بيها

4- حاجات مابتعرفش تعملها أصلًا

فريلانس فريلانس فريسلانس

لو عندك أي مهارات قابلة للتسويق زي الكتابة أو تصميم الجرافيك أو البرمجة أو الداتا إنتري أو التنظيم والمساعدة، أو مجرد البحث على جوجل، بتقدر تقدم خدماتك كمستقل على منصات زي آبوورك و فايفر وفريلانسر وخمسات وحاسوب., وغيرهم كتير من المواقع.

حتى لو ماعندش مهارة مُعينة في شغل كتير تقدر تعمله برضه زي الداتا إنتري مثلًا.

شغلانة بدوام جزئي

في كتير من الشركات في مصر والعالم عندها عروض شغل بدوام جزئي لأي حد يبدور على دخل إضافي. ممكن تشوف مواقع توظيف زي لينكد إن أو بيت.كوم أو وظف.كوم وغيرهم كتير عشان تلاقي فرص شُغل مُتاحة بدوام جزئي (Part Time) وفيه منهم وظايف ممكن تشتغل فيهم عن بعد (Remotely).

استطلاعات على الإنترنت

في كتير من المواقع الأونلاين على الإنترنت بتقدم استبيانات مدفوعة بتقدر تعملها في وقت فراغك وتاخد مقابل مادي مش كبير إنما لو عندك وقت تقدر تعمل من ده كتير. مثال على المواقع دي Toluna و Swagbucks و Timebucks.

بيع حاجتك المستعملة (زنقة)

بتقدر تبيع الحاجات المستعملة اللي مابقتش محتاجها عن طريق الإنترنت على مواقع زي أوليكس. إحنا كشعب مابتحبش نفرط فـ حاجة مع إن حاجات كتير من اللي عندنا في البيت مش بنحتاجها. دي ممكن تبقى فكرة تنقذ بيها الموقف مؤقتًا لحد ما ربنا يفرجها.

دروس خصوصية أو عمومية

لو عندك خبرة في لُغة ما أو مهارة معينة، بتقدر خدماتك كمدرس للطلاب. وبتقدر تعلن عن خدماتك على دي على السوشيال ميديا أو على منصات التدريس زي Udemy وPreply وMyPrivateTutor.

خدمات التوصيل دليفري

لو عندك عربية أو موتوسيكل أو حتى عجلة، بتقدر تقدم خدمات التوصيل للمطاعم ومحلات السوبر ماركت أو الشركات أو المواقع والصفحات اللي بتبيع أونلاين وبتحتاج خدمة توصيل. كمان تقدر تسجل كسائق توصيل على منصات زي Uber Eats أو Careem NOW أو Otlob وغيرهم كتير في مصر.

أجر شقـة أو أوضة أو حتى كنبة

لو عندك شقة مابتستخدمهاش أو حتى أوضة (غرفة) إضافية، بتقدر تأجرها مدد قصيرو أو طويلة على منصات زي Airbnb أو Booking.com.

مجالسة الحيوانات الأليفة

لو كنت بتحب الكلاب والقطط أو عالأقل مش بتخاف أو تقرف منهم، بتقدر تقدم خدمة زي دي في منطقتك أو عامة في مصر. ناس كتير بتسافر أو بيبقى عندها ظروف وبيدوروا على مكان أمان يسيبوا فيه الأليف بتاعهم.

التخطيط أو التنسيق للحدث

لو عندك مهارات تنظيمية وإبداع شوية، ممكن تقدم خدمات التخطيط أو التنسيق لحفلات الزفاف أو مؤتمرات الشركات. وبتقدر تعلم عن خدماتك على مواقع زي Eventtus أو Plan My Wedding مش عارف شغالين ف مصر ولا لأ الصراحة.

أجر عربيتك في وقت فراغها

لو عندك عربية مش بتستخدمها بشكل متكرر، بتقدر تأجرها على منصات مشاركة السيارات زي Sixt وDryve. التطبيقات دي بيبقى عندها كل معلومات المستأجر وبطاقته وغيره وكمان بتأمنلك على عربيتك ضد لحوادث عشان تبقى متطمن خالص.

بيع أكل في الشارع

لو عندك موهبة الطبخ وعندك شغف بالأكل، ممكن تعمل بيزنيس صغير لبيع الأكل في الشارع. دي ممكن تبقى طريقة مربحة وممتعة عشان تكسب فلوس عن طريق بيع أكل مطبوخ أو وجبات خفيفة (سناكس) أو حتى سندوتشات أو مشروبات معمولة في البيت.

قدم دروس عربي

لو بتفهم عربي وقواعد اللغة كويس بتقدر تقديم دروس في اللغة العربية للأجانب أو المُغتربين اللي عايزين يتعلموا اللغة العربي عشان يعرفوا يتعاملوا في مصر.. معظم الجنسياي هتلاقيلها جروبت على الفيسبوك تقدر هناك تعلن عن خدماتك بشكل شيك.

مُرشد سياحي

بتقدر كمان تقدم خدمات الإرشاد السياحي للسياح اللي جايين مصر سواء لغرض السياحة أو العلاج أو حتى الشغل. تقدر تقدم خدماتك بشكل مستقل عن طريق تطبيقات زي Showaround هاتعمل فلوس وتعرف ناس جديدة وتتعرف على ثقافات من كل بلاد العالم. نصيحتنا إبدأ قدم الخدمة ببلاش عشان تاخد تقييمات وبعدين إعمل سعر مناسب للساعة.. وحاول يبقى عندك بروجرام مميز جدًا يغري الناس انها تتعامل معاك.

حول البيكيا لـتُحف فنية

لو بتحب التحف أو الحاجات القديمة Vintage، بتقدر تشتريها وتجددها وتعرضها تاني للبيع بربح كويس. في ناس كتير بتحب الحاجات القديمة دي بس تكون حالتها حلوة وفي محلات أصلًا شغالة على كدة بس.

إمسك سوشيال ميديا ياك لكشك

لو عندك مهارات في التسويق عن طريق وسائل التواصل الاجتماعي ، بتقدر تقدم خدماتك للبيزنيس الصغير في مصر أو للشخصيات العامة اللي محتاجة ده. عشان تعمل كدة إبدأ بمعارفك عشان تقدر تعمل سابقة أعمال تأهك إنك تتعامل مع ناس أكتر وشركات أكبر.

التعليق الصوتي

لو عندك خامة صوت كويسة ومهارات التمثيل، بتقدر تقدم خدماتك في التعليق الصوتي Voice Over للإعلانات التجارية أو الرسوم المتحركة أو الكتب الصوتية وغيرها من الحاجات التانية اللي بتحتاج الخدمة دي. تقدر تسوق خدماتك على منصات زي Voices.com وsoundeals.com وvomotions.com وFiverr وغيرهم كتير جدًا.

مغسلة عربيات متنقلة

يمكنك تقديم خدمات غسيل السيارات للناس اللي مش فاضية أو بتكسل تروح المغسلة. مشروع تكلفته مش كبيرة وحتى لو ممعاكش فلوس بتقدر تاخد قرض مشروعات متناهية الصغر أو تجمع مبلغ صغير وتقسط عربية سوزوكي وتبتدي. حاول بس تشوف دراسات جدوى للموضوع واتكل على الله وأول خمس زباين علينا 🙂

خدمات الترجمة

إذا كنت تتقن اللغتين العربية والإنجليزية أو أي لغة تانية، يمكنك تقديم خدمات الترجمة للشركات أو الأفراد. يمكنك الإعلان عن خدماتك على منصات الترجمة أو وسائل التواصل الاجتماعي.

مشتل نباتات

لو بتحب الزرع والخضرة و بتستمتع الزراعة أو البستنة زي ما بيقولوا،بتقدر تبتدي تعمل مشتل للنباتات في البيت أو فوق السطوح أو في البلكونة. بتقدر تزرع أنواع مختلفة من النباتات أو الزهور أو الأعشاب وبيعها للناس وتسويقها عن طريق السوشيال ميديا خاصة الإنستجرام هايستغل معاك كويس.

مشتل حلازونات

آه والله.. ماعنديش أي فكرة الصراحة بس أنا شايف إن موضوع منتشر وتريند وليه علاقة بالكولاجين اللي ماعنديش فكرة برضه بيعمل إيه.. فدور إنت بقى! 🙄 

زي مانت شايف مافيش حل سحري أو أرض تضربها تطلعلك فلوس بسرعة وكل حاجة عايزة مجهود ووقت. إنما الأكيد إن العشرين فكرة اللي فوق دول مش محتاجين مجهود خرافي يعني ولا وقت سنين عشان يتنفذوا يعني! هو الموضوع كله شوية إصرار وإيمان إن ربنا هايوفقك. وطبعًا ماتنساش تتأكد إن وضعك قانوني في أي حاجة هاتجربها من الأفكار اللي فوق دي. وإنك ماتعملش أي حاجة مُضرة ليك أو اللي حواليك.

اترك تعليق