الصحة النفسية

7 علامات تأكدلك أنك هيست و بتعانى من قلة النوم ؟

قلة-النوم

 

كتير مننا بتضطره الظروف أنه ما ينامش الوقت الكافى عشان جسمه يرتاح و قلة النوم بتوصلنا لمستويات تهيس عالية موت.

زى فى أوقات الأمتحانات أو لما تكون داخل على مشروع شغل كبير تلقى نفسك بيعدى عليك أيام كتير من غير ما تكمل 3 : 4 ساعات نوم بس.

ده بيخليك تدخل فى حالة غريبة من التعب فلا أنت صاحى ومركز ولا نايم.

7 علامات غريبة تعرفك أنك هيست وبتعانى من قلة النوم ؟ 

تكرار الكليشيهات

تلاقى نفسك من كتر التعب وعدم التركيز بتكرر كليشيهات عامة محفوظة وممكن كمان يكون ملهاش علاقة بالحوار .

كمان تفضل تعيد فى أى حوار بتعمله طول اليوم زى مثلا كل ما حد يكلمك فى الحاجة تقوله ” ما هى الدنيا دوارة” .

عشان متبذلش مجهود كبير فى أى حوار تفضل تسقط الجملة دى فى أى مكان و الحكاية  مش بتقف عند كليشيهات  بس.

لأن النوم القليل لفترات طويلة بيخلى صاحبه زى اللى شارب حاجة مش على بعضه وكلامه مش مفهوم.

بيخليك عصبي زيادة عن اللزوم

طبعا قلة النوم بتخليك عصبي و موودى جدا حتى لو انت بطبيعتك إنسان  هادى وصبور .
تلاقى نفسك بتتعصب من أقل حاجة فنام براحتك كل يوم تصبح مزاجك عال العال.
كمان ساعات فى ناس الموضوع بيزيد عندها و تبدأ تهلوس و تخاف من الناس من حولها برغم أنك عمرك ما خفت من زميلاك دول قبل كدا.

عيان طول الوقت

متلحقش تخلص دور البرد تلاقه رجع تانى وده لأن الأرهاق ممكن يخلى مناعة جسمك تقل كل يوم .

عشان كدا الدراسات بتقولك أن الناس اللى بيناموا أقل من 5 ساعات فى اليوم بيكونوا عرضة أكتر للإصابة بنزلات البرد.

حبك للأكل بيزيد

طوال الوقت بدور على تصبيرة شوية أيس كريم بعد ما تخلص على بواقى الغداء و بعد شوية تدورلك على سندوتش ولا حتة بيتزا.

و ده لأن قلة النوم بتخلى هرمون الشبع يقل فى جسمك فيخليك دايما جعان و عاوز تأكل أى حاجة.

مش قادر تأخد قرار

عشان قلة النوم بتأثر على تركزنا وحكمنا على الأمور فبيكون صعب عليك تأخد أى قرار.

كمان فى دراسات بتقول أن تدفق الدم فى مواقع أخذ القرار بالمخ بيكون قليل جدا .

عشان كدا الأختيار بيكون صعب كمان زيادة معدل الخوف الغير مبرر بيزود الموضوع حبتين كمان بيبقى صعب علينا نخطط ونظم الشغل مش حكاية القرارات بس.

كل حاجة فيك بتضعف

قلة النوم المتكررة ممكن تخليك كمان تحس أنك ضعيف وجلدك باهت كأنك بتعانى كن الجفاف.

كمان ممكن يقلل نسبة الكولجين فى الجسم اللى بيساعد الجلد يكتسب لمعته ونعومته.

و تحس بنبضات غريبة على جلدك من كتر الإرهاق و قلة النوم.

أنا صاحى ولا نايم

بتعدى عليك أوقات متبقاش عارف أنت صاحى ولا نايم يعنى الحوار اللى كان لسه حاصل دلوقتى ده بجد و لا حاجة أنا بتخيلها فى دماغى.

عشان كدا اعتقد أنك لازم تفكر كويس فى عدد ساعات نومك عشان فى عمليات كتير قوى مهمة لجسمنا مبتمش إلا وأحنا نايمين.

نصيحة لكل المطبقين و اللى ساعات نومهم قليلة ظبط ساعتك البيولوجية و نام عدد ساعات مناسبة عشان تقدر تركز وتكمل يومك ولو مقدرتش لوحدك دور على السبب الأساسي ورا قلة النوم. 

شارك معنا و قولنا أكتر مدة قضتها و أنت مطبق من غير نوم كويس قد أيه؟

عن الكاتب

نهلة شعلان