ازاي السوشيال ميديا بتأثر على علاقتك العاطفية؟

213

السوشيال ميديا قلبت حياتنا، غيّرت طريقة تواصلنا مع بعض وكُل حاجة بقت عُبارة عن مشاعر افتراضية في عالم افتراضي، والأبحاث أثبتت إن استخدام السوشيال ميديا بالطريقة”المَرضيّة” دي هو اللي خرّب العلاقات، وهو السبب في كُل حاجة من أول الخِلافات البسيطة لحد الخيانة والطلاق.

ودي أمثلة على أشكال تأثير السوشيال ميديا على حياتك:

انت بتضيع عُمرك وعلاقاتك بسبب الفيسبوك!

الموضوع مش بس  مُرتبط باللي انت بتعمله عالنت وإزاي بتستخدمه بطريقة تضرك أو لأ ولكن مُرتبط بكمية الوقت اللي بتضيعه على النت واللي بيأثر بشكل سلبي على علاقتك مع شريك حياتك.

آخر إحصائيات أثبتت إن مُعدلات الطلاق الكبيرة في آخر فترة ليها علاقة كبيرة بإدمان السوشيال ميديا في العموم وبالأخص الفيسبوك اللي بيأثر على جودة العلاقة نفسها، وإن زيادة نسبة الإنضمام للفيسبوك اللي وصلت ٢٠% ليها تأثير بيترواح من ٢.١٨% لحد ٤.٣٢ ب

على معدلات الطلاق، وبكدة بيكون الأشخاص اللي مبيستخدموش الفيسبوك سُعداء في حياتهم عن مُدمنين السوشيال ميديا بنسبة ١١% وعلاقاتهم الزوجية مُستقرة.

دبور وزنّ على خراب عِشه

السوشيال ميديا بتسهلّ الطلاق عالناس الشكاكة، لإن أغلب اللي بيحسوا بالشكّ طول الوقت بيكون عندهم ضِعف ثقة في نفسهم وأغلب ظنونهم في شُركاء حياتهم بتكون وهمية، وللأسف السوشيال ميديا وبالأخص الفيسبوك بتزود مرضهم لإنها بتفتحلهم باب معلومات عن شريك حياتهم وتعاملاته ،فبيبدأوا يدوروا في الايكات والردود والرسايل لحد ما يوصلوا لحاجة يعملوا بيها مُشكلة مع شريك حياتهم من مفيش وتبدأ مشاكل المُراقبة والغيرة والصراع اللي مبيقفش ووجع الدماغ اللي بيخرّب العلاقة كلها.

الخيانة الزوجية

للأسف السوشيال ميديا مفيهاش رقيب، كُل واحد بيعمل اللي بيريحه-حرفيًا- وبيستخدم إعدادات الخصوصية اللي موفرهاله السوشيال ميديا عشان تحميه من التطفل والهاكرز في إنه يخرب حياته بإيده، وبيعترف بده واحد من كُل عشر أزواج إن عندهم رسايل وعلاقات وحسابات سرية وده اللي بيخلي حالة من كُل ٣ حالات طلاق بتكون بسبب السوشيال ميديا والخيانة اللي بتتم عن طريقها.

ودلوقتي أسهل حاجة على الأزواج اللي مش راضيين عن علاقتهم بشريك حياتهم إنهم يتعرفوا على عدد كبير من العلاقات أو حتى يرجعوا للأكس طالما الكلام كُله شات فمبيعتبروش إن دي من أنواع الخيانة، والمفاجأة إن الأحصائيات أثبتت إن ٣٠% من مستخدمي مواقع البحث عن الزواج متجوزين أصلًا!.

بس برضو عشان نكون مُنصفين السوشيال ميديا مش كُلها مساوئ، بالعكس، دلوقتي الإحصائيات بتقول إن أكتر من تُلت حالات الجواز حاليًا كان سببها السوشيال ميديا-يعني هاي ممكن نتعرف طلعت بتجيب نتيجة- وإن الناس اللي بتتعرف عالنت علاقاتها بتدوم أكتر من اللي شافوا بعض قبل كدة.

وعشان نتفادى مشاكل السوشيال ميديا عالعلاقات فلازم الطرفين يكونوا على اتفاق ويعملوا سياسة خاصة بيهم تناسبهم ومتأثرش على علاقتهم.

اترك تعليق