الأرق: مش عارف أنام زي البني آدمين

مين مننا مش بيطلع عينه دلوقتي عشان يعرف ينام , ولو ربنا كرمه ونام وقلق في النص بيبقي صعب عليه يرجع ينام تاني 🙁
بس مش هو دا النوع الوحيد للارق ,انت ممكن تنام ٨ ساعات وتصحي تعبان بردو لان الارق مش مرتبط بس بساعات النوم او سرعتك فانك تدخل فالنوم بس , هو بيبقي مرتبط بكميه النوم لان كل بني ادم محتاج كميه مختلفه , غير كمان شعورك بعد النوم ,يعني بتبقي صاحي فايق ولا تعبان وفاصل

طيب ايه اعراض الارق كلها عشان نبقي فاهمين :

  • بتلاقي صعوبه في انك تنام
  • لو قلقت بليل بيبقي صعب ترجع تنام تاني
  • بتصحي لوحدك بدري اوي
  • بتصحي مش فايق ” مهمد “
  • بتلاقي صعوبه في التركيز فالنهار
  • بتبقي منفعل وتعبان ونعسان فالنهار

دلوقتي عرفنا ايه هو الارق واشكاله ,تعالوا نعرف بقي ,ايه اسباب الارق :

  • المشاكل النفسيه والاضطرابات العاطفيه :
    • وهنا طبعا الحب عامل اساسي 😀
    • و مشاكل زي الاكتئاب والاجهاد والقلق والحزن والصدمات النفسيه تقريبا سبب نص مشاكل الارق
    • بس بردو العادات اليوميه وروتين نومك والصحه الجسديه ليها سبب اساسي في الارق
    • خمس طرق تخلصك من الأرق المرتبط بالضغط النفسي
  • المشاكل الطبيه :
    • زي الحساسيه والربو وامراض الكلي والالم المزمن من اسباب الارق بردو ودي لازم تروح لدكتور متخصص عشان تعالجها
  • الادويه :
    • في ادويه كتير فيها مواد معينه بتسبب الارق , زي : الادويه اللي فيها كورتيزون و ضغط الدم العالي, حبوب منع الحمل,وادويه البرد اللي فيها كحول و مسكنات الالم اللي فيها كافيين

دي اغلب اسباب الارق , نيجي بقي ايه اللي ممكن نعمله عشان نعرف ننام كويس ! لو سبب عدم النوم ادويه او مشاكل نفسيه كبيره او امراض يبقي لازم تروح لمتخصص عشان الموضوع دا مش هتعرف تحله لوحدك للاسف 🙁

اما لو سبب الارق عادات يوميه غلط دا نقدر نديك ليه حلول، خلينا نقولك عن عادات جديده تساعدك علي النوم :

  • اظبط ساعتك البيولوجيه :
    • يعني حدد ميعاد معين تدخل تنام فيه وميعاد للصحيان حتي في ايام الاجازه حاول متكسرش المواعيد دي عشان تعود جسمك وعقلك عليها ,
  • متنمش في نص اليوم :
    • يعني لو طلبت معاك اوي ممكن تنام نص ساعه , اكتر من كدا هياثر عليك فالنوم بليل
  • وقف الكافيين قبل النوم بـ٨ ساعات :
    • والنيكوتين والكحول ليهم نفس التاثير المنشط ,قللهم في العموم بس امنعهم قبل النوم بـ٨ ساعات عشان تعرف تنام
  • متاكلش اكل تقيل قبل النوم :
    • علي الاقل قبليها بساعتين , وخصوصا الاكل اللي فيه دهون لان دا بيخلي المعده تاخد وقت طويل لهضمها , والاكل اللي فيه التوابل وبهارات ممكن يعملك حموضه فمتخلكش تعرف تنام
  • العب رياضه :
    • الرياضه ممكن اوي تحسن نومك بس مفعولها علي المدار الطويل هتساعدك تنام احسن , بس متلعبش قبل النوم علي طوول

مش بس العادات اليوميه السيئة هي اللي بتاثر علي نومك, كمان روتين النوم ” تجهز عقلك وجسمك للنوم ” بياثر بشكل كبير، فهنقولك علي كام حاجه تاخد بالك منها :

  • اتاكد ان اوضتك ضلمه وهاديه ودرجه حرارتها كويسه :
    • ممكن تستخدم سدادات عشان الصوت , والستاير والباب عشان تقلل الاضاءه تماما , ولو في الشتا دفي الاوضه كويس وفالصيف خلي الجو كويس علي قد ما تقدر
  • ابعد عن المواقف اللي بتثير جهازك العصبي :
    • زي انك تشتغل قبل النوم علي طول او تتكلم في مناقشه ومجادله طويله ,او لعب رياضه ,بدلا من دا جرب القرايه او تسمع موسيقي هاديه
  • اقفل كل الشاشات قبل النوم بساعه :
    • زي الموبايل والتليفزيون والاب توب , مش رخامه عليك ,بس الاجهزه دي بتقلل افراز الميلاتونين ودا ممكن يخليك تقلق في نومك كتيير ,لو لازم تسمع او تتفرج علي حاجه قبل النوم ,ممكن تبدله بانك تسمع الراديو او الموسيقي الهاديه

كدا احنا قولنالك ايه هو الارق وانواعه واسبابه وبعض من طرق حلوله ,ابدا بعاده او اتنين ولما تلاحظ الاختلاف بنفسك كمل باقي العادات واحنا نوعدك ان الارق بتاعك هيقل مع الوقت

  • هنكمل المره الجايه في نعمل ايه لو قلقنا عشان نعرف نرجع ننام تاني بسرعه !

قولولنا بقي بتقعدوا اد ايه علي السريرعشان تعرفوا تناموا ؟!!

تعليق 1
  1. Yassmin Mustafa يقول

    هل لو الشخص مصاب بالمرض النفسي منذ وقت طويل هل في امل انو يتعالج ويرجع طبيعي زي الاول؟

اترك تعليق