الـ 6 حاجات الوحيدة اللي أكيد هاتندم عليها لما تكبر

من أكتر المفارقات  في حياتنا هى أننا بنعيش عمرنا نعمل حاجات أحنا مش عازين نعلمها و بننسى  نستمتع بالحياة ،والنتيجة بتكون  أن الوقت بيعدى وبنكتشف أن أحنا معشناش حياتنا صح . وعلشان تفكر كل يوم نفسك بايه المفيد ليك وايه المفروض تبطل تعمله حالا  ، دى أكتر الحاجات الناس بتندم عليها لما بتكبر :

• مكانش عندهم الشجاعة يكونوا نفسهم :

بمعنى أن أغلب الناس للأسف مش بتعيش لنفسها وبيفضل عندها إحساس بالالتزام بحاجات هما مش عايزين يعملوها بيفرضها عليهم أهلمهم ومجتمعهم سواء الكية أو الشغل أو الجواز…وبيكون النتيجة أنهم مش بيعيشوا حياتهم هما لكن الحياة المفروضة عليهم ، وبيندموا أن مكانش عندهم الشجاعة الكافية يعيشوا اختياراتهم .

• اشتغلوا شغل مش بيحبوه بدل ما يخاطروا :

وده بينطبق على النقطة الى فاتت ، تحديدا الشغل ده علشان الإنسان بيقضى حوالى أربعين ساعة في الأسبوع وهو في الشغل وأسبوعين بس في السنة أجازة ،  يعنى بيقضى معظم حياته في شغل مش بيحبه وبعيد عن اهتمامه بدافع الاستقرار أو الوظيفة المثالية أو اللقب  بدل ما يقرر أنه يغامر ويختار مجال هو بيحبه .

• مقضوش وقت كفاية مع أهلهم :

كلنا عارفين أن الأسرة هي أهم حاجة في حياتنا ، لكن ناس كتير بتعتبر الأهل من الأمور المسلم بيها وبنكتشف بعد فوات الأوان أن كان مفروض نقضى وقت أكتر معاهم . علشان كده حاول على قد ما تقدر أنك ماتتشغلش عنهم وتخصصلهم  وقت بعيد عن أى مشاغل .

• معبروش عن مشاعرهم الحقيقية :

أغلب الناس بتندم أنها معبرتش عن مشاعرها الحقيقية تجاه المواقف والناس في حياتها ، لازم تبقى عارف أن الحياة أقصر من أنك تخبى مشاعرك أو تكتمها . حاول تعبر للناس عن حبك ليهم وتقديرك ليهم لأن ممكن ميكونوش عارفين ومحتاج تقولهم .

• مكنوش على اتصال مع أصحاب زمان :

من الصعب أنك تحافظ على علاقتك بأصحاب القدام أحيانا وبالذات لو أنت عايش أو بتشتغل في مدينة أو دولة مختلفة ، كمان لو حياتك خدت شكل مختلف عنهم . علشان كده ، ممكن ترتبوا وتتقابلوا  كل فترة ، أو أنك  تتواصل حتى لو عن طريق  الفيسبوك .

• اشتغلوا كتير ومستمتعوش بالحياة :

لأن عندنا ثقافة أن كل ما نشتغل بشكل مبالغ فيه وعدد ساعات الشغل تزيد هيخلي شكلنا كويس قدام المدير ، فبنضطر أننا نجهد نفسنا فى الشغل من غير ما نفكر ناخد أجازة . لكن الإحصائيات ثبتت أن الناس بيكونوا أقل كفاءة لما مش بياخدوا أجازة  أو بياخدوا ساعات شغل أكتر ، كمان عدد الوقت الزيادة الى بتقضيه فى الشغل بيكون مقابل حياتك الشخصية .