اللعب أسلوب حياة شاركي ولادك كل لحظة
ولادنا بيتعلموا من كل حاجة حوليهم من اللعب و الأكل و الهدوم …
بس فى ولاد الحاجات العادية بتكون بالنسبة لهم صعبة جدا و مش بيتجاوبوا مع المعلومات اليومية العادية.
من سن 1:3 بيعلم الطفل كل حاجة فى يومه العادى كل حاجة بتوصل لأيده بيتعرف عليها …أسمها و كمان بنعمل بها أيه ؟
مثلا تفاحة بنأكلها… كورة بنلعب بها ….. كوبية شاى سخن ده كخ ساخنة و غيرها من الحاجات.
إضطربات الأطفال بتأثر على تواصلهم مع الدنيا من حولهم مش بيتجاوبوا و بيحتاجوا مجهود أكتر من الأم.
خصوصا لم بتثبت الرؤية و عند سن2 :3 بنعرف هما عندهم أيه طبعا بعد ما يتعرضوا على طبيب نفسي أطفال.
و هنا بنبدأ سوا سكة الجلسات فتلاقى الطفل محتاج لجلسة تخاطب و جلسة تنمية مهارات و جلسة تعديل سلوك حسب حالته.
أعمل أيه عشان أساعد أبنى يتعرف على الحاجات البسيطة ؟!
المحتويــات
بلاش اليأس
مش أول ما نبدأ فى الجلسات ونعرف حالته أيه نقوم على طول نبطل نتكلم معه و نعرفه بكل حاجة حوله لا ده غلط .
بالعكس لازم تتعملى معه ذى أى طفل فى سنه أو حتى أصغر و تقولى الكلمات حتى لو مرددش وراكى بس هيكون سمع.
حولى كل حاجة لنشاط
يعنى كل يوم نركز على حاجة لو بنطبخ ندخل المطبخ سوا و نتكلم عن كل حاجة بنعملها.
لو كان فى الحمام نعرفه برده بالأشياء ..ده دش … و دى صبونه… و دى حنفية عشان نغسل أيدنا و غيرها.
روتين ألعاب يومى
يا ريت لو أهتماتى باللعب التعليمية و الكروت اللى هتساعده يتعرف على حاجات كتير .
و ممكن تخلى ساعة فى اليوم خاصة بالطفل ذى الجلسة تلعبوا لعبة.
يتعلم منها حاجة ذى معرفة اسماء الفاكهة و الخضار أو الحيوانات و غيرها.
عندك كمان المعكوسات و هى لعبة عشان نعرف الحاجة و عكسها يعنى مثلا :
أنه يلمس ليفة خشنة و قماش ناعم … او ايس كريم ساقع و شاى سخن.
قصة قبل النوم
يا سلام بقى لو كانت عن حاجة أنتى عارفة أنه بيحبها و تقرأيها كل يوم قبل ما ينام حتى و مش منتبه يوم ما يتقدم هيبقى فاكر كل ده.
لعبة الطبلة
كمان من الألعاب الحلوة لتنمية وعى الطفل وذاكرته حتى لو كلنت بشوية علب بلاستيك مقلوبه و أقلام و أعملى نغمه و حاولى معه أنه يكررها.
مرة على مرة هيقدر يعملها و هيحس أنه نجح فى حاجة.
ألعاب التطابق كمان حلوة قوى
- و دى بقى لها مراحل فى الأول بنبتدي بأنه يدور على الصورة المتشابه مع الكارت اللى فى أيده.
- بعد كدا ممكن تغيرى الكارت باللعبة اللى شبه الصورة يعنى مثلا لو فى أيده كارت بصورة تفاحة و نحط قدامه تفاحة بلاستيك مع شوية فواكة تانية هو يختار المتشابه.
- المرحلة التالتة بتكون الصورة مع الحقيقة يعنى مع تفاحة بجد.
اللعب الجماعى
سواء بقى كان مع أخواته أو أصحاب نلعب سوا عشان نتعلم الصبر و نتعلم نستنى دورنا كمان نتعود على اننا نغلب و نتغلب.
لعبة الموسيقى
و دى بتنمى التركيز عند الطفل عشان بنجيب شوية لعب شبه الألات الموسيقية و نغمى عنينه و نسأله عشان نعرف إذا كان هيقدر يتعرف عليها.
ممكن نستخدم حاجات بسيطة ذى صفارة ،جرس ،طبلة و بيانو أطفال.
الأشكال و الألوان
فى كل لعبة أكيد الادوات بيكون لها أشكال يعنى دايرة مستطيل و ألوان أحمر، أخضر…. نعرف الطفل بها دايما .
الصبر
طبعا الصبر أهم حاجة لان ساعات تعبيراته بتحسسك أنه مش معاكى خالص بس صدقينى معظم الولاد بعد ما بيتحسنوا بيكونوا فاكرين كل حاجة و بيكون فاكر و حاسس بتعبك معه.
فحاولى تجربى وتلعبى مع أبنك يتعلم الحاجات البديهية اللى ممكن تكون صعبة بالنسبة له.
شاركينا طرق لعب جربتيها مع أبنك عشان نطور مهاراته المعرفية اليوميه.
