ليه لازم تنام كويس؟

قلة النوم بتخليك شخص غريب تاني يوم ومش قادر تتعامل مع أي حد ولا تعمل أي حاجة، غير إن الغزالة مبتكونش رايقة عشان كدة الدراسات بتثبت إن النوم الكويس بتساوي صحة كويسة، ودي الأسباب اللي بتقولك ليه لازم تنام كويس:

دماغك هتقفل

لما مبتنامش كويس مبتقدرش تتعامل مع أي حاجة صح، لا تشتغل ولا تذاكر ولا تفتكر أي معلومة وحتى أي معلومة بتحاول تدخل دماغك بتفشل في تخزينها لإن دماغك من قلة النوم واقفة ومش مستوعبة أي حاجة.

مزاجك هيبوظ

لما بتنام جسمك بياخد راحته وبيتعامل بطريقة صحية وصحيحة مع هرموناتك وعواطفك ولما مبتنامش بتكون ردود أفعالك عصبية وسريعة وغير منطقية أكتر من إنك بتكون إيجابي أو بتدي الأمور حجمها الطبيعي.

صحة قلبك

لما بتنام ضغطك بينخفض وده اللي بيدي الأوعية الدموية راحة فكل ما تقل مدة النوم كل ما يفضل الدم بيتضخ بضغط عالي على مدار ٢٤ ساعة وده اللي بيأثر على قلبك بشكل بيوصل للجلطات، يعني راحة قلبك لبعض الوقت هي سبيل صحته لوقت أكبر.

إنجازك الرياضي

لو بتلعب حاجة زي المصارعة فالنوم مش بيأثر عليك نفس الدرجة لو بتلعب حاجة زي السباحة أو الجري فانت محتاج للنوم أكتر من أي حاجة تانية لإن ده الوقت اللي عضلاتك بتسترخي فيه عشان تقدر تكون قوية في اليوم اللي بعده وتحققلك الأداء اللي انت محتاجه، وغير إن قلة النوم بتأثر على أدائك الجسدي فهي بتأثر على الحافز عندك حتى لو بقيت قدام خط النهاية انت مش مستوعب انت عايز إيه واستعيابك بيكون بطئ جدًا.

نسبة السكر في الدم

في النوم بتكون دور الدم بطيئة جدًا وده اللي بيقلل نسبة الجلوكوز في الجسم والنسبة دي بما بتقل في الوقت ده بتتوازن مع زيادتها وانت صاحي وبكدة بتكون بتحمي نفسك من الإصابة بمرض السُكر.

تعزيز المناعة

جهازك المناعي وانت نايم بيتعرف عالجراثيم والبكتريا اللي دخلت جسمك على مدار اليوم وبيكون في أشد حالاته الدفاعية فبيواجهها ويتخلص منها وده اللي بيفسر ازاي بننام تعبانين ونقوم أحسن.

بتحافظ على وزنك

طول ما انت نايم فانت مش جعان ومش بتاكل، بس قلة النوم بتفسد الهرمونات المسؤلة عن التحكم في الجوع عندك”اللبتين والجريلين”، وشهيتك بتتأثر وبالتالي مبتقدرش تقاوم الأكل الجاهز فوزنك يزيد وحركتك بتبقى أصعب، فانت خليها عندك قاعدة ان النوم الكويس=الرياضة= اتباع نظام غذائي صحي، التلاتة مع بعض بيساعدوك تحافظ على وزنك ومن غيرهم روتينك هيبوظ.

كُلنا محتاجين النوم بقدر كافي يريحنا وده بيحصل لما النوم بيكون بيترواح من ٧ ل ٨ ساعات لكن من أول ما النوم يكون من ٩ ساعات وطالع بيكون بيدمّر الصحة لإن الكالسيوم بيتراكم في الشرايين وبيسبب أكتر من مرض فلازم تخلي بالك من نومك وعدد ساعاته عشان تقدر تكون بصحة كويسة.