ازاي تتصرف لو جالك نوبة هلع أثناء ممارسة الجنس؟
في سيدة بتحكى تجربتها عن التعرض لنوبات الهلع اثناء ممارسة الجنس وبتقول: “كان يوم عادى جدا واثناء العلاقة مع زوجي حسيت ان نفسى مكتوم وان في حاجة تقيلة على قلبى وبدأت أحس برعب وخوف ملوش سبب، فطلبت من جوزى انه يبعد شوية وقعدت على طرف السرير وبدأت اتنفس بعمق وبدأت أحس بالتحسن تدريجيا.
وبعدين فهمت ان دي نوبة هلع ، لحسن الحظ نوبات الهلع اللى زى دى عادة مش بتطول يعنى اقل من 15 دقيقة والموضوع بينتهى بسلام، بس الغريب ان نوبات الهلع دي بتحصل من غير أي سبب واضح يعنى انا مكنتش خايفة او قلقانة من أي حاجة وكنت مع شخص بحبة وبثق فيه ومع ذلك اتعرضت لنوبة الهلع دي ومريت بأعراضها المزعجة زي الألم الشديد اللي حسيت بيه في صدري والخنقة وكتمة النفس، يعنى مفهوم ان الشخص ممكن يحس برعب وخوف لو اتعرض لاعتداء جنسي او تجربة جنسية صعبة، لكن انا كنت مع زوجي وكنا في قمة الرضا والتفاهم والحب”
الأطباء النفسيين بيوضحوا ان في أسباب كتيرة ممكن تخلى الشخص يتعرض لنوبة هلع اثناء ممارسة الجنس، خاصة في حالة إصابة الشخص باضطراب ما بعد الصدمة PTSD، ودة بيتصاب بيه الشخص اللي اتعرض لحادث او اعتداء جنسي، ودة ممكن يخلى الشخص يتعرض لنوبة هلع اثناء ممارسة الجنس بعد كدة، بس طبعا العلاج النفسي والأدوية بيكون ليهم دور كبير في علاج الحالة دي وبتخف تدريجيا، ولكن زي ما قلنا قبل كدة في ناس بتكون متعرضتش لأى حادثة جنسية ولا عندها أي مشكلة نفسية بس ممكن برضة يحصلها نوبة هلع بدون سبب واضح اثناء ممارسة الجنس.
خليك فاكر لو حصلتلك نوبة هلع اثناء الجنس انت لازم تطلب من شريكك انه يبعد وتفهمة الحالة اللي انت فيها، وتبدأ فورا تعمل تمارين التنفس العميق وتمارين اليقظة وتطمن نفسك ان النوبة دي هتخلص خلال دقايق، وفى بعض الحالات الأطباء النفسيين بيوصفوا ادوية مضادة للقلق، بس لازم تكون عارف إنك بتستخدمها وقت الضرورة بس عشان في ادوية مينفعش تستمر عليها لفترة، الأدوية دي هتساعدك تهدى جدا وتخلص من نوبة الهلع.
ومهم كمان إنك توضح لشريكك في العلاقة ان اللي بيحصل دة مش نتيجة غلط هو عمله، دي مجرد نوبة طارئة وبتروح لحالها خلال دقايق بسيطة بعد ما تعمل شوية تمارين تنفس وتمارين استرخاء للعضلات، وإنكم ممكن تمارسوا حياتكم بعدها بشكل طبيعي جدا، والشريك كمان علية دور مهم في انه يهدئ شريكة وقت نوبة الهلع ويطمنة بأن الموضوع هيمر بسلام.
لازم تعرف كمان ان نوبات الهلع هتعدى بس لو حسيت ان الموضوع بيتكرر معاك كتير بسبب مشكلة نفسية او اضطراب حصلك بعد صدمة اتعرضت ليها لازم تستشير دكتور عشان يساعدك وتقدر تعيش حياتك اليومية وكمان حياتك الجنسية بشكل طبيعي.
