ازاي تتصرف صح في المواقف الصعبة؟

ساعات كثير بتقابلنا مواقف في حياتنا او قرارات لازم ناخدها وبنكون مش عارفين اية هو التصرف الصح، وكتير بيكون التصرف الصحيح مش واضح او بتكون محتار بين أكثر من اختيار ومش قادر تحدد اية هو الأنسب منهم، عشان كدة هنساعدك ونوضحلك أزاي تقدر تاخد القرار الصح في أي موضوع وأزاي تكون واثق ان قرارك صح؟

فكر بنزاهة وحيادية

لازم تلتزم بمفهومك الأخلاقي والاجتماعي، وتتعامل بنزاهة وحيادية ودة معناه إنك تكون صادق مع نفسك ومتتنازلش عن قيمك الأساسية ولا أفكارك عشان تتوافق مع الرأي العام للأغلبية، وغالبا التصرف بنزاهة وحيادية بيكون مش دايما سهل، لأنك ممكن تواجه انتقاد من اللي حواليك او تلاقى تعطيل واعتراض على تصرفاتك، عشان كدة لازم تسأل قلبك الأول وتشوف انت حاسس بأية وعلى الأساس ده تقرر وتتصرف.

 وخليك عارف ان لو التصرف الصحيح مش واضح اوى بالنسبة ليك أو ان التصرف اللي انت شايفة صح مخالف للرأي السائد لباقي الناس، أو ان الرأي ده بيعرضك للانتقاد، يبقى طبيعي هتحس بشوية من عدم الراحة اللي ممكن تتغلب عليه بسهولة.

خلى بالك واعرف أن أفعالك ممكن تؤثر على الآخرين

ممكن ناس تؤيد وناس تانية تعارض تصرف او قرار معين ليك، بس وانت بتفكر في تصرف او قرار لازم تفكر في تداعياته وآثاره على الناس اللي حواليك، ومش معنى كدة إنك تتنازل عن رغباتك او قرارتك عشان ترضى الناس، لكن لازم تحط في اعتبارك تأثير تصرفاتك وقراراتك على الناس المحيطة بيك.

يعنى مثلا لو عرفت ان زميل ليك في الشغل مدمن كحول او مخدرات، ممكن تساعده بدون ابلاغ رؤسائك او ابلاغ إدارة الموارد البشرية، ودي ممكن تكون الحاجة اللي هتخليه يفوق لنفسه ويتخلص من السموم اللي في جسمه ويتعالج من الإدمان، يعنى في الحالة دى لو اتصرفت غلط ممكن تأذى الشخص ده ويتفصل من شغله.

ولو مثلا أكتشفت ان في حد من افراد اسرتك بيعانى من مشكلة زي تعاطى المخدرات او ادمان العقاقير او عنده مشاكل نفسية زي القلق والاكتئاب واضطراب ما بعد الصدمة PTSD وغيرها من الحالات، لازم ساعتها تصرفك يكون حكيم وكلماتك تكون مناسبة للموقف، وتراعى ان الأشخاص اللي بيمروا بالظروف دي هما كمان بيكون عندهم حالة من انكار الواقع، ولازم تكون عارف انك متقدرش تجبر أي شخص على العلاج لو هو نفسة مش عاوز يتعالج، وخليك عارف ان الدعم والتشجيع في الوقت ده هو أكثر حاجة الشخص بيكون محتاجها، وأن دعمك ودعم الاسرة للشخص ده حاجة مهمة جدا للتعافي سواء من الإدمان او من المشكلات والامراض النفسية والعقلية، لكن لو اتصرفت غلط ممكن الشخص ده يتأذى ويتعب أكثر.

بلاش تركز مع رأى الناس في تصرفاتك

ممكن ساعات تضطر تعمل تصرف او تاخد قرار وانت عارف ان الناس اللي حواليك كلهم هيعترضوا عليه او على الأقل هيكون ليهم تحفظات عليه، على الرغم من إنك متأكد ان ده هو التصرف الصح او القرار السليم، ودة ممكن يخليك تقلق او ترتبك من حالة الرفض او الاعتراض او المفاجأة اللي الناس هيتعرضوا ليها، بس متقلقش خالص لأن الناس ممكن تعترض او تعبر عن غضبها او تقول رأى مخالف لرأيك او ممكن حتى يبعدوا عنك لفترة، بس بعد شوية وقت كل ده بينتهى وبيفضل سلامك الداخلي تجاه تصرفاتك وقرارتك واقتناعك بيها.

ولازم متتصدمش لو اتواجهت بالرفض او بكلمات قاسية من افراد اسرتك او الناس اللي بتحبهم بعد قرار او تصرف قمت بيه عن قناعة لكن هما رافضينة، المهم إنك تكون دارس قرارك او تصرفك ومتأكد من صحته من وجهة نظرك، وهتلاقى بعد فترة الناس اللي كانت معترضة دي بتشكرك على تصرفك.

تصرفاتك الصح ممكن تعدى الناس اللي حواليك

بمعنى ان التصرف الصح اللي بتعمله او القرار الصح اللي بتاخدة ممكن يشجع الناس انها تعمل زيك، وحتى لو محصلش كدة فالمهم إنك تكون راضي عن قرارتك وتصرفاتك وإنك تكون قدوة يحتذى بيها.