البزرميط الدمـاغ

7 حاجات تخليك معاك فلوس أكتر

مراتك تقولك تعالى نخش نجيب لبن بس، تلاقيك خارج دافعلك 800 جنيه ولا حاجة، تيجى فاتورة الكهربا تدفع زيهم 3 مرات!
و كأنك بترمى فى بحر و مافيش اى تحسن للوضع المادى بأى شكل!

الاسعار بقت غالية، المواصلات بتحرق الفلوس، العربية عاوزة كل يوم تمون، مصاريف العيال بقت مهولة و الجنيه اتعوم و مبقتش ضامن تلاقى بكرة تاكل ولا لأ!

و علشان تلاقى حل فى وسط كل الضغط ده، ماقدمكش غير انك تتاجر فى المخدرات، او الاعضاء البشرية، او انك تعود نفسك على الكام حاجة دول:

1- الفيزا للطوارئ:

خلى فى جيبك فلوس كاش، لان الدماغ عادة بيترجم سحبة الفيزا على انها حاجة سهلة اى كان مقدار الفلوس اللى بتتاخد منها فهى فى الاول و الاخر “ورقة واحدة”، على عكس لما تعد الفلوس بأيدك، بتحس بإنك بتبذل عدد كبير منها.

2- متقللش مصاريفك:

اصرف طبيعى جدا، بس اوجد اكتر من مصدر دخل واحد علشان اللى بتصرفه يبقى اقل من اللى داخلك و تفضل فى نفس الحالة المادية اطول وقت ممكن، و دلوقتى بمهارات بسيطة جدا تقدر تشتغل م البيت و يبقالك دخل تانى (7 حاجات تجبلك فلوس و انت ف بيتك).

3- احسبها صح:

بعد ما تخلص اليوم اكتب انت صرفت كام فين، و اعمل لنفسك جدول شهرى بسيط كدة تعرف انت صرفت كام و داخلك كام و الفائض او العجز كام.
ده هيخليك تركز اكتر لما تيجى تصرف فى الحاجات الصغيرة اللى بتشوفها مش مهمة، لانك هتشوف قد ايه الحاجات الصغيرة دى بتفرق.

4- اعمل حساب توفير:

حساب توفير و كل شهر بعد ما تحسب مصاريفك لو لقيت فائض حتى او 100 جنيه حطه فى الحساب ده، بعد كام سنة هتلاقى نفسك معاك مبلغ محترم تقدر تستثمره، او حتى تجهز بيه بناتك!

5- اتبرع:

خصص مبلغ معين كل شهر لمساعدة حد محتاج، علشان هيرجعلك، اى خير عملته هيرجعلك، مش محتاجين نستخدم اسقاط دينى!

6- اتقل تاخد حاجة نضيفة:

لو عجابك اى حاجة بمبلغ كبير، اتقل عليها شهر، لو عدى شهر و لقيت نفسك لسه عاوز تشتريها اشتريها، بس غالبا لا هتلاقى نفسك مش عاوزها، و غالبا هتلاقى حاجات احسن و بجودة اعلى و تكنولوجيا احدث تبهرك اكتر.

7- سعر الحاجة بتعبك:

و انت واقف قدام محل و عاجبك تيشرت ب 400 جنيه، افتكر انت اشتغلت كام ساعة علشان تجيب التيشرت ده! غالبا هتلاقى نفسك بتتراجع عن الفكرة لان طلع عينك علشان تعمل ال400 جنيه دول! ولو حسيتهـم مش كتير اتوكل على الله.

فى الآخر، كل دى تحايلات على عقلك الباطن علشان يغير من منظوره للامور، و يعالج المعلومات اللى دخلاله بطريقة تساعدك تحسن من ظروف و تعدى الفترة الصعبة دى على خير، و زى ما بقول فى كل مقالة، علشان تتصرف صح، فا انت محتاج تفهم تصرفاتك دى بتصدر منك بناء على ايه من الاساس.

عن الكاتب

إنجي عادل

"ماذا سيكون العالم، اذا تحدثنا بقوة، لأناسِ تنصت بوعىِ، فى مكانِ مهيأ لهذا الغرض تحديداً".