5 أسباب رئيسية بتخلى العلاقات تفشل

الكلام عن موضوع العلاقات الفاشلة بقى كتير جدا الأيام دى ، ودى أكتر الأسباب اللى بتخلى علاقات كتيرة تفشل :

1-  قلة الثقة :

الثقة هي من أهم الحاجات اللى لازم تكون موجودة في أي علاقة سليمة ، وكل ما الثقة بتقل ده بيخلى العلاقة تنهار أسرع . علشان العلاقة تكون سوية لازم تثق في شريك حياتك حتى لو سمعت حاجة غريبة عنه ولازم متصدقش أي حاجة بتتقال لأنها جايز جدا تكون إشاعة  أو من حد عايز يوقع بينكو ، الحل هي أنك يبقى عندك الصبر الكفاية و تتناقش مع شريكة حياتك في أي موضوع سمعته ، لأن العلاقة اللى مفيهاش ثقة بيكون محكوم عليها بالفشل من قبل ما تبدأ .

2- عدم الاحترام والتقدير :

لازم يكون دايما في احترام متبادل بين الطرفين علشان العلاقة تنجح ،  كلنا نستحق الاحترام من شريك حياتنا ولازم نكون مدركين الموضوع ده كويس ، والاحترام دايما بيكون أهم حتى من الحب وهو اللى بيضمن أن العلاقة تكون مستمرة وقوية .

3- عدم  الأمانة :

الصدق والأمانة مش أقل في الأهمية من أي حاجة تانية ولازم تكون موجودة في العلاقات الإنسانية كلها مش بس العلاقات الرومانسية . سواء في الدراسة أو الشغل أو السياسة ، الصدق هو الأساس لأى مشروع أو هدف في الحياة . لو الاحترام والصدق مش موجودين في علاقتك مع شريك حياتك ، فالأكيد أن العلاقة هيكون نهايتها هو الفشل .

4- الكلمات القاسية والشكاوى المتكررة :

التجارب وضحت أن فشل علاقات كتيرة بيبدأ من الشكاوى الكتيرة والكلمات الجارحة والقاسية . لازم نخلى بالنا من كلامنا مع كل الناس مش بس مع شريك حياتنا . لكن الانتقاد المتكرر والاستهزاء والشكوى المستمرة  من العيوب والتركيز عليها سبب كافى أنها تدمر أي علاقة ، وبيكون نتيجتها عدم الاحترام والخيانة الزوجية أحيانا .

5- الخلافات والخناقات المستمرة :

عدم الاحترم والانتقاد والخيانة بيكون نتيجتها خناقات مستمرة واللى ممكن تطور في أحيانا للعنف الجسدى ، ولأن العنف مينفعش أبدا يكون جزء من التعامل مع شريك حياتك ، فالعلاقة من النوع ده  مش بيكون ليها مستقبل .

لو قدرنا نبعد عن كل النقط اللى فاتت هنتجنب انهيار العلاقة ، ولو في أي حاجة من النقط دى  موجودة في علاقتك ده وقت أنك تاخد خطوة وتشوف التغيرات اللى لازم تحصل .