البزرميط الدمـاغ

10 حاجات مش هاتحس إنك حُـر إلا لو اتخليت عنهـم

كلنا بنعيش الحياة كتحدى كبير مليان تنافس وصراع عشان يقربنا من الأحلام والأمال العالية اللى بيحطها أهلنا على كتفنا. و اللى بالتدريج بتكون أسلوب حياة فبتخلى البحث عن الكمال هو عدونا الوحيد. عشان نعيش حياة أحسن بدل ما نجرى ورا أننا نصلح مشكلنا ممكن نغير طريقة تفكرنا و ده هيصلح الأمور كلها من حولينا. لأن تفكيرنا هو اللى هيغير أفعالنا وهتلاقى المشاكل بتتحل لوحدها حرر عقلك وقلبك من الأفكارك اللى بتأخرك.

10 حاجات لو أتخليت هاتحرر عقلك

1-إنت مش كـامل (الكمال لله)

فكرة الكمال دى وهم أصلا مفيش حد فينا كامل عشان كدا بطل تضغط على أعصابك وتعذب نفسك فى السعى ورا الكمال. بلاش تبص لأفعالك على أن عمرها ما هتوصل لمستوى الكمال اللى فى خيالك. حاول تكون راضى عن نفسك كلنا بنغلط بس المهم أنك تحاول ممكن تنحج وساعات تتعلم فى الحالتين مش هتكون خسران أبدا.

وده عشان أى تجربة بتزود خبرتك فى الدنيا والأخطاء بتعلمنا أزاى نقدر نتخطاها فى المستقبل. بلاش تعذب نفسك باللوم والشك فى قدراتك.

2- إنت مش مشغـول طول الوقت

فكرة أنك تحول نفسك لروبوت مشغول طول الوقت مبيبطلش فكرة مرهقة جدا كلنا بنى أدمين محتاجين راحة وشحن لبطاريات جسمنا وعقلنا. عشان كدا لازم تستمتع بوقت راحتك بدون أى أحساس بالذنب الوقت الخاص مهم جدا. حاول تعمل حاجة بتحبها عشان تجدد نشاطك وترجع لروتين حياتك وشغلك بحيوية. بلاش تفكر فى وقت الراحة على إنه تقصير أو تضيع وقت وتلوم نفسك عليه لأنك بكدا هتضيع قيمته.

3- إنت مش قليل الأدب

على فكرة دى مش قلة أدب بس بجد قدر نفسك شوية يعنى خلى صوت عقلك الداخلى مؤدب بلاش توصف نفسك بحاجات وحشة عمال على بطال . يعنى لو كان الكلام ده بتقوله لأعز أصحابك كنت هتوصفه بكلام حلو ومتفائل يرضيه ويدفعه للأمام. طيب ليه لغتنا مع نفسنا بتكون تشاؤمية مهم أنك تقدر قدراتك وتأمن بنفسك و تعرف أن الدنيا عمرها ما بتيجى على طبق من فضة. أنت بتسعى و بتبذل أقصى جهدك و النتيجة ساعات مش بتكون زى ما أحنا عاوزنها بالظبط.

عشان كدا عامل نفسك زى ما تحب أن الناس تعاملك لأن ده هيخليك متفائل أكتر مهما كانت الدنيا مليانة صعاب.

4- إوعى تلوم نفسك على قرار

أهم حاجة لازم تبطلها هى دور الضحية وأنك تلوم الظروف أو الناس طول الوقت على مشاكلك. عشان كدا أنت مش صادق مع نفسك مينفعش نلوم الناس على ضياع الوقت ، الفلوس أو الفرص. لأن ضياع أى شئ من بين أديك بيكون نتيجة اختيارك لوحدك يعنى من الأخر أنت شريك فى الحكاية من الأول للأخر فليه عينك تشوف الخسارة بس؟!

ومتشوفش الأفعال والأختيارات اللى وصلتك للنتيجة دى الملامة بتضيع وقتك. عشان كدا مهم أنك تكون مسئول عن أختياراتك وأفعالك لأن المستقبل فى الغالب بيكون نتيجة لأفعالنا.

5- ماتحكمش على اللي حواليك

الحياة رحلة مهم أن كل واحد فينا يهتم بدوره فيها فبلاش تخسر جزء من حياتك فى الحكم على الناس وأنتقادهم. عشان كدا بلاش نشغل نفسنا بعيوب الناس من وجهة نظرنا لكن الأحسن أننا ننشغل بتطوير مفاهمنا عن نفسنا ونطور شخصيتنا.

6- إتخلـى عن التخمين

فى ناس بتقضى وقتها فى محاولة تخمين مشاعر اللى حوليها و أفكارهم فبلاش تعيش مع أفتراضات وأوهام. و طبعا ده وهم لأنك مهما خمنت و كتبت سيناريوهات فى خيالك عن أفكار الناس و مشاعرها عمرك ما هتقدر تتأكد. يعنى مثلا مش معنى أن حد عاملك وحش أنه بيكرهك بس ممكن يكون مر بيوم وحش أو دماغه مشغولة بحاجة مهمة.

7- إبعد عم المنافسة الفاضية

أبعد نفسك عن الغرق فى حرب المنافسة مع اللى حوليك ركز على قدراتك وأستغلها ونميها هى الوحيدة اللى ممكن توصلك لكل اللى بتحلم بيه. مش مهم الناس سبقتك لكن مهم أنت وصلت فين فى تحقيق أهدافك.

8- بلاش تعيش فـ بكرة

مينفعش نأجل السعادة لحد ما نوصل لتحقيق أهدافنا فى المستقبل السعادة مش هتستنى عيش اللحظة واليوم وأفرح بكل حاجة تمر على حياتك. الحاجات اللى ممكن تفرحك دلوقتى ممكن ما يكنش ليها نفس القيمة فى المستقبل فبلاش تأجل عيش اللحظة و أستمتع دلوقتى مش بعدين.

9- حاول ماتقلقش على بكرة

بلاش الحياة فى قلق من الدنيا و المستقبل خلى عندك إيمان أن الكون منظم بحكمة ربنا.
أه ممكن الدنيا ما تعطيناش الحاجة اللى عيزنها بس فى الغالب بتدينا الحاجة اللى محتاجنها وكمان فى الوقت المناسب.

لما تقلق طمن نفسك كله بيبان مع الوقت فبلش تضيع عمرك فى القلق.

10-رضا الناس؟ إنسـاه تماماً

السعى ورا رضا الناس عادة مرهقة جدا و بتخليك تنسى نفسك ورغباتك وتضغط على أعصابك. كمان متنتظرش من الناس أنها تحبك بالطريقة اللى أنت محتاجها وتشوفك وتهتم بيك زى ما أنت متخيل. مش هايحصل.

 حب نفسك مش دايما بيكون أنانية كمان ممكن تكفى روحك بأحتياجتها عن طريق قناعاتك وأفكارك. وبلاش تفضل تفكر فى شعور الناس بالصدمة من أفعالك ، قراراتك وكلامك. من الأخر خليك محور حياتك أستمتع بيها و عشها بجد من غير ندم ولا أعذار حرر عقلك و أفكار هتحل عقد كتير فى حياتك.

عن الكاتب

نهلة شعلان