12 حاجة لازم تعملها لو عايز تلتزم في الجيم

كلنا بنروح بحماس فى أول أسبوع فى الجيم أو نعاهد نفسنا أننا هننتظم فى التمارين كل يوم حتى لو فى البيت. طبعا ده فى أول أسبوع أو أتنين شوية بشوية تلاقى نفسك كسلت رغم النوايا الكويسة والرغبة أن جسمنا يكون دايما مشدود.

أزاى تخلى التمارين والجيم روتين حياة ؟!

شوية حماس ونصايح صغيرة هتساعدك تفضل على طريق الصحة و الرشاقة.

1- مرن نفسك بنفسك

الدافع لازم يكون من جواك أنك محتاج تحافظ على صحتك و شبابك
وده معناه أنك ممكن تتبع التمارين مع نفسك أو تمشى مع مدرب المهم تمرن نفسك على حب التمارين الرياضية.

حب أنك تكون إنسان رياضى و خلى دافع جواك عشان تقدر تستمر على طول.

2- أبدا بخطوات صغيرة

بلاش البداية الجامدة يعنى مينفعش أشيل أكبر وزن قبل ما تتمرن على الوزن الصغير.
لما بتجهد نفسك أوى ببداية صعبة و مرهقة بتزهق بسرعة و كمان ممكن تتصاب.
عشان كدا خدها ببساطة يعنى ممكن تبدأ تجرى لمدة 10 دقايق فى أول أسبوع.
لما تحس أن جسمك فك زود التحدى بس بالتدريج عشان تحب الممارسة.

3- الصبر مُهم

محدش بيوصل للنتيجة اللى محتاجها من أول يوم كل تمرينة محتاجة منك وقت ومداومة عشان توصل للهدف أو الشكل المظبوط.

4- التنوع شئ مهم

جرب مجموعة متنوعة من التمارين عشان يكون دايما عندك رغبة فى التجديد والأستمرار.

كمان تركز فى كل مجموعة على عضلات معينة و دلوقتى فى فيديوهات كتير أوى على النت كل واحد منها فى روتين لتمرين عضلات معينة ممكن تساعدك.

5- بلاش الضغط المفرط

أغلب الناس اللى بتبتدى تمارين بتقطع خلال أول سنة لأنهم بيكونوا ضغطوا على نفسهم زيادة عن اللزوم .

الأحسن أنك تحط لنفسك حدود خاصة بقدراتك عشان متزهقش وتفقد قوتك بسرعة.

6- الصحبة حلوة

عادى أنك تسيب الجيم بس مش سهل أنك تحلق لصحبك اللى بيروح معاك.
عشان كدا الدراسات بتقولك أن لما بيكون معاك صاحب يشجعك بتستمر أكتر فى الجيم.

7- ظبط وقتك صح

بلاش نتحجج بالوقت لأنك لو بجد عاوز تداوم على الشغل ممكن تلاقى الوقت.
يعنى لو بتتمرن 3 أيام فى الأسبوع لمدة ساعة ممكن تظبطها نهار أو ليل و اليوم .

كان ممكن تجرب تحتفظ بالأوزان فى البيت أو تعمل شوية عدات فى وقت فراغكأو قسم وقتك على اليوم 10 دقايق لتمرينة البطن و بعد شوية 10 لتمرينة الظهر و هكذا.

8- حولها لروتين حياة

يعنى لو حولت المواظبة على الرياضة لعادة ذى غسيل الأسنان ساعتها هتكون جزء من روتين حياتك.
مش هتقدر تستغنى عنه و هتواظي عليه من غير تفكير.

التفكير زي ما بيخليك توصل لحاجات، كمان هو اللي بيخليك تكسل، والفكرة هنا انك ماتفكرش. نفذ على طول.

9- بطل تلوم نفسك

يعنى لو بطلت لمدة أسبوع أو زوتها فى الحلويات والأكل شوية متفكرش فى اللى فات.
المهم تفكر فى دلوقتى و ترجع تواظب تانى بلاش تفضل تلوم نفسك المهم تكمل طريقك اللى أختارته.

10- خليك واقعى

يعنى لو هدفك انك تخس مستحيل تخس 10 كيلو فى أول أسبوع.
خليك واقعى و أختار أهداف ممكن تحققها بسهولة ذى أنك هتخس كام جرام فى الأسبوع.
أو هتزود مدة التمارين ربع ساعة المهم تكون حاجة ممكن تحققها.

11- سجل أنجازاتك

يعنى ممكن تنزل أبليكشن يساعدك أو حتى فى نوتة تسجل فيها أبتدت أزاى ووصلت فين؟
يعنى مثلا أنك أبتدت أول أسبوع تجرى 30 دقيقة ، رفعت وزن 20 كيلو و خسرت كذا جرام من وزنك.

12- الأحتفال و المكافأة

سواء كنت عاوز تخس أو تنحت عضلات بشكل معين كل ده محتاج وقت من التعب و التمارين.
طبعا بعد المجهود النتيجة بتكون فرحتها حلوة أوى و تستحق الأحتفال.
بخروجة حلوة مع أصحابك أو أشترى لنفسك هدية هدوم بمقاسك الجديد حاجة تخليك تستمر.

التمارين الرياضية مهمة جدا و عشان كدا حلو أننا نخليها أسلوب حياة.

أطول مدة واظبت فيها على الجيم كانت قد أ يه؟

اترك تعليق