مش هاينفع نختلف على إن السرقة سلوك سئ جداً .. بس لازم نحط في اعتبارنـا إن في حاجة إسمهـا هوس السرقة عند الأطفال وعشان كدا سلوكهم ممكن بيكون مجرد رد فعل للإضطراب ده. هوس السرقة هو اضطراب نفسي بيجبر الطفل على سلوك السرقة بغض النظر عن الغنى أو الفقر.

خدي بالك من حاجة: لما الأم تخبي الحلويات مثلاً من الطفل ويقلب البيت لحد ما يلاقيها هايحص ساعتهـا بسعادة كبيرة وانتصار. كأنه انتصر على الأم و أخدها بردوا و ده زى لذة السرقة بالظبط. والقصة ممكن جداً تنمــى عنده الهوس ده.

أيه  أسباب هوس السرقة عند الأطفال؟

1. السرقة الكيدية

و دى بيكون الهدف منها غيظ ساعات الطفل بيسرق حاجة من الكبار أو الصغيرين عشان يعاقبهم. و يحب أوى يتفرج على ضحيته و هو بيدور ومتغاظ و زعلان و ده بتكون نوع من العدوانية عند الطفل.

2. حب التملك

أحيانا بيكون كويس لو فضل فى حدود تكوين شخصية مستقلة و حبه الأشياء اللى ملكه. لكن لو دخل فى تملك اللى فى أيد غيره حتى لو كانت حاجات تافهة ذى أستيكة، براية أو قلم.

3. المغامرة

حب الاستطلاع ، المخاطرة وروح المغامرة ساعات تخلى الطفل يسرق. فممكن يستنى حارس الحديقة يمشى عشان يسرق شوية ورد.

4. منفعة شخصية

زى أنه يسرق فلوس عشان يأجر عجل أو يلعب فيديو جاميز . يعنى بيسرق عشان يحس أنه سعيد و ممكن يكون بيحاول يرضى حاجة ناقصة جواه. أياً كان هدفه المشكلة بتكبر لما يوصل لمرحلة أنه مش قادر يبطل يسرق و ميقدرش يمنع نفسه مهما حاول أنه يقوم بفعل السرقة.

من ضمن الحاجات اللي بتسبب هوس السرقة:

• مشاكل في التربية
  

المعاملة القاسية من الأب أو الأم والعقاب الزايد عن الطبيعى كمان الدلع الزيادة بتساعد الطفل يلجأ للعادات السيئة. كمان لو محدش علمه أنه يحترم و يفرق بين ممتلكاته الشخصية و ممتلكات الناس.

القدوة السيئة ليها دور مهم في ممارسة الطفل للسلوك ده. كمان سرقة الطفل في البيت فى الغالب الأهل بيعملوا نفسهم مش وخدين بالهم على أساس أن الحكاية صغيرة و مش ناقصة نكبرها. اننا ندارى على عمايل الطفل بتكون تشجيع ليه أنه يستمر مش حل. وأحيانا سوء تصرف الأم و الأب أو ضعف شخصية حد منهما.

• صاحب السوء

أن الطفل يكون له صاحب بيسرق أو مجموعة صحاب بينفذ أوامرهم عشان يرضيهم. كمان البيئة بتساعد لما الطفل بيعيش مع أطفال معندهاش احترام للملكية الشخصية.

هوس السرقة مشكلة ممكن تبقى موجودة عند المراهقين كمان..
وبغض النظر عن السبب اللى بيدفع الطفل ليه إلا أننا لو مستعجلناش العلاج ممكن الفكرة المسيطرة على عقله و بتقوله أسرق تتحول لعادة دائمة.

أهم 10 حاجات تخلينا نعرف نتعامل مع هوس السرقة:

1. لازم نحترم ملكية الطفل عشان يحترم ملكية غيره.
2. نعوده يستأذن لو حب يأخد حاجة مش بتاعته و مهم أن ده يكون النظام بداية من البيت و معاملاته مع أخواته.
3. بلاش نفضحه لو أتمسك و هو سارق حاجة لكن مهم نخليه يحس بغلطته و نبدأ معالجة مشكلته بهدوء واتزان.
   عشان العنف ممكن يخلق منه سارقا حقيقيا.
4. زرع القيم الدينية حاجة أساسية و الأخلاقية في كل بيت بس بلاش أسلوب الوعظ العنيف لأننا محتاجينه يتقبل النصيحة.
5. عدم التمييز بين الأخوات عشان منخلقش جواه الطفل عنف و غضب يخلى يلجأ للعادات السيئة.
6. المال السايب يعلم السرقة  تى ولو كانت التربية سليمة بس وضع الفلوس مرمية فى البيت و فى كل مكان غلط. لازم تكون له حرمته ومهابته يعنى مينفعش يأخد من غير ما يستأذن و الأم أو الأب يعطواه اللى محتاجه.
7. بلاش وصف الطفل بصفات الحرامية ” أنت حرامى… أنت أيدك طويلة “، ولو هزار لأن ده ممكن يثبت الفكرة و الصورة السيئة عن نفسه.
8. مصروف الجيب فكرة كويسة للطفل كمان مهم أننا ، نعرف إنفاقه أزاى من غير ما نحسسه أننا بنراقبه.
9. إيجاد هوايات محببة لمئ وقت فراغه كمان نبعده عن الصاحب السئ.
10. ممنوع التهاون مع فعل السرقة مهما كان الموضوع صغير.

لأن الأمور الصغيرة تتطور و بتتحول لأمور خطيرة مع نموه الطفل العقلي. زي المثل ما بيقول ” اللى يسرق بيضة يسرق جمل “. وعشان كدا مهم جدا أننا نوعى ولادنا بالمشكلة و نبدأ العلاج بسرعة لأن الطفل بيكون أسهل يتغير و يستغنى عن السلوك ده. لكن كل ما يكبر الحكاية بتكون أصعب و أخطر فيا ريت نلحق ولادنا بدرى.