سمعت مرة صوت زعيق و دوشة خناقة كبيرة سببها  نوبات الغضب و العصبية عند الأطفال مشكلة كبيرة فى حياتنا  و صداع دائم فى دماغنا

كتير من أطفالنا بيعانوا من نوبات الغضب و العصبية و طبعا دى لها أسباب كتير نفسية و عضوية و ساعات وراثية .

يعنى ده طبعا لو الموضوع مش مجرد دلع زايد عن اللزوم و عشان تخلص منه لازم نعرف اسبابه المختلفة .

أسباب نفسية و تربوية

– الأطفال اللى عندهم مشكلة فى الكلام مبيقدروش يعبروا عن نفسهم فبتجلهم نوبات غضب .
– فقدان الطفل لحب العيلة و الأهتمام
– مشاكل التوحد و فرط الحركة
– الخوف و القلق فبيكون الغضب نوع من أنواع رد الفعل .
– الكبت انك تمنعه يعبر عن مشاعره و تجبره انه ميعيطش .
– النفقة فى معاناة الأدوات فى البيت
– الدلع الزايد و الأنانية اللى ساعات بنزرعها فى الطفل من غير ما يحس .

الأسباب العضوية

ممكن يكون فى حاجة بتوجعه و مش قادر يعبر عنها كمان ساعات نقص الفيتامينات بيزود العصبية أو ألام البطن و غيرها .

و طبعا دى تحتاج أنه ينعرض على دكتور أطفال الى هيساعده لو كانت المشكلة عضوية و كمان لو كانت نفسية هيوجهك للمختصين عشان تتأكد ان دا هو العلاج .

 ازاى الام تتعامل مع نوبة الغضب النفسية ؟

• تجنبى الظروف اللى بتوصله إلى نوبة الغضب و العصبية على قد ما تقدرى يعنى مثلا لو بيغضب لما يطلب منك مساعدة فى حاجة و تطنشى يبقى تساعديه من الأول أحسن .

• تعرفى انه طول نوبة الغضب بيكون مش قادر يستوعب الأسباب العقلانية يعنى مينفعش تتفاهمى معاه دلوقتى ،بالذات مع مريض التوحد و كمان ساعات مينفعش تلمسيه عشان تهديه لانه أصلا بيكون رافض ده .

• مترديش عليه بصراخ عشان عصبيته هتزيد و تزيد ،حاولي تحطى أعصابك فى تلاجه لانه كيد هيحرق دمك وممكن لما يبتدى يسكت يحس بالغضب فى صوتك فيبدأ من الأول .

• متخليش مكافئته وعقابه متوقف علي نوبة غضب ،يعنى النوبة عمرها ما هتخلينى اعملك اللى أنت عاوزه .

مش لازم تتحرجى من الناس و خليكى على نفس الموقف مع ابنك يعنى لو قولتيله مش هشترى لعب دلوقتى مهما صرخ و زعق وشبط خليكى على الموقف لان المهم ازاى تربيه ،مش اننا نرضى الناس .

” طفلك الغضبان محتاج دعم ”

بعد ما يهدى و يتخطى نوبة الغضب بيجى وقت الكلام عشان يفهم هو غلط فى ايه و يعرف أنك بتحبية و تطمنيه و تعرفيه غلطته و لازم توصليله المعلومة دى :

” إن اللى بيصرخ عمره ما بياخد اللى هو عايزه ”
” ماما مبتسمعش الصراخ و مش بتكلم اللى بيصرخ “

لازم نهدى ونفهم بعض و نتعلم ازاى لما نزعل نعبر بالكلام مش بالصريخ .

الأطفال زى الاسفنجة بيمتصوا كل حاجة حواليهم فياريت نهدى الجو و نبطل نتعصب عشان دا هينعكس عليهم وهيهدوا شوية