ليه بنكدب؟
ليه لازم نبطل كذب؟
كلنا بنكدب من وقت للتانى، حتى لو كدبات بسيطة، وده على الرغم من إن في أسباب وجيهة جدًا تخلينا نتمسك بالصدق في تصرفاتنا ونبطل نكدب أي كدبة حتى لو كانت كدبة صغيرة.
الكدب مش بس بيظهرنا في صورة وحشة، إنما ده كمان بيخلى الناس التانية تفقد ثقتها فينا.
كمان الكدب بيجر بعضه لأنك كتير هتلاقى نفسك مضطر تكدب تاني عشان كدبتك الأولانية ماتتفقسش!
ده غير إحساس الذنب اللي بتحس بيه نتيجة الكدب (ده لو عندك دم يعني) 😛
طيب تفتكر بعد كل العيوب دي للكدب ليه لسة بنكدب؟!!
إيه هي أهم الأسباب اللي الناس بتكدب عشانها؟
- بنكدب عشان نحمي نفسنا: سواء بنحمي نفسنا من إحراج أو صراع معين أو عواقب لأي حاجة عملناها.
- بنكدب عشان نوصل للي عايزينه: ممكن تكون حاجة مادية (زي الفلوس مثلا) او حاجة معنوية زي الاهتمام او لفت الانتباه لينا
- بنكدب عشان شكلنا يبقى أحسن: لأن كلنا عاوزين صورتنا تكون حلوة قدام الناس، ومش عاوزين حد يعرف عننا أي تصرف مخجل او حاجة مش كويسة عملنها، ودة في بعض الأحيان بيخلينا نكدب عشان منفقدش احترام الناس لينا.
- بنكدب عشان نهرب: ساعات بنكون مش عاوزين نهدر طاقة ولا نضيع وقت في جدال إحنا في غنى عنه. (يعنى مثلا عاوزين نهرب من خروجه مش على مزاجنا او من قعدة مع صديق ممل او من كلام عن شغل مش عاوزين نقول حاجة عنه).
- وبنكدب عشان منحرجش الناس: ساعات تلاقى شخص من أصدقائك ولا عيلتك يسألك عن رأيك في قصة شعرة الجديدة أو لبسة او أي حاجة تخصه، فتلاقى نفسك مضطر تكدب عشان متجرحش شعوره، ده غير ان الأطفال بقي بيكدبوا على والديهم أكثر مما نتخيل لأنهم بيعتقدروا ان اخبار والديهم بالحاجات اللى هما عاوزين يسمعوها هيخليهم أكثر سعادة وهيخليهم ينفذولهم اللى هما عاوزينه.
- فوق كل ده إحنا كتير بنفكر في الكدب على انه الملاذ الآمن اللي ممكن نفلت بيه من العقاب او نهرب بيه من أي موقف، على الرغم انه ممكن يكون ليه عواقب سلبية فيما بعد، وفى ناس بتشوف ان الكدب أحيانا بيكون تصرف صحيح لو كان الغرض منة منع الأذى زي مثلا انك تقول لمراتك اد اية هي حلوة انهاردة، أو انك تستر على شخص من فضيحة، أو الكذبة البيضا بشكل عام.
إيه هي الكذبة البيضا؟
الكذبة البيضا هي الكذبة اللي الهدف منها خير ولا يُمكن تحقيق الخير ده إلا بالكذب. على سبيل المثال: الصُلح بين اتنين متجوزين مثلًا “أكيد مكنش يقصد ده تلاقيه كان متعصب بس”، المُجاملات “مبسوط إني شُفتك”، أو كدبة من غيرها هاتضطر تسيح لنفسك في حاجات شخصية، وهكذا..
وفى النهاية وبعيداً عن الأسباب اللي قولناها فوق واللي ممكن تدفعنا للكدب (بصرف النظر عن محاولة منع حدوث ضرر) فالحياة بدون كدب هتخلينا نعيش حياة أكثر هدوء وسلام لأننا مش خايفين من انكشاف الكدبة، ومع الوقت هيبقى معروف عنك الصدق والأمانة في كل كلمة بتقولها.
