ليه الناس بتكدب؟ 9 أسباب!

مفيش حد مبيكدبش، بس فيه ناس بتكدب عشان عندها دوافع للكدب ده وناس بتكدب عشان بتكدب وخلاص (الكدب ف دمها زي مابنقول). ولو الناس كدبت فالإحصائيات وأرقامها مبتكدبش، وتبعًا للإحصائيات دي فالناس غالبًا بتكدب لسبب أو أكتر من ٩ أسباب.

 أسباب الكدب التسعة:

تجنُّبًا للعقاب

أكبر سبب جاوب بيه الناس لما اتسألوا ليه بتتكدبوا إنهم كانوا خايفين من عقاب أو عاقبة حاجة مُعينة وكان المَخرج الوحيد وقتها إنهم يكدبوا عشان يفلتوا من العقاب ده.

المُكافأة أو الوظيفة

أغلب الناس لما بتيجي تقدّم على وظيفة بتقول إنها اشتغلت في المكان الفُلاني وأخدت كورسات معينة وكل ده محصلش عشان بس ياخدوا الوظيفة دي، أو الأطفال مثلا لما بيكدبوا عشان أهاليهم يكافئوهم.

حماية حد من العقاب

وده بيحصل بين الإخوات وزمايل العمل عشان يحموا بعض من أثر غلطة حصلت وهيكون ليها عقاب كبير، فبيكون بدافع الخوف مش أكتر.

الحماية من الأذى الجسدي

وده مختلف عن حماية نفسك أو غيرك من العقاب، زي مثلًا إن طفل يكون لوحده في البيت ولما حد يخبط عليه يقول إنه باباه نايم أو أيًا كان عشان محدش يتعرضله بأذى.

عشان تِعجب

ودي غالبا بداية أي علاقة جديدة بيكون فيها شوية قصص عبارة عن كدبة بيضة من أجل تحسين المظهر العام يعني.

الخروج من موقف اجتماعي مُحرج

زي التجمعات المفاجئة أو التقيلة أو المشاوير الصعبة فبتهرب منها إن وراك شغل في البيت أو إنك لازم تودي الاولاد التمرين عشان تنفد بجلدك من التدبيسة دي.

تجنَّبًا للإحراج

ودي بيقع فيها أكتر الأولاد الصغيرين لما بيحصلهم حاجة خارجة عن إرادتهم ومش عارفين يدافعوا عن نفسهم ومُحرجين اصلا من اللي حصل، زي لو طفل مثلا بيعاني من التبول الا إرادي هيقول إن المياه اتدلقت مكانه ومش هو اللي عمل كدة لإنه مُحرج وخايف.

الحفاظ على الخصوصية

للأسف الناس بتتدخل في حياة كل الناس بطريقة تضايق كل الناس، هتتجوزوا امتى؟، هتخلفوا امتى؟، الفرح فين؟،

وعشان تتجنب تحرج ناس كبيرة وعاملة نفسها عايزة تتطمن عليك بتضطر تكدب عشان تحافظ على حياتك الشخصية.

التسلّط

وهتلر كان أكبر مِثال على كدة وده أكبر دافع من دوافع الكدب على الإطلاق.

وبصراحة بقى عشان منكدبش عليك هما مش ٩ أسباب بس للكدب ولكنها أرجح وأقوى أسباب، بس اللي عايزين ننبهك ليه إن على وشك يبان يا ندّاغ اللبان وده لإن اللي بيكدب بيبان عليه الحاجة اللي عايزك انت تصدقها والحاجة اللي عايز هو يخفيها فانت ممكن تقفش الموضوع بسهولة يا معلم وساعتها من حقك تقرر تبلع الكدبة لإن ليها سبب ولا متعديش.