ليه المفروض مانكدبش؟
نقدر نعرّف الصدق بأنه قول الحقيقة وتجنب أي كذب أو خداع سواء بقصد او بدون قصد، ومجالات الفلسفة وعلم النفس اهتمت بدراسة وتعريف الصدق، والمقال دة هيفهمنا تفاصيل أكثر العلاقة بين الصدق والصحة النفسية.
مفهوم الصدق
في ناس كثيرة بتشوف ان الصدق هو إنك تقول الحقيقة، لكن في الواقع مفهوم الصدق أعمق وأكبر من كدة بكثير، ولكن تعريفات الناس غالبا بتكون تعريفات شخصية متأثرة الى حد كبير بتجاربهم ووجهات نظرهم وميولهم، واللي بينطبق على شخص مش بالضرورة يكون منطبق على شخص تانى.
وفى ناس بتشوف ان الصدق هو إنك تقول بصدق كل المعلومات اللي تعرفها، لكن في ناس تانية تشوف ان حجب بعض المعلومات بيكون أفضل من الناحية الأخلاقية، يعنى ممكن شخص يطلب رأيك في موضوع معين فانت تشوف إنك لازم تقول رأيك بصراحة حتى لو كان الشخص ده ممكن يضايق من كلامك، لكن على العكس ممكن شخص تانى يشوف إنك لازم تتحفظ في رأيك وفى المعلومات اللي بتقولها عشان متاذيش مشاعر الشخص اللي قدامك ومتعرضوش لأي احراج او مشاعر سلبية.
الفلاسفة في مختلف العصور درسوا موضوع الصدق، لكنهم موصلوش لإجابات واضحة، لأن كل شخص بيتعامل مع الصدق بحسب قانونه الأخلاقي وبيحدد امتى الوقت المناسب انه يكون صادق تماما وامتى الوقت المناسب لحجب شوية معلومات وتجنب الحقيقة الكاملة.
أضرار الكذب
الناس ممكن تلجأ للكذب لأسباب مختلفة-زي مثلا حماية الآخرين-حماية أنفسهم-لتحقيق فائدة ما-بغض النظر عن الدافع وراء الكذب، لكنه ممكن يكون ليه عواقب سلبية خطيرة، حتى وان كان الشخص عنده نوايا حسنة وراء كذبه، وممكن الكذب يتسبب في انعدام الثقة بين الناس، ومشاكل في العلاقات الشخصية، وتشويه السمعة ومشاكل مهنية، ده غير مشاكل تانية كثيرة.
والكذب في كثير من الأحيان ممكن يكون مُعدي، ويتحول من مجرد سلوك لعادة وقاعدة، وبدل ما يكون شخص واحد هو اللي بيكذب تلاقى عدد كبير من الناس أصبحوا بيعتمدوا على الخداع والكذب بطريقة غير أخلاقية.
الصدق والصحة النفسية
إنك تكذب على الناس دي اكيد حاجة هتدمر علاقتك بيهم، لكن المصيبة الأكبر إنك تكذب على نفسك، وفى ناس كثيرة مش سهل عليهم انهم يكونوا صادقين مع نفسهم، لأنهم مش قادرين يعترفوا بعيوبهم.
وفى كثير من الأحيان لما الشخص بيكذب عشان يوصل لهدف معين (زي مثلا اللي بيغش في الامتحان عشان يجيب درجة عالية) بينسى انه غشاش وبيجيلة غرور وبيبالغ في تقديراته للمستقبل، وكأن الكذب بيمنح شعور زائف بالأمان، وزى ما بيقولوا الكذب بيجر كذب، وغالبا الشخص الكذاب بيضطر انه يكذب أكاذيب متتالية عشان كذبته الأول متتفضحش، وبالتالي بيدخل في سلسلة متواصلة من الكذب، وعلى الرغم من ان التعامل بأمانة حاجة مش سهلة أبدا في الزمن اللى احنا فيه دلوقتى، لكنها في كل الأحوال اريح وأفضل من الكذب.
هل ممكن الناس يصبحوا أكثر صدقا؟
طبيعي ان كلنا كذبنا قبل كدة حتى لو كان كذب ابيض زي ما بيقولوا، المشكلة لما الكذب بيتحول عند بعض الناس لعادة مش قادرين يبطلوها، لكن في حاجات مهمة لازم نراعيها لو كنا عاوزين نكون صادقين دايما، وأهم حاجة فيهم هي الاعتراف بالمواقف اللي ممكن تدفعهم للكذب، وتجنب المواقف اللي ممكن تدفعهم للكذب، ولو الموضوع كان صعب جدا ممكن الاستعانة بمعالج نفسي لأنه بيكون عنده القدرة على المساعدة في العلاج من العادة دي وعنده قدرة كمان على الفهم العميق للشخصيات دون ادانة او انتقاد.
