11 علامة تأكدلك انك في علاقة شغل Toxic لو لسة شاكك يعني
في حاجات اساسية لما تلاقيها بتحصل فى شغلك اعرف إنك في علاقة سامة او مؤذية او زى ما بيقولوا كدة علاقة toxic، وخلى بالك ان استمرار علاقتك مع الاطراف المؤذية في علاقة الشغل هيخليك تحس دايما إنك في حالة استنزاف لطاقتك وذهنك ومشاعرك وحتى فلوسك، وهتلاقى نفسك دايما بتبذل مجهود جبار عشان بس تحس إنك كويس، والناس المؤذية او الtoxic ممكن يكونوا موجودين حواليك في أي مكان، ممكن مثلا رئيسك في الشغل او زميلك او شريكك، المهم انك تعرف تتعامل معاهم ازاى.
السلوكيات اللى بتأكد انك في علاقة شغل toxic
- رغى كتير وملاحظات تضايق هتتقال عنك او عن الناس القريبة منك.
- انتقاد مستمر ممكن يوصل لانتقاد نظافتك وترتيبك وحتى اصدقائك وانجازاتك، المهم إنك تكون دايما غلطان ومقصر.
- التقليل من رأيك وتحقير افكارك
- رفع سقف التوقعات والطلبات، عشان تحس إنك مبتعرفش تنجز ولا تعمل أي حاجة كويس.
- كتر النقد والتقليل من افكارك ده هيخليك تحس بإحباط وفشل.
- مفيش مصداقية.
- غيرة.
- هتلاقى مديرك بيصدر دايما احساس بعدم الاحتياج ليك، او بمعنى اصح إنك ملكش لازمة في الشغل.
- السخرية من افكارك وخاصة لو قدام الناس.
- اللوم المستمر في كل مشكلة، حتى لو كانوا هما وقرارتهم الغلط هي سبب المشكلة.
- الشكوى المستمرة والقاء اللوم عليك.
كل الحاجات دي وممكن حاجات تانية اكتر تكون السلوكيات اللي بتبين إنك متدبس في علاقة شغل toxic، وأهم حاجة هتخليك تتأكد من الموضوع ده إنك هتكون دايما متضايق وحاسس إنك مش مرتاح، اقرأ مقالة ازاى تتعامل مع الضغط النفسى فى الشغل هتسعدك كتير.
الشخص المؤذي في العلاقة ال toxic دايما بيكون مش راضي عن نفسة ولا عن حياته ودايما شايف ان نجاح الطرف الثاني دليل على فشلة هو، وبيقلق جدا لو شاف حد كويس وبيحس بالتهديد وبيدور على أي طريقة يهدى نفسة بيها ويبعد عن القلق ده.
وغالبا الطريقة اللي بتساعدة انه يهدى ويقلل الضغط العصبي اللي هو فيه، انه يقلل من نجاح وإنجاز وأحلام واهداف الشخص اللي قدامة، وبالتالي لو استمريت مع الشخص الtoxic في علاقة الشغل دى هتلاقى احساسك بقيمتك وقدراتك بتموت وتقل تدريجيا، خاصة لو اديتلة الفرصة وصدقت الكلام اللي بيقوله عنك، عشان كدة لازم نعرف ازاى نتعامل مع نوبات الهلع والقلق والتوتر في الشغل، اقرأ النصائح الجاية عشان تعرف أزاي تتخلص من العلاقة ال toxic في شغلك.
نصايح تساعدك تخلص من العلاقة الtoxic
احنا عارفين قد ايه الحياة بتكون صعبة لو حواليك ناس toxic ومؤذية خاصة لو في شغلك، بس لحسن الحظ انت تقدر تساعد نفسك وتتخلص من العلاقات السامة دي، والنصايح الجاية هتساعدك على كدة:
- اعمل قائمة فيها الحاجات الإيجابية اللى موجودة في الشخص الtoxic اللى قدامك، ودة هيساعدك انك تحول انتباهك من الجوانب السلبية في شخصيته، لو نجحت في كدة هتقدر تعمل إعادة تأهيل للشخص الtoxic في حياتك.
- اتعامل مع شخص محايد، يفضل الشخص دة ميكونش ليه مصلحة معاك او مع الشخص التانى، وممكن الشخص ده يكون مستشار نفسي او life coach، أو جارك او زميلك في الشغل، الهدف من الموضوع ده مش إنك تطلع نفسك ضحية او تدور على حد يتعاطف معاك ويطلع الطرف التانى غلطان، مش ده ابدا الهدف، الهدف الصح هو إنك تلاقى حد يساعدك تشوف الموضوع على حقيقته وتشوف دورك بوضوح وتعرف الحاجات اللي المفروض عليك تعملها.
- اتحمل المسئولية، وخليك عارف ان جزء كبير من اللي بيحصل في العلاقة دي انت المسئول عنة، وانت اللي سمحت لحاجات كتير منه انها تحصل، حاسب نفسك الأول.
- حط الحدود المناسبة ليك، بمعنى إنك تعرف الطرف الثاني اية اللي انت بتسمح بيه او بترفضة في علاقة الشغل بينكم، ولازم يكون عندك المهارات الى تخليك تحدد بالضبط تطلعاتك للمستقبل والحاجات المطلوبة من الطرف الثاني.
- اشتغل على نفسك اكتر، طور طريقة تفكيرك وقدراتك العاطفية، حاول تقرأ كتب بتناقش الموضوع عشان تطور رؤيتك للموقف.
- أنهي علاقة الشغل المؤذية ليك، لو جربت كل الطرق وعملت بالنصايح اللي فاتت ومحستش بأي تغيير، الأفضل ليك إنك تنهى علاقة الشغل دى، وتشوف شغل احسن فى مكان تانى.
أكيد أنك تسيب شغلك دي حاجة مش سهلة ابدا، بس لو كانت العلاقة في شغلك بينك وبين مديرك علاقة TOXIC وانت تعبان فيها جدا، وحاولت بكل الطرق إنك تصلح العلاقة دي ومقدرتش، يبقى لازم تسأل نفسك اية الأهم عندك تستمر في شغلك تحت الضغط النفسي والعصبي ده ولا تسيب الشغل ده وتروح شغل تانى وتختار اعصابك ونفسيتك، عشان ميحصلكش اكتئاب بسبب الشغل، أكيد لما تكبر وتوصل لسن السبعين مش هتكون مبسوط إنك فضلت تضغط على اعصابك عشان خاطر الفلوس، العمر بيجرى بسرعة، خليك مع الناس اللي هترفعك وتطلعك لقدام.
