عايز فلوس بس إيدك مخرومة؟ خليني أقولك الحل!
لو حاسس انك مسرف وايدك مخرومة زى ما بيقولوا ومش قادر تمسك نفسك من الشراء وصرف الفلوس، يبقى لازم تقرأ الكلام الجاى، خاصة واننا في أوقات كتير بنحس اننا مسرفين وبنصرف فلوس كتير اوى من غير داعى.
يعنى مثلا في دراسات اكدت ان الامريكان في الكام شهر اللى فاتوا دول صرفوا فلوس كتير جدا على الشوبينج اعلى من المعدلات المعتادة، خاصة بعد تخفيف العزل والقيود الوبائية نتيجة الكورونا، وكأن الناس حست أخيرا انها قادرة تخرج وتعمل شوبنج وتتفسح بعد سنة ونص من الحبسة في البيت، وعشان تقدر تبطل مصاريف زيادة وتحافظ على ميزانيتك هنساعدك ونقولك شوية علامات تأكد لك اذا كنت بتعانى من مشكلة الاسراف فعلا ولا لأ وازاى تقدر تحل المشكلة دي.
العلامات اللي هتأكدلك انت مسرف ولا لأ
- الديون بتتراكم عليك
من اهم العلامات الى ممكن تتأكد منها بدرى بدرى كدة انك عندك مشكلة الاسراف هي ان الديون بتتراكم عليك، وخاصة الديون اللى بفوائد عالية زى الكريديت كارد او البطاقات الائتمانية، يعنى لو لقيت نفسك آخر الشهر مش قادر تسد دفعة كبيرة من الكريديت كارد او حتى تدفع الحد الأدنى عشان ميتحسبش عليك فوائد، اعرف انك ف مشكلة لازم تاخد بالك منها عشان متراكمش الديون والفوائد عليك، وبالفعل حصلت قفزة كبيرة في مديونية الكريديت كارد لأغلب الناس بعد انتهاء القيود الاحترازية وقت الكورونا لان اغلب الناس خرجت بعد حبسة وقت طويل محتاجة تتفسح وتعمل شوبنج، المهم دلوقتى انك تراقب نفسك لو الزيادة دي شهر واحد بس مش مشكلة، لكن المهم متكونش كل شهر.
- درجتك الائتمانية تنخفض فجأة
لو الدرجة الائتمانية بتاعتك في البنك او ال score انخفضت فجأة لازم تقلق لأن ده معناه ان مصاريفك اكتر من امكانياتك، لأن الاستخدام الائتمانى هو الحاجة الأساسية اللى بيتحسب عليها درجتك الائتمانية، وكل ما بيرتفع الاستخدام الائتماني بتقل درجتك الائتمانية، يعنى لو استخدمت الكريديت كارد في مصاريف السفر والفسح وشراء الهدوم والمطاعم من غير ما تسد، طبيعي ان تلاقى رصيدك الائتماني انخفض.
- بتشترى اى حاجة نفسك فيها
بعد ما قضينا اكتر من سنة ونص في البيت خلال فترة الحجر الصحي، طلعنا كلنا عاوزين نعمل شوبنج ونجيب الحاجات اللى نفسنا فيها، بس في ناس كتير بيكون عندهم الموضوع اوفر شوية لان صرف الفلوس بيحسسهم انهم سعداء وبيزود عندهم إحساس القبول وبيخليهم يواكبوا الحياة.
- مش قادر تحدد ميزانيك أو تقلل من مصاريفك
أكيد بعد وباء الكورونا كل حاجة بقت أغلى من قبل كدة بسبب التضخم والمشاكل الاقتصادية، عشان كدة زيادة مصاريفك في الوقت ده مش هيكون قرار حكيم منك أبدا.
لو لقيت صرفك للفلوس خرج عن السيطرة، او تحاول تحط لنفسك ميزانية انما لو مقدرتش تلتزم بيها، فدى إشارة ليك لازم تخليك تقلق وتفكر وكمان تتأكد انك ممكن تكون مسرف بزيادة، خاصة لو كنت بتكسب فلوس كتير وكلها بتطير منك ومش عارف الفلوس بتتصرف أزاي، فدة دليل أقوى على ان ايدك مخرومة.
الحل؟ حاول تصرف بالعقل
خبراء المال بينصحوا انك لازم تعرف كويس تفاصيل صرفك للفلوس، واية الرغبة او العاطفة الى بتدفعك للشراء، يعنى مثلا لو كنت عادة بتستخدم الكريديت كارد في مصاريفك لازم تقعد قعدة هادية كدة مع نفسك وتراجع حسابك البنكي وتشوف صرفت فلوس على اية خلال الكام شهر اللي فاتوا. وإيه الحاجات اللي انت مقتنع فعلا انك كان لازم تجيبها وايه هي الحاجات اللي كان ملهاش لازمة؟
وممكن كمان تقارن مصاريفك قبل الكورونا بمصاريفك بعد الكورونا وتصحح مسارك لو احتجت لدة، لو بعد ما عملت كل الحاجات دي حسيت برضة انك بتصرف كتير ومش قادر تسيطر على نفسك، ممكن تطلب المساعدة من معالج نفسى او شخص متخصص في الأمور المالية وهو هيقدر يساعدك بأفضل طريقة، انت كمان لازم تمرن نفسك انك تفكر شوية قبل ما تشترى أي حاجة وتشوف انت فعلا محتاج الحاجة دى ولا لأ، والدراسات أكدت بالفعل ان اى حاجة بنعملها ليها سبب نفسى او عاطفي.
