عايز فلوس؟ تعال أقولك ازاي تعمل فلوس من مُرتبك

لو خايف من سِعر الدولار وتعويم الجنيه ومش عارف تُظبط الميزانية إزاي هنظبطهالك بقاعدة ال”٥٠/٣٠/٢٠”،  ودي قاعدة اقتصادية انتشرت في مجال البيزنس من فترة كبيرة واسمها “قاعدة الميزانية”، القاعدة دي اتعملت من أجل ترتيب أولويات المُرتب لانقاذ اصحاب الطبقة المتوسطة ومُساعدتهم في استغلال مُرتبهم المتوسط أو الكبير نسبيًا ولكنها مبتتضمنش مُساعدة لمحدودي الدخل أو أصحاب المرتبات القليلة لإن المرتب للأسف كله رايح على الأساسيات.

وبتعتمد القاعدة دي على تقسيم الدخل لـ ٥٠% للإحتياجات الاساسية و٣٠% للرفاهيات و٢٠% للمُدخرات أو الاستثمار، ودي قاعدة بتساعدك إزاي تحدد أولوياتك وتعرف تحوش شوية أو عالأقل تواكِب التغيرات الي بتحصل في الأسعار.

ازاي تستخدم قاعدة الـ٥٠/٣٠/٢٠ عشان يبقى معك فلوس

الاحتياجات الأساسية ٥٠%

أول ما تِقبض المُرتب لازم تبتدي تحسب احتياجاتك”الضرورية” زي فواتير المياه والكهرباء والإيجار وأكل البيت والقسط الشهري وفلوس الجمعية وكُل حاجة انت مينفعش تأخرها أو تكمّل الشهر من غيرها.

وعشان الجُزء ده من القاعدة ينجح معاك لازم احتياجتك تكون نُص المُرتّب بالظبط أو أقل. عشان كدة لو لقيت إن تكلفة احتياجاتك زادت عن نُص مُرتبك يبقى لازم تِراجع نفسك وتشوف مثلًا استهلاك الكهربا والمياه والغاز عالي كدة ليه وتقلل الدليفري واستهلاك البنزين باستخدامك للعربية في مشاوير قُريبة بحيث إنك توصّل مصاريف الاحتياجات دي للمبلغ المطلوب وتقدر تكمل باقي القاعدة.

الرفاهيات ٣٠%

دلوقتي بحسب نجاح الجُزء الأول من القاعدة دي بقى فاضِل معاك ٥٠% من مُرتبك، وبكِدة تيجي للمرحلة المُمتعة نسبيًا واللي فيها بتشوف نفسك بعد ما بتِخلص من هم الضرايب والتأمينات والإقساط، بس برضو انت متأيد بمبلغ مُعين، فتقدر تشتري الساعة اللي انت عايزاها أو تجدد اشتراك قنوات الرياضة اللي بتعرض الماتشات المُشفرّة، وتحدد هتقدر تتعشى كام مرة في مطعمك المُفضل بس المُهم في الحِسبة دي بالذات إنك متسيبش نفسك لرغباتك لإنك مش هتقدر تسيطر على نفسك ونجاحك في المرحلة دي بيساوي نجاحك في تنفيذ القاعدة لإنك عديت أكبر وأصعب جُزئين فيها.

المُدخرّات والاستثمار ٢٠%

عُلماء الاقتصاد دايمًا بيأكدوا على نصيحة وجود احتياطي لمُدة ٣ شهور على الأقل، وفي وضع زي اللي بتمُر بيه كُل البلاد دلوقتي فدي النصيحة الأهم عشان متقلقش من تغيير اسعار العُملات وتغيُر المُرتبات وهكذا، وعشان كدة انت لازم من كُل شهر تشيل من مُرتبك حوالي ٢٠% عشان تتجنب ضغط وقلق إنك تسيب وظيفتك أو إن الأسعار تغلى تاني، فلو قدرت تعمل كدة هتقدر تواجه السوق المالي وتغيراته بكُل سهولة ولو الأسعار ثبتت ومفيش حاجة اتغيرت هتلاقي إن الفلوس اللي شيلتها دي بقت قادرة تحققلك حِلم في المُستقبل، عشان كدة في كُل الحالات انت محتاج تشيل الجُزء ده من المُرتب وبكدة تكون نفذت القاعدة كُلها صح.

إحنا جايين الحياة عشان حاجات كتير من ضِمنها إننا نشتغل مش جايين نشتغل وبس ونعيش في دايرة من القلق على الفلوس واللي هيحصل بُكرة، وعشان نعرف نعيش كويسين ومنخليش القلق ياكُل فينا لازم نِمشي بخطة مدروسة تضمن حياة كويسة في الوقت اللي بتشتغل فيه والوقت اللي مبتشغلش فيه وفي كُل وقت.

١٤طريقة تقلل بيهم مصاريفك وتحوش فلوس

راقب مصاريفك

لما بتعمل ريجيم اول حاجة بتعملها انك تحسب سعراتك الحرارية وتراقب انت بتاكل ايه، ودا بيخليك تعرف لو كنت بتاكل كتير او قليل، والعملية دي بتخليك تهتم اكتر للي بتعمله، بنفس الطريقة تحاول تراقب مصاريفك، لو متعرفش انت فلوسك رايحة فين ممكن تكتشف انك صرفت مئات ومش بعيد الاف على حاجات ملهاش لازمة أو مش هتفرق في احتياجاتك الأساسية

لما تراقب نفقاتك هتعرف المشكلة فين، وهتقدر تفكر صح اذا كنت محتاج تشتري أو لا، والأفضل انك تسجل مصاريفك في دفتر ملاحظات أو جدول بيانات على اكسل أو في ابليكيشن.

اعمل ميزانية

طبعا انك تعيش على ميزانية محددة مش حياة الرفاهية اللي كلنا بنحلم بيها، بس استخدام الميزانية عشان تمسك ايدك عن المصاريف بيحطلك حدود كويسة، لو مش عارف بالظبط ايه الميزانية اللي تناسبك ممكن تتبع قاعدة 50-30-20، انك تستخدم 50% من دخلك لاحتياجاتك الأساسية، 30% لرغباتك سواء هواية أو سفر أو خروج، و 20% للادخار.

اصرف كاش بس!

تقدر تكتب على الورق كل الميزانيات اللي تعجبك، لكن لو ملتزمتش بيها هتبقى امنيات، فا جرب تخلي كل مصاريفك كاش لفترة ومتستخدمش بطاقاتك الإئتمانية، لما بتصرف فلوس بايدك وتشوفها فا مخك بيبدأ يستوعب انها فلوس بحق وحقيقي مش مال سايب، تلقائيا هتصرف على قد احتياجاتك.

طريقة الظرف الطارئ

إنك تعمل ظرف لكل فئة من مصاريفك هيساعد انك متجيش جمب الظروف التانية اللي مخليها للطوارئ وانت بتصرف.

تجميد الكريديت كارد

لو مش بتقدر تتجنب استخدام بطاقاتك يبقى حاول تجمدهم فترة، وقتها هتكون مضطر تستنى الفترة دي لحد ما تعدي ودا هيديك مساحة تكون واعى بمصاريفك الفعلية خلال يومك.

أكواد الخصومات وقسايم الشراء

طالما في حاجات مضطر تشتريها، يبقى لازم تضمن أقل تكلفة، حاول دايما تستخدم القسائم أو تدور على رموز واكواد الخصم، يعني لو هتركب اوبر او سويفل يبقى اركب باكواد خصم، لو هتشتري أجهزة كهربائية يبقى بقسايم الشراء.

بلاش شوبينج وانت جعان

الباحثين لقوا ان اللي بيتسوقوا وهما جعانين بيصرفوا 60% من الفاتورة على المنتجات الغذائية.

اكتب في ورقة اللي هتشتريه

على حسب القائمة اللي هتكتبها هتشتري لا تزود ولا تنقص جيب اللي انت محتاجه بس، دا غير ان الاستراتيجية هتوفر كتير من وقتك خلال التسوق.

الغي اشتراكاتك في العروض الالكترونية

لو انت زيي بتحب توصلك العروض والمنتجات الجديدة اول بأول على بريدك الالكتروني أو على منصات التواصل الاجتماعي حاول تعمل الغاء اشتراك أو تعمل عدم متابعة للعروض دي، العروض دي بتنجح مع الناس لانها بتخلقلهم احتياج جديد، مع انها منتجات رفاهية من غيرها هتعيش عادي بس طريقة عرضهم ليها بتحسسك انك محتاجها جدا.

بص على مجموع التكلفة

بمعني لما تشتري ماكينة صنع قهوة فا انت مش بتدفع تمن الماكينة بس، انت لسه محتاج تجيب القهوة وتجيبلها فناجين، أو لو عربية انت مش بس بتدفع تمن العربية، دا لازم يكون في فلوس للصيانة وفلوس لقطع الغيار والبطارية والبنزين، لما تحسبها احسبها كاملة.

حُط حدود لمصاريفك شهريا

إنك تحط رقم معين مش هتتخطاه شهريا بيخليك تفكر اكتر في الاختيارات المتاحة قدامك وانت بتنفق فلوسك، ولو تقدر تحط الحد دا يوميا مش بس شهريا يكون أفضل.

خطط لخروجات ببلاش!

في قناة بتعمل فيديوز اسمها “شد الحبل” بتقولك ازاي تخرج وتتبسط بأقل تكلفة، وان مش معني انك بتوفر وبتقلل مصاريفك يبقى متتبسطش ومتخرجش، ابسط حاجة ممكن تتمشي على الكورنيش أو تروح المول تلف وتتمشي مع صحابك.

حوش مع صاحبك

لو شايف انه ضغط عليك انك تقلل مصاريفك وتبدأ تدخر، قول لصاحبك خطتك دي وممكن تدعموا بعض وتتسابقوا في ازاي تدخروا اكبر مبلغ، خصوصا لو هدفكم واحد سواء تحطوا فلوسكم في حساب بنكي أو حساب إدخار أو تشتروا حاجة معينة زي لابتوب للشغل أو غيره.

اختار أيام متصرفش فيها نهائيا

أيام زي الاجازات والعطلات الرسمية لو مش هتخرج فيهم أو هتنزل تتمشى بس، حاول متصرفش نهائي وتاكل في البيت وتتفرج على فيلم وتقضي اليوم بدون مصاريف هتلاقي ان يوم زي دا كل أسبوع هيفرق معاك اخر الشهر!