٥ خطوات تساعدي بيهم صاحبتك الـ مش اجتماعيه
بنبقي متفقين علي خروجه كبيره ومستعيدين وتيجي واحده صاحبتنا تعتذر والخروجه بتبوظ ,بنبقي في مناسبه اجتماعيه وندور علي صاحبتنا دي منلقهاش !
بنلاقي فرصه شغل حلوه بنبعتها لصاحبتنا بتقولنا ان شاء الله ومتروحش ,ولو فرض وجت اخير عزومه كبيره بنلاقيها مش بتتكلم ومتعصبه وقلقانه , هي مش بتحب قاعدتنا ولا الموضوع حاجه تانيه !!
كل اللي فات دا ممكن يبقي سبب في ان صاحبتك عندها اضطراب القلق الاجتماعي “احتمال” ,,
فهنا احنا هنتكلم عن ازاي تساعدي صاحبتك اللي عندها اضطراب القلق الاجتماعي social anxiety لانها محتاجه فعلا مساعدتك :
بس الاول نعرف منين انها عندها القلق الاجتماعي:
- هتلاقيها بتتهرب من الخروجات والمناسبات الاجتماعيه اللي فيها عدد كبير
- بترفض تروح الانترفيوهات الجديده او بتختلق اعذار عشان متروحهاش
- وانتوا قاعدين مع بعض وفي وجود ناس جديده هتلاقيها ساكته ومتوتره ومتعصبه
- ممكن الامر يوصل في بعض المواقف لصعوبه في التنفس وزياده دقات القلب في المواقف الاجتماعيه المحرجه وحالات اغماء
دي كلها اسباب متاكدش علي انها عندها الاضطراب القلق الاجتماعي بس لو اتكررت اكتر من مره فاحتمال يكون عندها فعلا , فتعالي نشوف نقدر نساعدها ازاي ؟
اتمسكي بصداقتها: معظم البنات المصابه بالقلق الاجتماعي ,اصدقائهم قليلن اووي وان وجدوا , فلو انتي صاحبتها دوري علي الحاجات المشتركه بينكو والاهتمامات المشتركه وحافظي عليها ومتركزيش علي الجانب المقلق منها
متحكميش عليها: خلينا متفقين ان اي مرض او اضطراب او هوس نفسي هي حاجه المريض مش بيتحكم فيها, فمينفعش تحكمي علي تصرفاتها نتيجه المرض دا وتنتقديها وتديها نصايح تنميه بشريه في التعامل معاه ,دا للاسف هيزيد من خوفها وقلقها :/ بس انتي تقدري تطمنيها وتتقبليها وتشاركيها افكارها عن القلق
إقرأي عن اضطراب القلق الاجتماعي: في ناس كتير حوالينا مصابين بالمرض دا لتربيه بشكل خطا او مشاكل متحلتش بطريقه صح فالصغر فالاغلب , فانتي محتاجه تقري اكتر عن الاضطراب عشان تعرفي تساعديها ازاي وتشجعيها هي كمان تقرا عنه , انك تعرفي المشكله اول خطوه في حلها ,
شجعيها انها تروح لدكتور مختص: لو اتاكدتي ان هي عندها القلق الاجتماعي او شكيتي بنسبه كبيره ,اتكلمي معاها انها تروح لدكتور مختص دا هيساعدها اكتر واسرع بكتيير وممكن تروحي معاها فالاول كتشجيع ليها
متصدقيش انكارها: معظم المصابين بالاضطراب القلق الاجتماعي بيرفضوا الاعتراف بوجود الاضطراب ودا لانهم بيكونوا مش عايزين حد يعرف حاجه عن قلقهم وخوفهم , بس لو اتكلمتي معاها بطريقه غير مباشره هيبقي سهل عليها انها تحكي لانها بتحتاج الدعم النفسي والمسانده عشان تقدر تتغلب علي المواقف الاجتماعيه اللي بتقلقها
في النهايه القلق الاجتماعي علاجه مش صعب بس بياخد وقته زيه زي اي اضطراب ,فالمهم انك تفضلي معاها وتساعديها وتشجعيها انها تتعرف علي صحاب جداد مشتركين بينكوا ,تروحي معاها المناسبات اللي بترفض تروحها , حمسيها انها تروح مناسبات تانيه بالاثناء عليها في تعاملها الكويس مع المواقف دي , هتلاقيها مع الوقت بتستجيب وبتنفتح علي العالم اكتر 🙂
شاركي المقاله دي مع صاحبتك اللي محتاجه تقراها :))
