صاحبتك الشيك بزيادة، الفاشونيستا واللى مينفعش حد يشترى أى حاجة من غير ما يأخد نصيحتها فى الأناقة لأنها مقضية أغلب وقتها فى المولات و البرندات بتقدر جمال الأشياء لكن لو الموضوع زاد عن حده ففى أحتمال تكون مدمنة تسوق Shopaholic .

هوس التسوق مشكلة ممكن نقع فيها كلنابذات لو العروض جمدة و مقدرناش نقومها فتلاقى نفسك بتشترى حاجات مش لازمال لمجرد أن عليها خصم . بس فى بنات بتهوى الأناقة و الموضة بدرجة مش معقولة و كل ما ينزل صيحة جديدة فى الشنط او الهدوم متقدرش تقاوم فكرة أنها تشتريها حتى لو الظروف المادية لم تسمح … و ده نتيجة معاناها من القلق و الإكتئاب بدرجة كبيرة … لأنها بتشترى عشان تهرب من مشاكلها و إحساسها بالوحدة و العزلة مع المشاكل دى .

بس لو بتحبيها فعلا لازم تساعديها عشان المشكلة اللى هى بتخبيها بأدمان الشراء هتجبلها مشاكل كتير قوى .

مشاكل مادية فى الـ Credit card اللى دايما مديونة بيه للبنك .
مشاكل نفسية نتيجة أنها مبتحلش مشكلتها مع القلق و الخوف و عدم الرضا من الواقع اللى بنعيشه .
مشاكل أسرية مع عائلتها اللى بتتدين منهم ….و جوزها اللى مش عارف يسد كل المصاريف دى وبجانب طبعا الأنكار فهى مش بتعترف بمشكلة إدمانها للتسوق و ده بيزود الخلافات مبنهم و اللى ممكن تنتهى بالإنفصال لا قدر الله .

أصل الحكاية أن صحبتك دورت على علاج غلط لحالة عدم التكيف و الإكتئاب اللى بتعيشها وده أنها بتحاول تغير مودها بالتسوق …. و بعد فترة راحة قصيرة بترجع تانى للمشاعر السلبية الموجودة جواها يعنى كونها مدمنة تسوق ده مجرد محاولة للعلاج الذاتى .

7 خطوات تساعدها فى تجنب إدمان التسوق

• لازم تنصحيها أنها تتعالج عند حد مختص و كمان تشجعيها بأنكو ممكن تروحوا للدكتور مع بعض لأن التدخل العلاجى المبكر بيسهل كتير قوى من الأزمة .
• ما تسيبيهاش وحدها لما تحب تروح تتسوق يعنى رجلك على رجلها فى أى مول … عشان تحاولى تساعديها أنها تفكر و تكنترول هوس الشراء … ويا ريت تعملوا قائمة مشتريات قبل الذهاب و تساعديها متخرجش عن ما تحتاج فقط.
• المساعدة مع الطبيب المعالج عشان تلاقى نشاط تانى يشغلها عن الذهاب للمول … يعنى ممكن مثلا تهتموا بأى عمل خيرى ذى مساعدة بعض الأطفال الأيتام و عمل جدول لزيارتهم …عشان تتشغل فى عمل الخير عن التفكير فى مشاكلها الشخصية بمعنى تانى أننا بنوجد عادات صحية بديلة عن السلوك القهرى .
  وصى جوزها أنه يسحب منها بطاقة الائتمان … و على فكرة ده مش شر لأن مدمن التسوق دايما يكون سهل عليه يشترى بالفيزا لأنه مش بيحس بالفلوس و هى بتدفع ..فالأحسن يسحب الفيزا و تتعامل نقدى .
• بلاش تروحوا المول و هى مكتئبة و حالتها النفسية مش تمام لأن ده هيخليها تنتكس تانى لو كانت أتحسنت .
• ساعديها ما تقعش فى فخ الخصومات و نصائح البائيعين المتطوعين… أبعديها عن أى حد بيرغى فى المبيعات .
• الصبر و عدم الأتنقاد … فى أسلوب أنتقاد بيخلى صحبتك ترفض النصيحة بس لو صبرتى عليها و ساعدتيها هتكونى ساند ليه عشان تحمى نفسها و و أسرتها من أضرار كتيررر و كمان صداقتكوا هتقوى أكتر و أكتر .
• الموضوع محتاج مجهود بس أكيد الناس اللى بنحبها تستاهل المجهود ده لأننا لو مساعدناش بعض ..يبقى أيه هى لازمة الصداقة من الأصل .