علاج رعشة الجسم عند التوتر وإزاي تتعامل معاها؟

جسم الإنسان عنده شوية طرق غريبة حبتين بيعبر بيها عن بيها القلق والتوتر والخوف زي رعشة الجسم عند التوتر. كتير من الناس ممكن تحس برعشة في الجسم أو عرق في الإيد أو جفاف في الفم أو عرق في أماكن مُختلفة في الجسم.

كل دي أعراض ممكن تكون مقبولة شوية..

لكن في شوية أعراض تانية بتحصلنا مش مقبولة خالص يعني .. زي لما نحس إن صدرنا مقبوض ومش عارفين ناخد نفسنا أو عندنا رعشة في جسمنا مش عارفين نتخلص منها.

من الأعراض الصعبة شوية هي رعشة الجسم عند التوتر لأنها حاجة مابنقدرش نتحكم فيها أو عالأقل حتى نخبيها عن الناس اللي حوالينا.. والحقيقة إن أفضل طريقة عشان الرعشة دي تهدى هي معالجة القلق اللي اتسبب فيها.

التعامل مع القلق بشكل عام محتاج تمرين. أكنك بتتعلم مهارة جديدة، هتاخد منك شوية وقت عشان تتعلمها .. مش هاتبقى أحسن من أول مرة لكن برضه مش لازم تبقى مُحترف عشان تعرف تتعامل مع القلق.. بمعنى كل ما تحاول أكتر كل ما تتحسن أكتر مع الوقت.

سبب رعشة الجسم عند التوتر

لما بيتعرض جسمك للتوتر والإجهاد، بينتقل إلى وضع “الكر والفر” أو Fight or Flight. هرمونات التوتر بتسيطر على جسمك وتسرعّ من معدل ضربات القلب وضغط الدم والتنفس. وده عشان جسمك يتسعد إنه يتعامل مع الضغوطات، وبيفسر القلق على أنه خطر داخل عليك وبيجهزك إنك يا تقف في مكانك وتحارب الخطر ده “كر”، يا تهرب منه “فر”.

يعني من الآخر كدة أكنك حطيت العربية على الـSport mood.. اللي هو الوضع اللي بيخليها حامية جدًا عالطريق وصوت الموتور عالي وجاهزة للمناورة!

كل ده بيتسبب إنك جسمك يظهر عليه شوية حاجات غريبة زي الرعشة، أو الاهتزاز أو نوبات الهلع.

يعني مبدئيًا كدة لازم تعرف إن الرعشة دي أساسًا طبيعية جدًا ومش مؤشر على أي حاجة خطيرة.

علاج رعشة الجسم عند التوتر بخمس طُرق بسيطة

علاج القلق بياخد وقت أكيد لكن إحنا هنحاول نعمل شوية حاجات بسيطة لعلاج رعشة الجسم دي:

استرخاء العضلات التدريجي

التكنيك ده بيركز على شد وإرخاء العضلات المُختلفة في جسمك. ممكن كمان وانت بتعمل كدة تتنفس بشكل عميق. الهدف من التكنيك ده إن جسمك يرتاح. ده ممكن يأثر بشكل كبير على الرعشة ويهديها خالص.

الريــاضة البسيطة أو العنيفة

ممارسة الرياضة في ساعتها هايساعدك جدًا في التعامل مع الرعشة دي. وعلى حسب الرعشة جيالك فين بقى.. يعني ماتبقاش إيدك بتترعش وتلعب ضغط! خليك منطقي.

أسهل حاجة هي إنك تتمشي، أو تجري. بس لو قادر تعمل حاجة أكتر من كدة يا ريت. أي حاجة في البيت.. ممكن ضغط ممكن عقلة ممكن تمارين رجل وبطن كل دي حاجات بسيطة تقدر تعملها أيًا كان انت فين.

اليوجا (التأمل، الصلاة)

كتير من الناس بتلجأ لليوجا لما تبدأ مشاعر القلق تهجم عليهم أو في أوقات التوتر الحاد. تركيزك على تنفسك وقدرتك على التواجد في كل وضع هاتعمله في اليوجا هايساعدك تهدي الأفكار السلبية اللي عمالة تجري ف دماغك وهتساعدك تحسن مزاجك بشكل عام

علاج رعشة الجسم عند التوتر على المدى البعيد

تعديل نمط حياتك

إنك تاكل أكل صحي، وإنك تحاول دايمً تلعب رياضة ده هيأثر على حساتك عامة بشكل كويس. كمان لازم تحاول دايمًا تقضي وقتك مع ناس إيجابية أكتر، وتقلل الناس السلبية اللي ف حياتك. لازم تلاقي وقت لنفسك عشان تسترخي فيه وتفصل.. الموضوع ده مُهم جدًا عشان تسيطر على القلق.

سواء قررت إنك تاخد علاج أو لأ ..  صدقني التغيير الكبير اللي هاتعمله في حياتك هاخليك تتعامل مع القلق بشكل أسهل.

العلاج السلوكي المعرفي (CBT)

العلاج السلوكي هو أمتر علاج فعّال حاليًا للسيطرة على اضطرابات القلق لأنه بيتعامل بشكل خاص مع كيفية التعافي من عمليات التفكير الغلط التي هي أصلاً بتوصلك إنك تقلق.

الأدوية

المفروض إننا بنحاول نتجنب الأدوية  لأنها ببساطة مش بتعالج القلق بشكل مباشر. لكنها مفيدة للتحكم في القلق على المدى القصير خاصة لو العلاج السلوكي وتغيير نمط الحياة مكانوش كافيين.

اترك تعليق