القلق ونوبات الهلع خلال فترة الحمل وازاي تتعاملي معاهم
طبيعي تحسي بالقلق وأنتى حامل، بس لو لقيتى نفسك دايما قلقانة أغلب الوقت ومش قادرة تسترخي ولا تهدى، غالبا انتى محتاجة للمساعدة.
المحتويــات
ايه هو القلق ولإيه علاقته بالحمل؟
القلق هو إحساس بعدم الراحة والخوف، ممكن يكون إحساس القلق عندك قوى جدا وممكن يكون بسيط، كل الناس بتقلق أحيانا بس في ناس مش بتقدر تتحكم ولا تسيطر على قلقها ومخاوفها، وفى ناس من اللى بيعانوا من القلق بيتعرضوا لنوبات من الهلع ودى بقى بتكون مرعبة بجد. وفى ستات حوامل ممكن يزعلوا او يحسوا بالذنب انهم قلقانين في الوقت اللى الناس فاكراهم في قمة السعادة، بس القلق عموما حالة صحية مش علامة على الضعف ابدا، والقلق بيختفى من تلقاء نفسه كل اللى عليك بس إنك ” تهرب منه”.
من أعراض القلق خلال فترة الحمل:
- الشعور بالتوتر معظم الوقت، وصعوبة السيطرة على التوتر.
- إحساس بالقلق الشديد (يعنى مثلا طول فترة الحمل ممكن تكون السيدة قلقانة جدا على الجنين)
- الشعور بالخوف.
- قلة التركيز وكأن العقل بقى فاضي.
- إحساس بالضيق والخنقة.
- إحساس مستمر بالخطر.
- صعوبة النوم.
وممكن نوبات الهلع تحصل في فترة الحمل من غير أي سبب واضح، ومن أعراضها:
- سرعة ضربات القلب.
- إحساس بالرعب وقرب الموت.
- ألم الصدر.
- صعوبة التنفس.
- تعرق.
- إحساس بالإغماء.
- رعشة في الأطراف.
- تنميل.
- اضطراب المعدة.
معظم نوبات الهلع تستمر من 5 دقايق ل20 دقيقة، طبعا بتكون مخيفة جدا بس مش خطيرة، في ستات بيحصلها اكتئاب خلال الحمل بسبب القلق الزيادة.
اية مدى شيوع القلق وقت الحمل؟
القلق خلال فترة الحمل شائع جدا، اكتر من حامل وسط عشر حوامل بيحصلهم قلق خلال فترة الحمل، ممكن عشان الحمل تجربة عاطفية جدا بيكون صعب على السيدة انها تعرف اذا كان القلق ده شيء طبيعي ولا علامة على حاجة خطيرة لازم تنتبه ليها، عشان كدة لازم تكونى واثقة في نفسك وتعرفى انك انتى الوحيدة اللى تقدرى تحكمى على مشاعرك اذا كانت مشاعر طبيعية او لأ، بس لو حسيتى بقلق زيادة او حصلك نوبات هلع خلال فترة الحمل لازم تطلبي المساعدة.
اية هي أسباب القلق؟
ممكن أي حد يتعرض للقلق، بس غالبا معدل الإصابة بالقلق بيكون اعلى اذا كان في حاجة من الحاجات دى:
- تاريخ عائلي للإصابة بالقلق ونوبات الهلع.
- إذا كنت اتعرضت في الماضي لنوبات هلع.
- حصلك حادثة مؤلمة أو اتعرضت للتعنيف.
- استخدمت أدوية اكتئاب محظورة.
- اتعرضت لفترة طويلة من الضغط النفسي الشديد بسبب مشكلة في العلاقات الشخصية او مشكلة مادية او بسبب البطالة.
القلق والفوبيا المرتبطة بالحمل
ممكن تحسى بشوية قلق او خوف من الولادة ودة طبعا شيء شائع جدا، لأن الحمل والولادة من اكبر الأحداث اللى بتمر على السيدة في حياتها، عشان كدة مش لازم تكونى قاسية على نفسك، تقدرى تتكلمى مع الطبيب المتابع لحالتك وتعملى شوية حاجات إيجابية ضمن تحضيرات الولادة ودة هيساعدك كتير.
في بقى الفوبيا وهى خوف رهيب من ومرعب من شيء معين، الفوبيا نادرة الحدوث للحوامل، لكنها بتحصل لبعض السيدات وبتخليهم مرعوبين من الولادة ومش عاوزين يولدوا أصلا، حتى لو كانوا بيتمنوا الأطفال، وممكن كمان الفوبيا تأثر على قرارهم المتعلق بطريقة الولادة ودة اسمه توكوفوبيا.
في سيدات بيكون عندهم خوف شديد من الولادة بسبب انهم مروا بتجربة ولادة متعسرة او تجربة اجهاض او وفاة لطفل حديث الولادة، وبالتالي ممكن يكون عندهم اضطراب ما بعد الصدمة.
كمان فوبيا الابر”الحقن” كمان ممكن تسبب مشكلات في الحمل، عشان في سيدات هتتجنب عمل تحاليل دم او علاجات مهمة.
لو حسيتى بمشاعر قلق أو رعب زيادة بخصوص حملك او حسيتى ان القلق ممكن يؤثر عليكى خلال الحمل، بننصحك تستشيرى طبيب النساء والولادة المتابع لحالتك او تستشيرى طبيب عام، وممكن تحتاجى تزورى الطبيب النفسي عشان يقدر يساعدك.
طيب إيه مدى تأثير القلق على الجنين؟
اكيد انتى عاوزة تعرفى هل القلق والتوتر ممكن يأثر على جنينك خلال الحمل، بس الأهم انك تعرفى ان زيادة قلقك على الجنين هو اللى هيدخلك في حلقة مفرغة من الأفكار المزعجة، هتلاقى نفسك قلقانة وهتخافى الجنين يتأثر وبالتالي القلق هيزيد وهكذا سلسلة مش بتنتهى من القلق.
عموما خليكى عارفة ان الجنين صعب يتأثر بقلقك خلال فترة الحمل، خاصة لو حصلتى على الدعم المناسب لحالتك، عشان كدة لازم تركزى على طلب المساعدة وإنك تلاقى طريقة تخليكى تقدرى تتحكمى في الاعراض، وخليكى واثقة إنك بتعملى كل اللى تقدرى عليه عشان طفلك.
ازاى اعالج القلق خلال فترة الحمل؟
لازم تستشيرى طبيب النساء والولادة لو حسيتى بالحاجات دي:
- لو حاسة إنك دايما قلقانة لفترة مستمرة أطول من أسبوعين.
- لو القلق ابتدى يتعبك جسمانيا، يعنى دقات قلبك بقت سريعة وبتتنفسى بصعوبة، وبتعرقى جدا وتحسى إنك هيغمى عليكى، حاسة بالمرض او عندك اسهال مستمر.
- بيحصلك نوبات هلع.
- عندك أفكار مزعجة بتتكرر كتير ومش قادرة تسيطري عليها.
- بتلاقى نفسك بتكررى أفعال بعينها عشان تحسي بالتحسن (زي مثلا الغسيل او العد).
- رعب من الولادة لدرجة إنك مش عاوزة تولدي.
- خايفة جدا من عمل أي تحاليل دم وبتتجنبى إنك تعمليهم.
لو حسيتي بأي عرض من الاعراض اللى فاتت دي لازم تستشيرى طبيب النساء والولادة او طبيب عام وتحكيلة عن أي تاريخ مرضى نفسي عنك او تاريخ تعرضك للقلق، الطبيب لازم يعرف أكتر عن صحتك العقلية عشان يقدر يساعدك بشكل أفضل.
اية هو علاج القلق اثناء الحمل؟
طبيب الولادة او الطبيب العام هيقولك على اختيارات العلاج المناسبة ليكى، وهيوضحلك إيجابيات وسلبيات كل نوع من أنواع العلاج دي، واختيار أنسب علاج ليكى هيعتمد على الحاجات دي:
- مدى قوة الاعراض اللى عندك
- العلاجات اللى جابت نتيجة معاكي قبل كدة (ده إذا كنتى عانيتى من القلق قبل كدة)
- الخدمات العلاجية المتاحة في المكان اللى انتى فيه.
عادة القلق والرهاب ونوبات الهلع بيتم علاجهم من خلال علاجات المساعدة الذاتية اللى بتعتمد على العلاج السلوكي المعرفي(CPT)، ولو حسيتي إنك محتاجة مساعدة أكتر ممكن تلجأى لفريق متخصص في الصحة النفسية للحوامل، ممكن كمان يناسبك علاجات تانية زي العلاج السلوكي المعرفي واليقظة والاسترخاء مع معالج متخصص، وممكن كمان يناسبك دواء من أدوية مضادات الاكتئاب.
ازاى امنع القلق واتعامل معاة خلال فترة الحمل؟
- اتكلمى مع شخص بتثقى فيه زي زوجك مثلا او حد من افراد اسرتك أو صديقه ليكى، ووصلى مشاعرك وكل اللى انتى حاسة بيه.
- متحيش ابدا بالذنب او الضغط النفسى، لأن كل المشاعر اللى ابتمرى بيها دى مش ذنبك ومش بأيدك.
- اعتنى بنفسك.
- اتمرنى ومارسى رياضة.
- تجنبى شرب الكافيين.
- كلى كويس.
- التدخين والكحول بيزودوا القلق، وكمان مضرين للجنين.
- اتعلمى أكتر عن تقنيات الاسترخاء ومارسيها بانتظام.
