المقدمه دي إنت غالباً عارفهـا وهاتتكلم عن إزاي الدنيا بتغلى. وليه الفصال مُهم؟ وإزاي الست الوالدة والسيد الوالد كانوا بيفاصلوا وبياخدوا الحاجة بنص سعرها. وإن القميص اللي انت اشتريته بـ200 جنيه واقف على المحل بـ40 جنيه، وهكذا..

عشان كدة هانختصر المقدمة المُحبطة عن ظروف البلد أو عن شطارة أهلنا في الفصال اللي احنا مورثنـاهاش.

وهانخش في خطوات الفصال على طول:

• مبدئياً لو نازل تعمل شوبينج في المطلق يبقى تقفل المقال على طول وتشوف أي حاجة تانية تقراها أو تعملها .. الحاجات اللي انت محتاج تشتريها لازم تبقى عارفها بالظبط.. وخد بالك بقى لاتبقي مدمن تسوق ولا حاجة.
• مش لازم لما تنزل تشتري الحاجة في يومها. ممكن جداً تبقى نازل تقعد عالقهوة وتلاقي الجزمة اللي كنت عايز تجيبها بنص السعر في محل تاني بالصدفة.
• لو نازل النهاردة بهدف إنك تشتري الجزمة الفلانية اللي في دماغك وخلاص لازم تجيبها النهاردة، إعمل حسابك إنك هاتلف شوية. إعمل أي حاجات مسلية في النص لو بتكره اللف زيي. زهقك هايخليك تجيب الحاجة اللي إنت عايزهـا بأي سعر تلاقيه قدامك.
• لازم تعمل الواجب اللي عليك قبل ما تنزل. وتعرف متوسط سعر الحاجة دي بكام. وتعرف أماكن بيعهـا فين؟ الجزمة ممكن تجيبهـا من عالرصيف هاي كوبي أحسن وأرخص من المحل. ولو هاتجيبها أوريجينال يبقى ملاكش حل غير التوكيل نفسه أو المحلات اللي بتبيع بواقي التوكيل اللي فيها ديفوهات (عيوب) خفيفة.

لما تنزل بقى والفصال نفسه

• لما تلاقي الحاجة اللي عجباك، بلاش تبين إن عينك هاتطلع عليها. أكيد بيحضرك مشهد الوالدة وهي بتقول للراجل هاخدهـا بكذا يقوم يحلفلها إنه كدة خسران، فتسيبه وتمشي. فيقوم ناده عليها ويقولها خلاص تعالي يا حاجة أمري لله.
• لازم تفضل فاكر إن الفصال شرعي تماماً ومش عيب ومش بيضر ببرستيجك. إلا في الأماكن اللي مافهاش فصـال. لازم تفضل عارف إن البياع أصلاً حاطط هامش الفصال فوق هامش الربح عشان هو كل اللي بيجيله بيفاصلوه.
• خد بالك إن المحلات بتعمل عروض وخصومـات طول الوقت وعادي.. إشمعنـا إنت لما هاتيجي تفاصل هايبقى الموضوع مش منطقي؟
• آه ما تتكسفش إنك تفاصل في مبالغ كبيرة.. بس مش في المطلق كدة. يعني لازم يبقى فيه منطق ولازم برضه تسيب للبياع عذر إنه يرضى بفصالك بمعنى إنك ترضي غروره في إنه يرضى ينزل سعر الحاجة. تخترعله حجة يعني عشان قال يعني يساعدك.
• إسئل أسئلة مفتوحة شوية.. زي مثلاً لما يبقى فيه كنبة 4 متر عاجباك جداً بـ4000 جنيه. وفي أختهـا مش عجباك بس 2 متر وبـ2000 جنيه. فاتقول للبياع أنا المساحة اللي عندي أربعة متر وعشان ميزانيتي هاتضطر أجيب كنبة صغيرة وده مش منطقي.. تقدر تساعدني إزاي؟ (بتعبير حيرة كدة).
• لازم تعرف تقرا لغة الجسد بتاعت البياع. هل هو متضايق فعلاً ومش حمل فصال؟ ساعتها هاتقوله رقمك النهائي وإعمل حسابك إنه يا هيوافق يا مش هايوافق ومفيش فصال بعدها تاني) هل هو بياخد ويدي معاك ومُبتسم؟ هلى بيحاول يساعدك إنك تاخد الحاجة اللي عجباك؟

مش كل حاجة بنعوزها بنجيبهـا، عالأقل دلوقتي

• لازم يبقى عندك استعداد إنك تمشي من غير ما تشتري. ولازم البياع يبقى عارف كدة. ونصيحة مني لازم تبقى إنت فعلاً كدة: مستعد تمشي لو فعلاً السعر عالي بالنسبة لقيمة الحاجة دي بالنسبالك.
• اقرا شوية معلومات عن الحاجة.. هاتساعدك وانت بتفاصل ووإنت بتتكلم.
• لما البياع يقولك الجزمة دي جلد طبيعي. لو إنت مش عارف هاتقوله يا راجل؟ هايحلفلك. وهو الوحيد اللي عنده معلومة. فحتى لو ماصدقتوش لان مش منطقي جزمة جلد طبيعي تبقى بـ300 جنيه بس. بس برضه مش هاتقدر تكذبه.
• لو إنت فاهم حاجة بسيطة في الجلد الطبيعي. هاتمسك الجزمة كدة وتتنيها وتقوله يا عم دي تنية في التانية وهاتكرمش.. جلد طبيعي إيه بس؟ هاخدهـا بـ200 عشان لونها كويس مش أكتر.
• أو قوله هارميها حالاً تحت أي عربية معدية في الشارع لو ماكرمشتش هاشتريها بالسعر اللي تقول عليه ولو كرمشت هاخد واحدة تانية زيها بـ200 جنيه 😀
• مش لازم تفاصل في الفلوس بس على فكرة. ممكن تاخد حاجة تانية بسعر أقل. وممكن تاخد فترة ضمان أطول مثلاً. وممكن يبقى في هدايا كانت نازله مع الإكس بوكس من شهر والنهاردة بيبيعوها لوحدها، وهكذا ..
• افتكر دايماً إن اللي استورد الجزمة دي ماستوردش منها حتة واحدة واداها للمحل اللي إنت واقف عنده! عمرك ما هاتندم إنك ماجيبتش حاجة كنت عايزها قد ما هاتندم إنك اتضحك عليك لما تلاقيها في مكان تاني بربع التمن.