علشان كلنا بنبدأ الموضوع بنفس العنف بتاع ” انا لازم اتغير دلوقتى حالا، هخس و اعمل دايت خلاص”! ما أنت هتتغير وهتخس و كل حاجة و الله، بس الفكرة هتتغير ازاى،و الدايت ده هيبقى ازاى؟ و أصلا انت مفهومك ايه عن الدايت؟

طبيعة كل حاجة فى الدنيا هى الميل للحالة الاكثر استقرارا، يعنى لو انت قدامك الاختيار بين قراءة كتاب و تصفح الفيس بوك، هتلاقى نفسك بتتصفح الفيس بوك، علشان دى الحالة اللى دماغك “مش هيبذل” مجهود فيها، و بالتالى هيفضل فى استقرار.

لو قدامك اختيار بين الجرى كل اليوم الصبح فى الشتا و بين النوم تحت البطانية، اكيد هتختار البطانية و تنسى الرياضة تماما!

و بالتالى لما تيجى تعمل دايت، و تتحط قدام اختياريين، دماغك هيختار الاكل اللى طعمه حلو اللى بيخليك تحس بسعادة و انت بتاكله و تنفض للأكل الصحى اللى طعمة الى حد ما مش جميل زى الاكل التانى، علشان هى دى حالة الاستقرار، حالة ال”لا صراع”.

طيب الدماغ بردو بيترجمها ازاى علشان يبهدلنا معاه بالشكل دة و يخلينا نضر نفسنا بنفسنا؟

لأما يلبسك فى الحيط و تلاقى نفسك اتوماتيك كدة رايح للتلاجة و نازل اكل فى كل حاجة فيها، و ده علشان الLizard Brain  تمكن منك، أو يبدأ يمشى عكس اوامرك و يرتجل و يدافع عن بقائه اول ما يلاقيك بتعرف تتحكم فى نفسك و تقاوم جمال الأكل.

إزاى؟

هيبدأ يتلقى رسايل من الجسم ان فى حالة تجويع، و ان الجسم فى حالة تهديد، فا يبدأ يقلل الحرق علشان يحتفظ بأكبر قدر من الدهون المخزنة اللى تخليه يتجنب المجاعة دى اى كان فترتها!
و انت تبقى نازل جيم 8 ساعات فى اليوم و عمال تاكل فى سلطة لما فعلا كرهت نفسك!
و هو فوق مغفلك و مش بيحرقلك حاجة، و تيجى تقيس وزنك بعد اسبوع تلاقي نفسك خاسس نص كيلو بالعافية، و تحبط بقى فا تبطل و ترجع تلخبط فى الأكل و تبطل رياضة تانى، و تبدأ الدوامة من جديد!

طب والحل يعنى؟

الحل انك تتبنى “عادات” مش “اهداف”، يعنى متحطش لنفسك هدف انك تخس 20 كيلو مثلا فى 6 شهور لأ، عود نفسك على انك تاكل اكل صحى وسط الاكل المضر، بعدها ابتدى اقلل حجم الوجبة، اعرف الاكلات اللى بتشبع و طعمها حلو و فى نفس الوقت مبتخنش و واظب عليها وهكذا..
المهم انك تغير نمط حياتك تدريجيا مش فجأه تقول لازم ابطل كل حاجة، علشان دماغك زى الطفل، هيعند معاك و هيمشى على عكس كل اللى انت مرتبله!

لو كان ليك تجربة مع الدايت و خسارة الوزن شاركنا و خلي الناس تستفاد منك!