الخوف حاجة عادية جدا عند الناس كلها و كلنا بنحاول نطمن بعض بس يا ترى الطفل بيخاف ليه؟

تخيل أن الخوف مفهوم مش موجود فى حياة ولادنا قبل سن 3 سنين فالعادة بيكون الطفل أسد مش بيخاف من حاجة .
بس بعد كدا بيبتدى الخيال عنده يتشغل و يبدأ يبدع كمان أحنا بنعرفه على معنى الخطر وأن فى حاجات حولنا ممكن تأذينا عشان كدا الأحسن نبعد عنها .

فعقل الطفل بيكون شوية أفكار عن الدنيا وتلقى أبنك بدأ يخاف من  الكلاب أو الحقنة أو الصوت العالى أو شخصيتان الكرتون الكبيرة اللى بتجيبهم له فى عيد ميلاده يعنى تبقى تاعب نفسك و صارف وفى الأخر تلقيه بيعيط خايف .

طبعا ده كله خوف بسيط مش محتاج غير شوية تشجيع و معلومات بسيطة عن الحاجة اللى بيخاف منها و هتلقى الطفل أتغلب عليه.

أيه هو الخوف المرضى ؟!

ده بيحصل لما الخوف الطبيعى يزيد عن حده ويأخد طريق تانى يخلي الطفل يتسمر فى الأرض منه وارد يحصل نتيجة موقف أو حاجة حصلت معاه فالفكرة فضلت فى عقله وبقى بيخاف من أى حاجة لها علاقة بالحكاية ،دى كمان صعب يتخلص منها .
المشكلة انه بيأثر على تصرفاتهم و سلوكهم على طول ومحتاج صبر كبير ، جهد و تدريب عشان تقدر تحتويه و تطمنه .

نصائح تساعدك فى علاج الخوف عند أبنك ؟

• متزعليش من الطفل الموضوع مش بأيده .
• ادعمى أحساسه بالأمان و ممكن نتفق على مكان فى البيت زى أوضه أو ركن معين فيها يكون بيطمنه و نحط فيه أستيكرز أو لعب تساعده يطمن أكتر لحد ما تعدى نوبة الخوف.
• أوعى تستهترى بمشاعره لأن ده هيخليه ميثقش فيكى.
  كلميه و أعرفى ليه الحاجات دى بتخوفه و أزاى ممكن نحاول نقنعه بالعكس بس من غير ضغط بالتدريج.
• لازم تراقبى الكارتون و البرامج اللى بيشوفها على التلفزيون يمكن يكون مشجع على الخوف .
• بلاش تعوديه على انه يسمع الكلام لما يتهدد لأن ده هيزود خوفه .
• بلاش نضغط على ولادنا يناموا و النور مطفى بس ممكن نطمنهم و نورلهم نور خافت هادى .
• باب الأوضة ممكن نواربه مش لازم نقفله يعنى فى حلول وسط هتريحك و تريح طفلك لو بيخاف .
• ممكن كمان نلجأ لمساعدة دكتور نفسي عشان نبقى ماشين على الطريق الصح .
• نحضر إجابات لكل حاجة ممكن تيجى فى دماغ الطفل بس لازم تكون إجباتنا مقنعة و لو معندناش جواب ممكن نستعين بمتخصص عشان يقولنا نساعد ولادنا أزاى .

المهم اننا نطمنهم و نحتويهم على قد ما نقدر و نساعدهم يتغلبوا على خوفهم بجد ولو عرفنا سبب الخوف ممكن نقصر الطريق شوية ،كمان الصبر على المشكلة لأن ولادنا بكرة يكبروا و مفاهيمهم تتغير مع الوقت.

أبعتولنا و قولولنا ولادكوا بيخافوا من أيه ؟