أحلى شغلانة لأى ست فى الدنيا هى الأمومة و برغم صعوبتها و أعصابك اللى بتفقديها شوية بشوية غير أن أكيد الولاد هيطيروا برج من دماغك.

و برغم صعوبة شروط الوظيفة إلا أنها حلم كل ست فلازم نبص للطفل على أنه ” أهم مشروع فى حياتك” .

و ذى أى مشروع لازم نستخدم فيه الطرق العلمية الحديثة و بما أن التربية علم و دراسة فتعالوا نتعلم سوا .

10 نصائح هامة فى التربية السليمة

1- كونى صادقة مع طفلك :

الصدق اسرع وسيلة عشان نبنى علاقة ثقة دائمة و ممتدة مع الطفل .

فالأفضل أننا نبنيها طوبة طوبة مع ولادنا كمان لازم نعرف أن أى طوبة كذب ممكنة تأثر على العلاقة و تهز نفسية الطفل.

2- كونى قدوة حسنة:

مهم أوى أن أفعالنا و أقولنا يكونوا على نفس الخط مينفعش أطلب من أبنى يلتزم بشئ أنا نفسى مستحيل أعمله.

لأن الأطفال بتتعلم بالرؤية و التقليد قبل ما يتعلم من الأوامر المفروض عليه تنفيذها.

3- المناقشة و الإقناع :

أهم صفات التربية السليمة و لازم يكون حوار حر يعبر فيه الطفل عن نفسه و عن أفكاره من غير خوف أو قلق من والديه.
كمان يا ريت نقلل شوية لهجة الأوامر و نهتم بالمناقشة و الإقناع .

التصرفات المبنية على الإقتناع بتكون دايما أقوى من الأوامر اللى ممكن يعند و بعمل عكسها أو ينفذها و هو مقهور.

4- بلاش تظهرى عيوبه للناس

حافظى على صورة طفلك بلاش الشكوى منه طول الوقت بذات فى حضوره.

كمان فى فرق بين اننا نشتكى ونندب عن أننا نطلب النصيحة من الأهل أو الأفضل من أخصائى التربية و تعديل السلوك.

5- حددى التصرف الصح و أمدحيه

يعنى لازم نحدد لما نقول أنت شاطر …. عشان عملت الواجب ، أنت حنين … بتاخد بالك من أخوك الصغير.

عشان لما يعرف هو شاطر ليه ؟ هيفهم و يقدر أن السلوك الحسن مفتاح لتكرار السلوك الحسن .

6- العقاب لازم يكون مدروس

يعنى لازم نتفق على عقاب محدد للسلوك الغلط عشان الطفل يستوعب أنه مش تعذيب و خلاص.

لا ده مجرد وسيلة عشان تفكره أنه لو غلط مثلا هيكون فى فترة توقف ” نبطل لعب و نقعد حتى نهاية العقاب” .

أو سياسة ركن أو كرسى العقاب و المدة بتحدد حسب عمر الطفل.

بلاش تعاقبيه على حاجة سمحتيله يعملها.

7- الروتين اليومى أسلوب حياه

أن يكون فى مواعيد منظمة للنوم و الأستيقاظ كمان مواعيد للوجبات كمان فترة لعب و حتى مشاهدة الكرتون .

حلو ان الطفل يتعود على نظام فيكون عارف جدوله اليومى كمان يتعود على النظام و إدارو الوقت.

8- بلاش تزمى فى أبوه فى حضوره

مهما كان شعورك أو خلافك مع الأب نفسية الأطفال مش بتتحمل تشويه لصورة والديه لأنها بتشوه شخصية الطفل معها.

لان صدمته فى والديه بتغير أحساسه بالدنيا و الأمان فيها و تشوه نفسيته

9- عرفى طفلك حدوده صح

لازم الطفل يعرف حدوده كويس و أن فى أمور تخص الكبار و بس و مينفعش يدخل فى الحوارات دى.

و يا ريت من غير تجريح أو سخرية من تصرفاته عشان نبعده عن المشاكل  بأسلوب هادئ .

10 -اديه حريته عشان يعرف نفسه

ولادنا مش كربونه منا و الدنيا محتاجة ناس مختلفين و موهوبين عشان كدا بلاش نفرض شخصيتنا على ولادنا .

الأفضل نسبهم يختاروا و يعرفوا هما عاوزين أيه و أزاى؟ يحدد بيحب ايه و بيكره أيه.

كلها نصايح مهمة لو ركزنا فيها شوية وحاولنا نهدى أعصبنا مع ولادنا هنكسب أكتر الأم الهادية بتساعد ولادها يكونوا هادين أصبرى و ركزى فى نجاح مشروع عمرك .

أبعتولنا رأيكوا فى أصول التربية السليمة ؟