إيه هى صفات المتحرش؟ وإزاي نحمي أطفالنـا من الانتهاك الجنسي ؟
من كتر الحكايات اللى بنسمعها عن الانتهاك الجنسي للأطفال بقينا مش عرفين نأمن لمين ؟ و محتاجين نتعرف أكتر على شخصية وصفات المتحرش الجنسي عشان نقدر نحمى ولادنا. أن الحالات دى منتشرة فى مجتمعاتنا رغم ان الناس غاوية تقضيها نعامة ستايل و تخبى رأسها فى الرمل و كل اللى بنسمعه حواديت مرعبة.
مين هو المتحرش ؟
الأجابة دى صعبة أوى لأن المتحرش ممكن يكون أى حد و ده عشان فى الغالب بيحافظ على شخصيته السرية اللى مش بيعرفها غير ضحاياه. كمان بيكون حد قريب جدا من الطفل وساعات بيكون من العيلة أو الأقارب. حتى لو كان غريب فبيحاول يتعرف على الأم أو الاب عشان يقدر يوصل للطفل من خلالهم. لأنه بيهتم أوى أنه يقوى علاقة الثقة مع الطفل قبل ما يحاول معاه.
فهو شخص مريض نفسيا ومرضه ممكن يكون لأسباب كتير زى :
- ضحية تحرش: كتير بيكون هو نفسه كان ضحية تحرش وعشان مش قادر ينتقم من المتحرش. بيقرر يتحرش بأطفال تانين عشان يكونوا ذيه كمان ساعات بيكون أتعود على الفعل ده.
- مشاكل نفسية: زى حب السيطرة و التحكم فى الضعفاء أو مشاكل فى الطفولة حولته مع السن للسلوك ده.
أيه هى صفات المتحرّش ؟
- فى الغالب بيكون شخص مضطرب نفسيا بيهوى التواجد فى التجمعات اللى فيها أطفال. مش حب لا لأن تصرفاته بتكون غريب مع الطفل.
- رغم أنه ساعات بيكون مش بيظهر الجانب ده من شخصيته أمام الناس بالعكس و بيكون موثوق فيه.
- التودد الأوفر والمبالغ فيه مع طفلك كمان رغبته الدايمة على أنه يقفش الطفل لوحده.
- الكلام والألفاظ الجنسية الخارجة والممنوعة مع الطفل أو فى وجوده عشان يلفت انتباهه.
- مهتم يقعد مع الطفل وقت طويل من غير داعى عشان يزود ثقة الطفل فيه و يقدر يسحبه.
- اللمس أو النظر لطفلك بشكل غريب و بأسلوب ممنوع بالذات لو كان لوحده مع الطفل.
- تلقى لازق الطفل فى كل مكان و مغرقه أسئلة و حوارات على طول.
- لو فجأة لقتى طفلك بدأ يخاف منه من غير سبب أعرفى أنه تعرض لأنتهاك جنسي من الشخص ده .
حافظى على الطفل و وعيه بخطوات تحميه من الانتهاك الجنسي و عرفيه حدود تعامل الناس معاه.
أبعتولنا لو صادفتوا شخصية من النوع ده وقوليلنا على الصفات اللى لاحظتيها عليه.
