اكتئاب الدورة الشهرية : ازاي تساعد شريكة حياتك تتخطى الفترة دي
اكتئاب الدورة الشهرية بتعاني منه معظم الستات شهرياً، وبتكون أصعب فترة بنمر بيها، تغيرات في الشكل وحبوب في الوش وكرش وتعب نفسي وحزن ودراما طول الوقت، وبسبب تقلباته المزاجية والعصبية وتعبه النفسي والجسدي بيأثر دا على تعاملها معاك وعلاقتها بيك وهتلاقيها بتتعصب وبتزعل منك على أقل حاجة، عشان كدا لازم تفهم معاناة شريكة حياتك في الوقت دا وتعرف تتعامل معاها بحب أكبر وبطرق معينة تساعدها على تخطي اكتئاب الدورة من غير أي مشاكل
8 طرق تساعد بيهم شريكة حياتك تتخطى اكتئاب الدورة الشهرية
1- الوضع عادي هي مش مجنونة :
- متحسسهاش أن العصبية والتغيرات النفسية إلي هي فيها مرض نفسي ولا أنها أتجننت، لازم تبقى فاهم التغيرات والتعب النفسي إلي بيخليها مضايقة أو متعصبة عشان كدا تتعامل وأكن الوضع عادي وعادي تتعصب أو تبقى مزاجية في الوقت دا
- بلاش تستغرب من أي حاجة بتعملها، بتأكل كتير، شكل هدومها غريب، حركاتها غريبة، عايزة تعيط من غير سبب، بلاش تنتقدها في الوقت دا لأنها بتكون حساسة أكثر من اللازم
2- بلاش قرارات مصيرية :
- بلاش تسألها على مستقبلكم، أو تقولها تفاصيل مهمة وتزعل من رد فعلها، اكتئاب الدورة بيخليها مش مسؤولة عن كل ردود أفعالها، سواء كان رد الفعل غضب شديد أو تجاهل، مش وقت قرارات مصيرية وأسئلة وجودية هي مش متحملة نفسها
- الفترة دي نفسياً الستات بتكون محتاجة هدوء، لأن عقلها أصلاً بيفضل يفكر في تفاصيل كتيرة تتضايقها، علشان كدا لو عندك أي خبر وحش، ناوي تقعد من الشغل، أو تسافر، أصبر لحد ما تعدي الفترة دي وبعدين خد رأيها، لأنها بنسبة كبيرة هتقولك رأي مش مظبوط وهتلاقيها بتندم على قرارتها بعد الفترة دي ما تعدي
3- الحب :
- أحتياجها للحب في الفترة دي أكبر من أي فترة، لو متعود تقول كلام رومانسي زوده، وزود الفعل، هاتلها ورد وشكولاته، حسسها أد أيه أنت بتحبها وأد أيه هي جميلة لأن الفترة دي بتقلل ثقتها في نفسها، خليك مرآيه حبها، وقولها أنا بحبك وخصوصاً في الوقت دا
- زود كلمات الغزل خصوصاً على شكلها، أد أيه شكلها حلو وهي هادية وحتى وهي تعبانة، وبلاش كلمات زي ريحتك غريبة، لا خليك جمبها من غير نقد حب وغزل وبس
المسكنات لوحدها مش كفاية شريكة حياتك محتاجة حبك وقت اكتئاب الدورة الشهرية
4- الزيارات العائلية :
- لو متعودين تزوروا أهلك أو أهلها أو حد يجيلكم البيت، أجل دا كله، لأن تعبها في الوقت دا مش هيخليها تتحمل مسؤوليات العزومات ولا الزيارات، ولا هتتحمل اللبس التقيل، هي محتاجة راحة ولبس مريح
5-المساعدة في شغل البيت:
- في الوقت دا بجانب تعبها النفسي هتلاقي عندها تعب جسدي في الظهر والمعدة والرجل، عشان كدا ساعدها في شغل البيت وقلل الشغل من عليها، مش لازم محشي يعني مالها المكرونه المسلوقة إلي أنت عاملها بأيدك!
6- هاتلها الأكل إلي بتحبه :
- أكسر الرجيم في الوقت دا وهاتلها بيتزا كل شوية، هتحس براحة وهي بتأكلها، هاتلها نوتيلا، أملى الثلاجة الوقت دا بحاجات خفيفة ومسكرة عشان جسمها محتاج للسكريات والنشويات في الوقت دا للطاقة
7- الصبر والتقدير :
- أصبر وأتحمل الكام يوم دول لحد ما يعدوا وخليك مقدر حالتها النفسية وأن دا اكتئاب هيخلص أول ما تخلص
- أفتكر ليها كل لحظة كانت جمبك وقت تعبك واحتويتك واتحملتك، وأنها حبيبتك وشريكة حياتك، وأن العصبية مش بأيدها وأنك لو متحملتهاش مين هيتحملها!
8- أحسب معادها :
- لو تقدر تحسب مواعيد الدورة هتبدأ وتخلص أمتى، عشان تفهم أن من أول يوم 7 مثلاً هتدخل في فترة اكتئاب وعصبية، وأن لازم تعدي ليها الفترة دي لأنه مش بمزاجها
أقروا كمان عن متلازمة ما قبل الحيض من هنا اكتئاب ما قبل الحيض: مليش نفس أعمل حاجة
شاركونا بأحسن الطرق للتعامل في الوقت دا؟
