ازاي تساعد صاحبك اللي بيجيله نوبات الهلع؟
إنك تعرف إزاي تساعد شخص عنده اضطراب نوبات الهلع مش شئ سهل، وانت بتحاول تقدم لصاحبك الدعم والتشجيع أنه يشوف دكتور متخصص، لازم برضو تاخد بالك من نفسك.
المقال دا هيساعدك لو:
- كان عندك صديق مصاب باضطراب نوبات الهلع.
- عايز تعرف إزاي تساعد شخص اصابته نوبة هلع وانت موجود.
- عايز توازن ما بين مساعدة صاحبك المصاب وبين انك تاخد بالك من نفسك.
المحتويــات
ازاي تساعد شخص بيتعرض لنوبة هلع؟
نوبات الهلع كتير بتيجي فجأة وبدون أي تحذير أو إشارة، حاول تعرف ايه هي نوبات الهلع عشان تقدر تتعرف عليها لما تصيب شخص وحاول تاخد فكرة ازاي تساعد صاحبك لما يتعرضلها.
دي شوية نصايح عشان تعرف ازاي تتعامل مع شخص بيعاني من نوبات الهلع:
حافظ على هدوئك
كلم صاحبك بهدوء وحاول تفضل محايد في ردود فعلك، لأن الشخص المصاب عادة مبياخدش باله لأنه دلوقتي في وسط خناقة مع أعراض نوبة الهلع دا غير ضغطها النفسي عليه، فا متاخدش تصرفاته معاك بشكل شخصي لأنه مش على طبيعته.
اسال ازاي تقدر تساعده؟
احسن طريقة هو انك تسال صاحبك لو اتعرض لنوبة هلع قبل كده ولو عنده اساله: ممكن اساعدك ازاي؟ معظم الناس المصابة بنوبات الذعر أو القلق بيفضلوا طرق المسايرة ( بمعنى إنك تجاريهم وتفضل معاهم لحد ما النوبة تعدي).
خليك عارف إن الاحداث اللي بتحصل خلال نوبة الهلع صاحبك مش هيفتكر منها حاجة لما يفوق، عشان كده برضو لازم تسأله ممكن تعمله ايه لو اتعرض لنوبة هلع وانت معاه.
الجيش قالك اتصرف!
انك تكون جمب شخص مذعور وبيتعرض لنوبة هلع اكيد صوتك هيساعده لكن حاول تتجنب تكرار كلمة “متقلقش”، احنا عارفين نيتك خير بس كلمتك دي مش هتساعد دلوقتي، ركز على افعالك زي إنك تجرب الاقتراحات دي:
- فكر صاحبك بأنه ياخد نفس بطئ وعميق او حتي اتنفس معاه بنفس الرتم، ودا هيساعد اكتر لأنه هيقلد تصرفاتك.
- اساله يعد من 100 عكسيا وببطء.
- حاول تخليه يسترخي سواء يقعد أو يفرد جسمه على كنبه أو سرير أو حتى على الأرض.
- اساله على خمس حاجات يقدر يشوفها أو يسسمعها أو يشمها أو حاسس بيها.
- طمنه أنها نوبة هلع وخلال دقايق هتعدي.
- لو الأعراض بقت أسوأ ونوبة الهلع معدتش خلال٢٠-٣٠ دقيقة اتصل بالإسعاف رقمهم ١٢٣.
أكد على سماعك لمحنتهم
الناس اللي بيجيلها نوبة هلع عادةً ما بيكون صعب عليهم يشاركوا تجربتهم، لأنهم بيحسوا بأنهم بيتم تقييمهم والحكم عليهم أو بيحسوا ان كلامهم مش متاخد بجدية! حاول تتعاطف معاهم وتكون مدرك إنك مش طول الوقت هتبقى فاهم هما بيمروا بإيه، خلال نوبات الهلع لو كله عادي وتمام بالنسبالك، للأسف هو خطر حقيقي بالنسبة لصاحبك عشان كده تجنب كلام زي “ما تهدا؟” أو “مالك؟”.
ازاي تحافظ على صحتك النفسية وانت بتساعد شخص عنده هلع؟
مساعدة شخص مصاب باضطراب نوبات الهلع شيء نبيل أكيد لكنه متعب، اتأكد انك تاخد بالك من نفسك، دي اقتراحاتنا عشان تحافظ على سلامتك انت النفسية:
- حط حدود واضحة بخصوص قد ايه هتقدر تساعد صاحبك، مثلا فهمه إنك هتكون موجود وقت ما يحتاجك أو لو عايز يتكلم معاك، ما عدا لو كان عندك محاضرة أو شغل مش هتقدر تكون متاح.
- حافظ على كل انشطتك الاجتماعية واللي بتحب تعمله، خصوصا لو مساعدة صاحبك بدأ يحبطك نفسيا.
- لو دعمك لصاحبك بدأ يسببلك خساير عاطفية، لازم وقتها تكلم شخص بتثق فيه عن اللي انت حاسه.
- خد في اعتبارك تكلم أخصائي نفسي لو حسيت بإرهاق شديد.
في الاخر احنا بنشكرك على مبادرتك للمساعدة سواء لصاحبك أو لشخص غريب،صدقني اللي زيك مش كتير واحنا أكيد فخورين بيك! حاول تبعت المقالة لصحابك وقرايبك عشان تساعد أشخاص أكتر.
مقالات ذات صلة:
إزاي تقنع مريض نفسي إنه يتعالج؟ أسباب الرفض والتعامل مع كل سبب
