8 نصايح عشان توقف التفكير الزيادة قبل النوم

بتمر علينا ليالي بنحس فيها ان مخنا عبارة عن راديو شغال ومش بيسكت، يا بتراجع مواقف في يومك يا اما بتقلب على نفسك المواجع يا بتفكر كنت هتتصرف ازاي لو الموقف اتكرر تاني ودا مش هيحصل وانت بتضيع وقتك ولازم تنام وراك شغل بكرة!

ممكن الأفكار الزيادة تكون علامة على مشكلة نفسية زي القلق بس مش هننكر ان التفكير الزيادة قبل النوم وارد وبتحصلنا كلنا من وقت للتاني، ودول 8 نصايح لو عايز تطرد الأفكار الزيادة عشان تعرف تنام كويس:

1- شتت مخك بكلمات وأرقام ملهاش معنى

بداية أي نوم وغفوة هو ان المخ يكون في حالة هدوء، ومتكونش افكارك صوتها عالي لدرجة تدوشك وتقلقك وتخليك تركز عليها وتسيب النوم ممكن تشتت مخك بكلمات أو خيالات ملهاش أهمية او معنى كبير والاهم انها متكونش مرتبط بحاجات تخوفك، ممكن تقول في عقلك وتكرر كلمات زي “هدوء، شجر، راحة، سما” مع تكرار الكلمات دي في مخك خيالك هيركز عليها ومش هيبقى في فرصة تانية تفكر في اللي يقلقك بس حاول تكرر كل كلمة 3-4 مرات ورا بعض في كل مرة.

2- حاول تفضل صاحي!

“التفكير في النوم والرغبة فيه هو وصفة الارق، ودا بداية التفكير المتناقض يعني لو اديت نفسك تعليمات انك تفضل صاحي عشان تذاكر ولا تقرا كتاب مخك تلقائي  هيحس بالنعاس ويكون عايز ينام، القلق من انك مش عارف تنام هيخليك تفضل صاحي فترة أطول.

3- قوم من على السرير

لو مرت 20 دقيقة وانت في السرير مش عارف تنام ولا تسترخي يبقى الاحسن تقوم من عالسرير من غير تبص في شاشة أي جهاز، وجرب روح اوضة تانية واكتب في نوتة الأفكار والحاجات اللي شاغلاك وطمن نفسك انك بكرة هتفكر فيهم وهتلاقي حل لو هما مشاكل أو مخاوف، وارجع تاني لسريرك وركز على تنفسك وحاول تسترخي وانت بتفكر في مكان هادي بتحبه وتخيل نفسك قاعد او نام فيه.

4- اكتب كل افكارك

بدل ما تقوم في نص الليل عشان تكتب اللي مضايقك قضي كل يوم من خمس لعشر دقائق عشان تفضي كل افكارك والمواقف والمخاوف والمشاكل في ورقة، وخلي دي تكون في نص اليوم عشان بالليل ميبقاش في حاجة جديدة بتشغل بالك، حتى لو المخاوف اللي كتبتها افتراضية زي “هعمل ايه لو سيبت الشغل في يوم؟” ولما تتكرر نفس المخاوف او الأفكار يبقى تحط خطة لحل المشكلة دي.

5- تمارين التنفس

التنفس العميق … بيشتغل كتقنية تشتيت قوية، خاصة إذا اقترنت بالعد، خلي الزفير وقته اكبر من الشهيق وخد نفس على 3 عدات وطلعه في اربع عدات، وكل مرة زود عدد لحد ما توصل لتنفس عميق ل8 عدات وتحس انك بتسترخي ومركز على نفسك، وبعده ارجع تاني للتنفس الطبيعي بتاعك، ولو رجعت تاني تتشت ارجع تاني ركز على تنفسك.

6- متضغطش على نفسك

متضغطش على نفسك في التغلب على الارق والافكار، لأن دا بيزود الأرق لا اراديا، واحد من الاساليب عشان تتغلب على الروتين السلبي للأرق هو انك تراقبه وتتقبل الصعوبات اللي بتواجها خلال الأرق وتطبق النصايح المذكورة دي.

7- غير جو واتشمس

انك تتمشي او تتعرض للشمس في النهار بيساعد ساعتك البيولوجية انها تسهل عليك نومك في الليل، تعرضك لضوء طبيعي بالنهار زي الشمس بيسهل على مخك وجسمك انه يسترخي في الليل لما تحب تنام.

8- لو كل ده فشل؟

اعمل عادة قبل النوم وعود نفسك ان الشئ دا بتعمله لما تيجي تنام عشان جسمك يستعد للنوم زي انك تسمع مزيكا هادية لخمس او عشر دقايق، أو انك تقرا صفحتين من كتاب أو رواية.

اترك تعليق