ازاي أفتح مواضيع؟ 10 حاجات تقدر تفتح بيها مواضيع

انا كشخص انطوائي بيبقى عندى صعوبة جدا في اني افتح مواضيع بالذات لو مع شخص اول مرة اشوفه وغريب عني، ومبعرفش اخد على الناس بسرعة بالذات في الشغل، دايما بستنى الى قدامى هو الى ينكشني ويكلمني ويفتح معايا مواضيع ويصاحبني، وبعدها خلاص كل الحواجز بتتكسر وبنبقى اصحاب.

بس لازم تعرف ان انا بتكلم عن شخص غريب عننا يعني ناس جديدة اول مرة تشوفها سواء في الشغل او الجامعة او الاعمال التطوعية او في الجيم، مش الناس الغريبة الى ممكن تعرضك للخطر.

ايه الى يمنعك تفتح مواضيع

فيه عقبات بتمنعنا نفتح مواضيع مع اى حد اول مرة اشوفه:

• موبايلك الى بتفضل قدامه بالساعات من غير زهق، فبتحس انك متوحد معاه بالذات بقى لو شخص انطوائي، بتلاقي راحتك في البعد عن الناس، وتتكلم من ورا شاشة وتبقى جريء اكتر.
• الشعور بالخجل والتوتر وان ممكن الشخص الى قدامك ميستلطفكش وتحس انك احرجت نفسك.
• الخوف من انك متقدرش تندمج مع فئة معينة من الناس زي شلة اصحاب مقفولين على بعض، وانك بمجرد ما تديهم ضهرك هيتكلموا عليك ويقولوا انك قد ايه دمك تقيل.
• ممكن تطلب مساعدة من صاحبك ان هو الى يعرفك علي الناس الجديدة، وبكده هيسهل عليك الطريق ويبقى الموضوع مريح بالنسبة لك اكتر.

اتغلب ازاى على العقبات دي

كل مشكلة وليها حل والى تخاف وتتكسف تكلمه النهارده بكره يبقى صاحبك، وتقدر بمحادثة صغيرة في طريق سفر او حد اتعرفت عليه في الجيم او النادى او في الشغل تتعلم حاجة جديدة، تروح مكان جديد، تشتغل في مكان احسن، بس تتغلب على العقبات ازاى:

• بدل ما تقعد تفكر في حاجات تخوفك وتوترك ممكن تفتكر موقف مريح نفسيا بالنسبة لك عشان تهدي نفسياً وتتغلب على خوفك وتبدأ الكلام زي انك تتخيل انك قاعد على البحر في الساحل.
• اتمرن على انك تتكلم مع الناس الى انت تعرفهم وواخد عليهم، وكل ما تقوي علاقاتك الاجتماعية كل ما ثقتك في نفسك هتزيد.
• كلم نفسك وقولها ان كل حاجة هتبقى كويسة وهتتحسن، وان مش معنى انك لسه مش عارف تتكلم مع الناس وتتغلب على خوفك، يبقى كده انت شخص فاشل.

استعد قبل ما تتكلم

الانطباع الاول بيدوم طول العمر عشان كده لو حد اول مرة تكلمه لازم تسيب انطباع كويس عنك، وتهتم بلغة الجسد الى ناس كتير ممكن تشوفها بسيطة، لكن هي في الحقيقة مؤثرة في استمرار المحادثة:

• متفردش ضهرك اوي لورا وانت بتتكلم عشان ده هيدي انطباع انك مغرور وتنك، خلى ضهرك مفرود عادى وفي وضع طبيعي متأفورش.
• لازم تبص في عين الى بتكلمه عشان تحسسه انك مهتم وبتسمعه، لو اتكلمت وانت مش بتبصله ده بيديله انطباع انك مش مهتم وبتحاول تقفل في الكلام.
• متقعدش تحرك راسك كتير الى هو موافق على اى كلمه بتتقال، هيبان انك مش مركز في الكلام وبتحرك راسك على الفاضي وخلاص.
• متحركش ايدك كتير وانت بتتكلم، ولا تحط ايدك في وسطك وانت بتتكلم، ده هيدي انطباع انك شخص عدواني.
• متصدرش الوش الخشب وخليك مبتسم وبشوش.
• متبصش في الساعة او الموبايل كتير ده اكبر دليل على انك متضايق ومش عايز تكمل كلام وهتموت وتمشي.

ازاى تفتح مواضيع

لازم تتغلب على خوفك وتستعد نفسيا قبل الكلام وتاخد ثقة في نفسك، وفيه كذا طريقة تقدر تفتح بيها مواضيع، وتسهل بيها حياتك وتكسب بيها الي قدامك:

المجاملات

اكتر حاجه تقدر تقرب بيها من اى حد انك تجامله، والطريقة دى بالذات تنفع للبنات زى انك تجاملى زميلتك وتقوليلها حلو اوى الشوز الى انتى لابساها دي، وتبدأ تسألها بقى جايباها منين وتستمر المحادثة.

التريندات

ممكن تتكلم عن حدث حصل او تريند الناس كلها بتتكلم عنه زى مسلسل بيتعرض كل الناس متابعاه وبتتكلم عنه او ماتش كان شغال امبارح بليل زى لما تقوله شفت الماتش بتاع امبارح والجون بتاع صلاح كان جامد ازاى، عينيه هتلمع وهيتجاوب معاك وتكملوا كلام سوا.

خش في الموضوع على طول

الطريقة دى ممكن متنفعش مع الشخص الانطوائي اوى بسبب خجله وتفكيره في الكلام كتير قبل ما يقوله، لكن ممكن تبدأ بابتسامة لطيفة وتصبح عليه وتعرف نفسك، وتنفع مع الشخص الاجتماعي اكتر انه يقدم نفسه بشكل صريح بالذات لو اشتغلت في مكان جديد، وعايز تتعرف على زمايلك، وتندمج وسطهم.

اطلب مساعدة

ممكن تطلب مساعدة من زمايلك في الشغل او تطلب خدمة معينة من حد يساعدك فيها، لان ناس كتير بتحب تساعد غيرها وخدومة وبتحب تحس ان ليها قيمة زي أنك تطلب من زميلك في الشغل انه يساعدك في كتابة التقارير المطلوبة منك هتتعلم منه والكلام بينكم هيبقى رايح جاي.

 تجربة مريت بيها

تقدر تسأل زميلك عن تجربة مر بيها او تطلب منه نصيحة في موقف معين انتوا الاتنين اتحطيتوا فيه، زي شغل في مكان جديد وعايز تعرف نظام الشغل في المكان ده والمرتبات والناس هناك كويسة ولا لأ فتقدر تسأله وهيقولك على تجربته في المكان ده أو الاجراءات والورق الى مطلوب منك في مكان حكومي عشان ترخص عربية.

طلب رأي

تقدر تسأل زميلك عن رأيه في مطعم او كافيه راحه ورأيه في الخدمة والأكل يستاهل ولا بلاش منه او براند لبس جربه هل مريح والاسعار اخبارها ايه أو تسأله عن رأيه في كورس أخده اذا كان يستاهل ومفيد.

أخبار الجو ايه

اعتقد مفيش اسهل من انك تسأل زميلك عن الجو النهاردة وتقوله ان الدنيا الايام دى برد اوى ده احنا كلنا في البيت عيانين، هيرد عليك والمحادثة هتستمر كمان.

إلعبوا سوا

تقدر بسهولة تقترح علي زمايلك انكم تلعبوا سوا ده بيعمل روح حلوة في المكان، والناس هتتجاوب معاك زي لعبة اونو او اي لعبة سريعة على ابليكشن على الموبايل.

المناسبات الاجتماعية

الافراح والتجمعات اكتر حاجة ممكن تساعدك تتعرف على الناس الجديدة لو انتوا الاتنين مثلا تعرفوا العريس او العروسة، وتسأله لو هم الاتنين قرايب او اصحاب واتعرفوا على بعض ازاى.

هوايات

ممكن تسأله عن هواياته الى بيحب يمارسها في وقت فراغه زي الرسم او القراءة او رياضة بيمارسها.

استمرار المحادثة

سهل اوى انك تفتح مجال للكلام لكن صعب تفضل تخلى المحادثة مستمرة من غير ما تسكتوا وتسمع صوت صرصور الحقل بينكم:

• اسمع اكتر ما تتكلم عشان تدي فرصة للى قدامك يعبر عن نفسه، ومتقاطعوش سيبه ياخد راحته في الكلام، واسمعه للآخر، وركز معاه متحركش راسك وخلاص، ده بيدي انطباع انك مش سامعه وانك مش مقدره ولا بتحترمه.
• دور دايما على الحاجات المشتركة بينك وبين الى قدامك زى فيلم انتوا الاتنين شوفتوه او مغنى بتحبوا انتوا الاتنين تسمعوه.
• ابعد عن الاسئلة الى اجابتها ايوة او لا عشان بعدها الكلام هيخلص، وأسأل دايما الاسئلة الى اجابتها مفتوحة وتخليه يتكلم زي لما تسأله عن المشاكل الى بيواجهها في شغله، ولو تعرض عليه المساعدة كمان ده هيقوي العلاقة بينكم اكتر.
• اختار دايما الوقت المناسب عشان تتكلم، يعني متختارش وقت يكون الشخص الى قدامك شكله متضايق او تعبان ومش في المود انه يحكي ويتكلم، وانت تضغط عليه وتضايقه انه يتكلم بالعافية.

بيحصل ايه لو اترفضت

وارد جدا ان الشخص الى تكلمه ميحبكش ويبقى شايفك دمك تقيل ومش مستلطفك، زي لما تترفض في شغل كنت مقدم عليه او البنت الى معجبه بيك ترفضك.

بتحس ان كبريائك اتجرح، وانك معزول ومش عارف تندمج مع الى حواليك، وده بيخليك تفقد ثقتك في نفسك:

• بتبقى مش مصدق نفسك في الاول انك اترفضت، وتبدأ تفكر في السبب وتدور فين المشكلة، وتحس انك متستاهلش كده من الشخص ده.
• بتبدأ تستوعب رفض الشخص ليك، وانه مكنش سوء تفاهم، فتدخل في نوبة غضب ان الشخص ده مش مقدر زعلك، وتبدأ بقى تاخد الرفض بشكل شخصي، متغلطش الغلطة دي وحاول تهدي نفسك، ومتخليش غضبك ياخدك لتصرفات هتندم عليها بعدين.
• بتدخل بقى مرحلة التفاوض وبتعتقد انك اترفضت بسبب ان الطرف التاني فهمك غلط، وانك لو اتكلمت معاه هيتفهمك، لكن كده انت بتضايقه وتخنقه، هو مش مجبر يبررلك سبب رفضه، واديله مساحته وحاول تتقبل اختياره وقراره.
• هتبدأ تكتئب وتحس باحباط واحراج، وتفقد ثقتك بنفسك، حاول تهرب من المشاعر دي بخروجة حلوة مع أصحابك او شاور دافي كده يهدي اعصابك، وحاول تحتوي مشاعرك.
• آخر مرحلة بقى بتبدأ تتقبل الواقع وان عادى لما تترفض لانك مش مناسب للشخص ده، مينفعش تبقوا اصحاب لانكم مش شبه بعض.

ازاى تتعامل مع الرفض ده

لازم هتتعرض في مرة للرفض ولو ده محصلش فأنت كده حابس نفسك في الـ comfort zone بتاعتك وخايف تطلع منها، وعمرك ما هتتعلم، هو فيه حد بيتعلم السباحة من غير ما يعوم؟.

كل ما تقبلت الرفض الى حصلك ده اسرع كل ما كان احسن عشان توفر على نفسك الاحساس بالاحباط والاكتئاب، وحاول تشغل نفسك بهواية بتحبها أو روح الجيم بدل ما تهلك نفسك في التفكير الكتير.

تقدر تتعلم من الرفض ده وتحسن من شخصيتك وتبقى تجربة تتعلم منها، لما تترفض في انترفيو شغل لازم تراجع نفسك وتطور من مهاراتك عشان لما تعمل انترفيو تاني متترفضش أو تفكر في الى عملته خلى البنت الى بتحبها تسيبك وتمشي.

“معرفة الناس كنوز” عشان كده متبطلش تحاول تتعرف على الناس، وتتغلب على خوفك وخجلك، واديهم من وقتك واهتمامك واسمعهم واتكلم، وخليك لطيف ومبتسم، وعادى متضايقش من الرفض دي حاجه طبيعية هترفض وتترفض، المهم تتعلم من التجربة، وتطور شخصيتك ومهاراتك وتطلع لقدام.