إزاي تقنع مريض نفسي إنه يتعالج؟ أسباب الرفض والتعامل مع كل سبب
عندك حد بتحبه إنت شايف إنه محتاج علاج نفسي وبتحاول تعرف تساعده إزاي؟
أولاً أنا محتاجك تعرف إن اللي زيك مش كتير. وإنك عامل مُهم وأساسي في حياة الشخص ده سواء قرر يتعالج أو لأ. لأنك بتمثل “مجموعة الدعم” بتاعته ودي حاجة أساسية جدًا في تحسن الحالة النفسية بتاعت أي بني آدم سواء مريض أو لأ.
شكرًا ليك..
وأنا عارف إن الموضوع مش سهل.
وهحاول هنا أساعدك .. عشان نساعده.
….
مبدئيًا كدة عشان تقنع حد إنه يروح يتعالج، محتاج تحدد الأول ليه هو رافض العـلاج النفسي سواء كان سبب الرفض ده مُعلن أو مش مُعلن، أو سواء سبب تقدر تواجهه بيه أو ماتقدرش.. مش مهم.
لكن بمعرفة السبب هاتقدر تساعده وتوجهُه ناحية العلاج النفسي بطريقة سليمة وبدون ضغط عشان تتلافي الرفض.
وهنا أنا هاتكلم عن أهم 4 أسباب وإزاي نتعامل معاهم.
المحتويــات
الـ Stigma أو وصمة العار للعلاج النفسي
للأسف، لسا فيه نظرة مش كويسة للعلاج النفسي عند كتير من الناس. كتير مننا بنخاف يتحكم علينا إننا ضعفاء أو حتى مجانين لإننا اعترفنا إننا محتاجين مُساعدة خارجية.
والمُشكلة مش بس إن الناس ممكن تبصلنا البصة دي، المُشكلة الحقيقية هي إننا بنبص البصة دي لنفسنا! وبناءًا عليه: لجوئنا للعلاج النفسي أو طلب المساعدة بشكل عام إحنا بنترجمه على إنه ضعف أو فقدان للسيطرة على حياتنا.
هنا لازم نسأل سؤال مُهم
هل إحنا أصلا (أو المفروض نكون) مسيطرين على حياتنا؟
الإجابة هي لأ الحقيقة.. إحنا ماعندناش سيطرة على مُعظم الحاجات اللي بتحصل في حياتنا.. ممكن تشوف دي حاجة تخوف لو عندك Anxiety زي حالاتي..
لكن الحقيقة إن دي حاجة تريحنا نفسيًا عشان إحنا مش مطلوب مننا نتحكم في حياتنا.. إحنا كل اللي مطلوب مننا إننا نحاول نتحكم في تعاملنا (نفسيًا وجسديًا مادياً) مع الحاجات اللي بتحصلنا دي وبس 🤷
ساعات بيحصل حاجات إحنا مش عارفين وماتعلمناش نتعامل معاها نفسيًا .. وهنا بييجي دور الطب النفسي.. إنه يعلمنا إزاي نتعامل مع الحاجات اللي مش عارفين نتعامل معاها.
زيها زي أي مهارة أو حرفة أو لغة جديدة بنتعلمها عشان ننجح في حياتنا.
التعامل مع الـ Stigma
دكتور على قرقر أخصائي الطب النفسي بيأكد إن إقناع المريض يروح لطبيب/معالج نفسي وأسباب رفض المريض هما الحقيقة وجهين لعملة واحدة.
المريض بيرفض العلاج عشان الاقتراح بيكون مفهوم منه أنه طعن مباشر لحكمته أو قدرته على التحكم في حياته وقدرته على اتخاذ القرار لوحده.
وده طبيعي لأنه فعلاً محتاج مُساعدة،
لكن عشان تنجنب المقاومة.. هيكون مفيد قوي أن النصيحة توجه للشخص باعتبارها قلق عليه من التغيرات الجديدة دي واللي هو ماتدربش عليها ومحتاج يتعلم يتعامل معاها إزاي..
ممكن برضه لفت انتباه الشخص لأمثلة ناجحة محيطة أن أمكن..
توفير معلومات من مصادر موثوقة كمان ممكن يساعد.. كتير من الناس الحقيقة بتثق في كلام الانترنت زي اليوتيوب! دي حاجة ممكن نستغلها.
حاجات ماينفعش نقولها للمريض النفسي:
- “تصرفاتك بقت مش طبيعية” “انت ما بقتش طبيعي” لازم تشوف دكتـور نفسي
- “تفتكر ينفع تستمر اكتر من كده في ‘حالتك دي’؟” لازم تشوف دكتـور نفسي
- “محدش بقى طايق يتعامل معاك” لازم تشوف دكتـور نفسي
- “انت بقيت بتشع طاقة سلبية” لازم تشوف دكتـور نفسي
- “الناس كلها بقت بتعلق على تصرفاتك” لازم تشوف دكتـور نفسي
حاجات نقولها للمريض النفسي:
- “صحتك النفسية مهمة زي صحتك الجسدية تماما”
- “طلب المساعدة من متخصصين علامة قوة مش ضعف”
- “الأمر بيساعد ناس كتير تعرف تتعامل مع مشاعرها وأفكارها”
- “مشاعرك وافكارك حقيقة ولا تستحق الخجل.. فيه ناس متخصصين في مساعدتك على التعامل المرن معاها”
- “مهن المساعدة النفسية قائمة على السرية والتفهم والتراحم وعدم إصدار الأحكام.. مفيش داعي للخوف أو الخجل”
تكلفة العلاج النفسي
كتير مننا بيشوف تكلفة العلاج النفسي عالية.
ولو عايز رأيي إحنا بنشوف إنه غالي عشان مش شايفينه مُهم. لكن هو مش غالي ولا حاجة. أو بمعنى أصح مش أغلى من العلاج العضوي.. ومش أغلى من حاجات تانية بنصرف فيها فلوس في حياتنا العادية.
إنت عارف وأنا عارف إن غالي ورخيص دي حاجة نسبية قدام القيمة اللي بناخدها من الحاجة اللي بندفع فيها فلوس.
طيب تكلفة العلاج النفسي كام؟
خلينا نقول إن أسعار فيزيتا الدكتور النفسي ممكن تتراوح في حدود 500 جنيه للجلسة الواحدة. تمام؟
طب تعالى نحسبها بالورقة والقلم؟
أنا رحت لدكتور السنان من سنتين عشان أعمل ضرسين (بين فيزيتا وتنضيف وحشو وتركيب Crown ومُتابعة) صرفت حوالي 6 الآف جنيه للضرسين (وده سعر دكتور متوسط، ولا منطقة شعبية ولا منطقة راقية، في النص كدة).
المدة المتوسطة لعلاج الأمراض النفسية من 15 لـ 20 جلسة حسب منظمة الصحة النفسية الأمريكية*.. يعني حسب متوسط سعر الجلسة ممكن تصرف من 7500 لـ 10000 جنيه على العلاج النفسي على مدار ست شهور مثلا (مش مرة واحدة يعني).
خلي بالك إحنا لسة ماجبناش سيرة أمراض قوية لا قدر الله، ولا سيرة تكاليف الآشعة، أو التحاليل اللي في منها الغالي والرخيص، أو أدوية منها الغالي ومنها اللي مش موجود!
كل دي متوسطات أسعار تشرحلك إن التكلفة مش بعيدة.
لكن صدقني هي مجرد أولويات..
لو العلاج النفسي وتأثيره الإيجابي على حياة الشخص مفهوم .. هايبقى قرار الاستثمار فيه (أو في نفسنا بمعنى أصح) أسهل.
لو شايف العلاج النفسي غاليـ ماتروحش تشتري تليفون ب20 و30 ألف جنيه.. ماشي؟ 😆
طيب لو مافيش فلوس فعلاً (ومش موضوع أولويات)؟
لو أسعار العلاج النفسي مُكلفة بالنسبالك .. في مستشفيات ومراكز بتوفرها الدولة عشان تساعدك في رحلتك .. وأسعارها رمزية جدًا. أحيانًا مش هاتبقى أحسن حاجة.. بس أحسن من مافيش.. وأحيانًا تانية في دكاترة كويسين جدًا وشُطار وكُبار شغالين في الأماكن دي على فكرة.. وكتير من الدكاترة عندهم العيادة اللي في مكان غالي وراقي والعيادة اللي في مكان شعبي وفيزيتيتها أرخص وهكذا..
عندك مثلاً:
- مركز الطب النفسي في الدمرداش أيام الأحد، الإثنين، الأربعاء
- مركز الطب النفسي في مستشفى عين شمس
- العيادات الخارجية في مستشفى العباسية
- مستشفى الخانكة للصحة النفسية
- مستشفى حلوان للصحة النفسية
كل دول أسعارهم رمزية.. وهتلاقي نفس الكلام ده في المحافظات برضه.. ابعتلنا وهنساعد بأي معلومات عندنا. ماشي؟
مُعارضة الأهل للعلاج النفسي
نظريًا أنا ماينفعش أعمم وأقول إن الأهل سبب من الأسباب اللي بتمنع أولادها إنها تروح تتعالج.. إنما بناءًا على اللي بشوفه في بزرميط، فالحقيقة كتير من الناس اللي في سن الدراسة ولسة ماعندهمش استقلالية أو دخل خاص ومحتاجين مساعدة .. مش عارفين يوصلولها بسبب أهلهم!!
الأهل ممكن يبقوا معارضين للعلاج النفسي لأيًا كان السبب من الأسباب اللي بتكلم عليها في المقال ده. سواء عشان الفضيحة أم جلاجل أو عشان الفلوس أو عشان مش مؤمنين إن العلاج النفسي حقيقي، أو غيرها من الأسباب..
إزاي نتعامل مع الأهل الرافضين للعلاج النفسي
- أولا محتاج تثقفهم: شاركهم معلومات عن الصحة النفسية والعلاج النفسي. إشمعنا هم بيبعتولنا حاجات قد كدة على جروب واتساب العيلة؟ إنت كمان ابعتلهم حاجات تعلمهم أهمية الصحة النفسية.
- التواصل المفتوح: أتكلم بصراحة ووضوح، وبهدوء ومن غير نرفزة -على قد ماتقدر 🙄 – مع أهلك عن مشاعرك وليه بتعتقد أن العلاج هايكون مفيد ليك.
- دور على دعم: لما الأهل بيبقوا رافضين، ممكن جدًا تدور على حد كبير ثقة يا حبذا من العيلة يكون في سنهم يساعدك تقنعهم.
- ركز مع نفسك: في نفس الوقت اللي بتحاول فيه تقنع أهلك، خلي بالك من نفسك، عن طريق إنك تعمل حاجات صحية زي الرياضة والهوايات اللي بتحبها.
- إديهم وقت: أحيانًا الأهل بيحتاجوا وقت علشان يتقبلوا فكرة العلاج. خليك صبور وكمّل تلميح.. والأهم كمل حياتك عادي.
عدم فهم العلاج النفسي
سرية المعلومات
والإحراج من إن حد يتكلم عن مشاكل ممكن تكون شخصية شويتين.. ومن ضمن الأفكار الغلط اللي الناس ممكن تبقى واحداها عن العلاج إن المعالج هايوصي عليهم أفعال معينة أو إنه يفضح أسرارهم. والحقيقة إن قانون المهنة وأخلاقيتها كمان بتمنعه من ده وخليني أديك نص القانون بالظبط:
تنص المادة 310 من قانون العقوبات رقم 58 لسنة 1937: أن كل من كان من الأطباء أو الجراحين أو الصيادلة أو غيرهم مودعا إليه بمقتضى صناعته أو وظيفته سر خصوصى اؤتمن عليه فأفشاه فى غير الأحوال الذى يلزمه القانون فيها بتبليغ ذلك يعاقب بالحبس..
تجارب سابقة مش لطيفة
في حد (أو يعرف حد) ممكن يكون عنده تجربة وحشة مع معالج نفسي زمان. وده ممكن يخليه يتأخر عن إنه يجرب تاني. هنا لازم نفهم إن المريض مع إن عنده مشكلة فهو أصلا عمل ده قبل كدة (بس تجربته مكانتش لطيفة) أو عالأقل فكر في الموضوع (لما سمع عن ترجبه حد تاني مش لطيفة) ودي نقطة كويسة ممكن نشتغل عليها.
- محتاج تختار وقت ومكان مناسبين وماتفتحش الموضوع في وقت في ضغط نفسي.
- استخدم عبارات تبدأ بـ “أنا”: بمعنى ركز على اهتمامك بيه وبصحته النفسية. زي مثلا “أنا رأيي نشوف دكتور يساعدنا في القصة دي” بدل “إنت محتاج تروح لدكتور عشان تلاقي حد يساعدك في القصة دي.”
- اتكلم عن العلاج بشكل إيجابي، بغض النظر عن المُعالج، العلاج نفسه بيعمل نتيجة حتى لو بسيطة.. ويا سلام بقى لو المعالج شاطر، ودي حاجة هنلاقيها بسهولة لما ندور.
- خد ترشيحات من حد اتعالج أو بيتعالج مع دكتور أو أخصائي ومبسوط معاهم.
- ساعده في البحث عن معالجين واعرض عليه تروح معه أول مرة
- افتكر إن القرار في النهاية بيديه فخليك صبور واسمعله كويس وصدق تجربته وإحساسه
- مثال للتوضيح على الطريقة اللي تتكلم بيها (حط التاتش بتاعك يعني)
“بُص أنا فاهم إنك ممكن تكون عندك حساسية من الموضوع ده، بس خلينا نتكلم بجد عن الفوايد اللي ممكن إحتماااال تحصل لو رجعت لدكتور نفسي تاني. تفتكر لو هو حد شاطر هايساعدك تتعامل مع {كذا كذا كذا}. ماتقلقش من إنك ممكن تلاقي نفس المشكلة تاني، لأنه في ناس كتير بتجرب معالجين كتير قبل ما تلاقي حد يناسبها، وده طبيعي جدًا.. أنا جاهز أساعدك وأكون معاك في الخطوة دي، ولو عايزني آجي معاك أشجعك، يلا بينا.. ونعمل {حاجة بتحبها } بعدها.. شوف فاضي إمتى وعايز إمتى وقولي.”
العلاج النفسي ده بيشتغل إزاي؟
كتير من الناس مش عارفين يعني إيه علاج نفسي، أو بيشتغل إزاي، أو إيه الفرق بينه وبين الفضفضة وهكذا.. لو عايز تعرف أكتر عن العلاج النفسي شوف المقال ده:
وأخيرًا في حاجات لازم تخلي بالك منها وانت بتتكلم مع حد عشان تقنعه بالعلاج النفسي:
- اختار الوقت الصح: متتكلمش معاه وهو زعلان أو متوتر. اختار وقت هادي عشان تتكلموا بالراحة وبصراحة.
- ركز على الحب والاهتمام: خليه يعرف إنك بتقلق عليه وعلى صحته النفسية وعايزة أحسن وأسعد. وركز كويس إن كلامك مايبقاش فيه إتهام أو لوم ليه.
- اسمع كويس: سيب له المجال عشان يتكلم عن اللي مضايقه من غير ما تحكم عليه. أيد مشاعره وقدمله دعم معنوي.
- ساعده بشكل عملي: لما يبقى مُستعد، ساعده يسأل عن معالجين نفسيين في المنطقة أو يحجز معاد أو دور معاه على الإنترنت. اعرض عليه تروح معاه لو ده هايشجعه.
- اصبر عليه: التغيير بيخد وقت. متضغطش عليه. طمنه إنك هاتكون جنبه لما يكون جاهز.
المريض الغير عاقل بنتعامل معاه إزاي؟
بخصوص المريض النفسي (أو العقلي) اللي في حالة عدم وعي وإدراك بنعمل إيه؟.. هنا إحنا بنكون معنيين بمعيار آخر الحقيقة غير رغبة المريض الواعية من عدمها وهو معيار الأذى والخطر على نفسه أو الآخرين.. ده الشيء الأهم في تحديد مساحة التدخل القسري من عدمها.. لو الأعراض المستجدة بدأت تبقى خطر على صاحبها أو المحيطين بيه يبقى لازم تدخل حتى لو هو مش راغب.. سواء بالزن بقى أو بالإقناع او بالإلزام.
دُمتم سالمين مُعافين
وشكرًا إنك سند لغيرك
