لو خدت قرار الطلاق إزاي ترجع بني آدم سعيد بعد التجربة دي؟

الطلاق عُبارة عن دوامة من المشاعر الصعبة اللي بتشفط صاحبها، إحنا عارفين ده كويس! فلو انت بتمر بالتجربة دي دلوقتي هتكون شايف إن الدنيا سودا حبتين نحب نطمنك إنها مسألة وقت. مهما كان الطلاق بتاعك عنيف، برضه مسألة وقت! انت بس اللي عليك تركز في شوية النصايح اللي هنقولهالك في المقال ده:

اتعامل بذكاء مع مشاعرك بعد الطلاق

أهم حاجة تعملها إنك تتقبل مشاعرك عشان تعرف تتحكم فيها وتتعامل معاها، الهروب مش هيفيدك بحاجة غير إنه هيطوّل مدة التعافي بعد الطلاق، والأبحاث بتثبتلك إن مدى تَقبُّلك لمشاعرك بعد قرار الطلاق بيخليك تتقدم بشكل إيجابي وبيخلصك من أثر المشاعر السلبية فيما بعد.

اشترك في مجموعات الدعم النفسي

“اخرج، اخرج يا عاشور من صورتك، اللي حابسك خلاص راح”، دي قاعدة مهمة جدًا بعد الطلاق إنك تخرج من وحدتك وتشارك مشكلتك مع ناس تفهمك (لأ مانقصدش اللمبي لأ) لأنها عدت بنفس مشكلتك ويمكن أصعب ووقتها المسائل مش هتبقى بنفس الصعوبة في عينك لأنك هتسمع تجارب كتير مؤلمة،وفي الوقت ده، المُعالج النفسي المسؤل عن المجموعة هيساعدك تتعامل مع الأفكار والمشاعر اللي لو زادت عن حدها ممكن تدخلك في مشاعر صعبة زي القلق.

حِبّ نفسك الأول

خليك في الفترة دي ماشي بالمثل اللي قالهولنا زمان:”من حبنا حبناه وصار متاعنا متاعه ومن كرهنا كرهناه يحرم علينا اجتماعه”، يعني المقياس في الأول والآخر لأي حاجة بعد الطلاق هي حُبك لنفسك ووجود كُل حاجة مُسخّرة لحُبك، لإنك الداعم الأول والأخير لنفسك في الفترة دي ومساعدتك لنفسك هي اللي هتشكل شخصيتك في الارتباط الجاي وهتحافظ على صحتك النفسية والعقلية.

حدد أهداف جديدة

في الوقت ده انت خلاص بقيت لوحدك وبالتالي بقى عندك مساحة أكبر للتفكير في كل حاجة تخصك، هل الشغل ده مناسب ليك ولا كنت مكمل فيه عشان تصرف على البيت؟، إيه الهواية اللي كنت مواظب عليها وسيبتها بعد الجواز؟، وهكذا. ابتدي بإنك تعمل جدول بكل حاجة ممكن تستمتع لو عملتها زي:

  • تلعب موسيقى أو الرسم أو أي هواية سهلة
  • تتمشي وتجري على الكورنيش
  • تطلع أجازة لوحدك أو مع صحابك
  • تزور المعارض والمتاحف الفنية حتى لو مابتحبهاش التجديد مطلوب
  • تشترك في الـGYM 
  • تحضر حفلات اندرجراوند
  • تروح ساقية الصاوي
  • تسمع أحمد العسيلي
  • تشترك في الأنشطة الاجتماعية
  • تتعلم التجديف والتخييم وتسلق الجبال 

اتعلم ازاي تعيش كأحد الأبوين لوحدك

لو كان الطلاق هو القرار النهائي في حالة وجود أطفال، لازم تتأقلم على إنك تقوم بمسؤلية أصعب من الأول لأنك بقيت لوحدك، ولإن الطلاق بيأثر بالسلب على أطفالك بيكون عليك مسؤليتين زيادة،

الأولى: إنك متقطعش التواصل مع الطرف التاني مهما كانت العلاقات متدهورة عشان بس صحة الأولاد

الثانية: إنك متتكلمش أبدًا بصورة وحشة عن الطرف التاني قدام الأولاد

لو الأولاد كُبار ممكن تشاركهم المشكلة وتخليهم يختاروا عايزين يعيشوا مع مين، لكن لو الأولاد صغيرين فهما محتاجين للأمان بعد التجربة الصعبة دي وإنهم يحسوا إنهم محبوبين عند أهلهم من غير ضغط، فمينفعش أبدًا تدخلوا أطفالكم في مشكلة كبيرة زي إنهم يختاروا طرف واحد يعيشوا معاه لأن قلوبهم الصغيرة مش هتستوعب ألم الفكرة دي !

اتوقع الخساير المُحتملة

طبيعي إن تجربة صعبة زي الطلاق هتخلي عندك أزمة في مُعاملاتك وبالتالي هتخسر علاقات كتير، وأول علاقات هتروح في مهب الريح الناس اللي كانت ضد طلاقك من الأول. في اللحظة دي ارفع شعار “مع السلامة للي عايز يمشي والمركب اللي تودي مترجعشي”،واعمل صداقات جديدة مع ناس تحترم مشاعرك وتقدر حُزنك من غير ما تصدر أحكام عليك ولا تكون عائق في راحتك.

ادي لنفسك فرصة تفتح بابك

بعد الطلاق بيكون تقيل عليك جدًا تبدأ في علاقة جديدة، وبرضو مينفعش تاخد نفسك عالحامي وتروح تتجوز تاني بعد وقت قصير من غير ما تتعافى، افتح باب لنفسك تتنفس منه وانك مترفضش تتعرف على حد جديد ولو حتى عالنت في الأول وخُد وقتك المرة دي جدًا واحكم عالأمور صح بس المهم إنك تدي نفسك فرصة ترتبط تاني لأن حياتك موقفتش على علاقة اتقطعت.

اشتري لنفسك حاجة كل وقت والتاني

أكيد وقت الطلاق كنت مضطر تدفع فلوس كتير للاجراءات والورق ونسيت نفسك خالص،فخلاص دلع نفسك شوية دلوقتي وافتكر إنك مش هيجيلك هدايا تاني “لإن مبقاش عندك حنون ” فخليك انت شريك وصاحب نفسك لحد ما تلاقي اللي يهتم بيك تاني.

انك تبطل تنفخ فـ إربة مقطوعة

ممكن تحس إن الطلاق ده أوحش حاجة حصلتلك، كل اللي محتاجه إنك تهدى وتعيد تقييم الأمور، ولما تركز هتلاقي عيوب في شريكك كانت تعباك وانت مكنتش حاسس، وانك اجتهدت في العلاقة كتير ومجهودك متقدرش. الحُزن شعور صحي بس لو طوّل بيجيب أمراض وبيوقّف الحياة،عشان كدة متحطش نفسك في ضغط،  وفوق لنفسك وحياتك وأولادك واشغل تفكيرك بنفسك وبكل حاجة ممكن تخليك فرحان.

نصحيتنا ليك إنك لو بتعاني بشكل كبير بعد الطلاق، انك تطلب الدعم النفسي من طبيب مختص، افتكر إنك عديت بتجربة مش سهلة، ومش معنى إنك فشلت في علاقة إنك فاشل في حياتك عمومًا، بالعكس انسحابك من علاقة مرهقة هو قمة النجاح ولسة قدامك فُرص وتجارب في الحياة تثبت فيها نجاحك،المهم صحتك وإنك تسخر كب مجهودك إنك ترجع انسان سعيد من تاني.

اترك تعليق