مش عارف تنام من التفكير الزيادة قبل النوم؟

224

التفكير الزيادة له طرق ممكن تحاول توقفه وتهدي بيها عقلك، كل حاجة بنحاول منفكرش فيها خلال يومنا بتتسحب لافكارنا بالليل بطريقة سخيفة، وفي الأغلب بتكون مخاوفنا هي السبب ومبنقدرش ننام وبنفكر في كل شئ صغير، الناس اللي بتعاني من التوتر والقلق والاكتئاب والأرق إن الافكار المتسارعة والاحكام السريعة هي اللي بتخلي النوم صعب اكتر من ان يكون عندهم الم جسدي!

علاقة الأرق بالتفكير الزيادة 

الأرق والتفكير الزيادة وجهين لعملة واحدة، عشان كده المصابين بالارق بيحاولوا يبعدوا افكارهم ويتخلصوا من التفكير قبل النوم، ودا في البداية حل منطقي لكن بيسبب مشاكل أكتر ما بيحلها، مش شرط تتعامل مع افكارك ومخاوفك قبل النوم؛ لأن من الارهاق تفكيرك مبيكونش منطقي وهتكبر المواضيع وتديلها اكبر من حجمها، ولكن الحل هيكون في انك تقعد تفكر وتتامل مشاكلك ومخاوفك في الصبح أو في نص اليوم، وتلاقي حلول وتسأل ناس تساعدك في مشاكلك، وفي استراتيجيات كتير بتساعد على التخلص من الأرق في دورات العلاج المعرفي السلوكي (CBT).

أساس الاستراتيجيات دي إنها بتخلينا نقدر نبدل الأفكار اللي بتخلينا صاحيين بالليل بأفكار تانية أهم .. وليها الأولوية، جرب مثلًا:

  • تقلل الوقت المستغرق للنوم (وقت بداية النوم)
  • بدل الافكار السوداوية بافكار تانية.
  • زيادة جودة النوم.

استراتيجيات للتمكن من النوم:

عد من 1- 100

من الحلول الطفولية اللي بنستخدمها من واحنا صغيرين عشان نوقف تفكير ونقلل من سرعة عقلنا، علم النفس كمان بيقول ان تكرارك لكلمة معينة 3-4 مرات هيخلي صعب جدا ان يجيلك افكار تانية جديدة.

شتت نفسك

من أحسن الطرق هي التخيل! انك تحط نفسك في صور وفي سيناريوهات لذيذة زي انك تتخيل انك سافرت مكان بتحبه، أو بتعمل أكلة بتحبها، أو تتخيل انك مع الناس اللي بتحبهم ومقضيين وقت لطيف مع بعض، وممكن بدل ما تتخيل حاجات محصلتش تفتكر صور وسيناريوهات بتحبها في ذكرياتك، والدراسات اثبتت إن استخدام الصور الذهنية بيزود جودة النوم وبيخليه نوم أعمق، بمجرد ما بتختار السيناريو الايجابي لازم هدفك يكون انك تغرق فيه جامد ويكون مريح ويخليك تسترخي لدرجة تنسى اي افكار تانية سوداوية ترهقك وتجيبلك أرق.

وحاول تتجنب سيناريوهات بتزود ضربات القلب وبتستفز خلايات العصبية زي انك تتخيل نفسك قاعد بتشجع ماتش المنتخب مثلا! كون السيناريو مريح وايجابي هيساعدك لما تنام ان نومك يكون عميق واحلام عقلك الباطن كمان متكونش مزعجة.

فكر بإيجابية

الأفكار السلبية غالبًا ما بتكون مستفزة للعقل، والتركيز عليها بيخلي الأرق اسوأ، دراسة طبية طلبت من ناس يركزوا على ندمهم قبل النوم، ولقوا انهم خدوا وقت أطول على ما راحوا في النوم عن الناس اللي فكرت في حاجات ايجابية قبل ما يناموا ورركزوا عليها فساعدتهم على النوم، ان الشخص يتجاوز الصدمات والمواقف مش سهل ابدا خصوصا لو كان مصاب بالاكتئاب والقلق وفي الحالات دي لازم متابعة مع دكتور مختص.

تقبل أفكارك

المفتاح لكل فكرة سلبية أو فكرة غير مرحب بيها، انك متحاربهاش ولكن تقبلها انك تفكر في الفكرة أو الموقف وتشوف هل الفكرة دي بتهدد حياتك؟ لا، طب زعلان ليه؟ هل الفكرة دي هتخلي حياتك تقف؟ لا، طب مخنوق ليه؟ حاول تتقبل أفكارك كل الناس بتمر بمشاكل ومواقف تكاد تكون فوق طاقتهم ولكن في النهاية كل حاجة بتعدي، اقتناعك بانك قادر تتحكم في افكارك هيكون بداية طردك للافكار السلبية واستقبال الافكار الأكثر ايجابية.

بمجرد ما توجه تفكيرك وتركيزك على الاستراتيجيات دي قبل النوم تلقائيا عقلك هيبقى ابطء ويهدى وسلبية افكارك بالتدريج هتتحول لافكار ايجابية.

اترك تعليق