الصحة النفسية

ليه أحياناً ردود أفعالنا بتبقى أغرب مما نتخيل؟

ليه-ردود-أفعالنا-غريبة

الدماغ بيتكون من 3 أجزاء زى ما اتكلمنا في المقال بتاع الـ Lizard brain و ازاى و ليه بنكسل. فيها جزء متصل مباشرة بالنخاع الشوكي، و جزء بيغطي الجزء ده، و اخر جزء هو الفصين، من غير ما ندخل في أسماء علمية ملعبكة بالانجليزى.

الحيوانات الزاحفة زى السحالي والثعابين مبيبقاش عندها من التلاتة دول غير بس الجزء اللى مرتبط بالنخاع الشوكى الطبقتين التانيين مش موجودين، و خصوصا الفصين اللى هما مسئولين عن التفكير بشكل عام!

ده معناه ان الجزء ده من المخ هو المسئول عن النزعة الحيوانية و ميكانيكيات الدفاع اللى بنعملها من غير ما نحس!

فا لما نتصرف تصرف غريب ده بيبقى ناتج من رد فعل الجزء ده من دماغنا من غير ما يبقى لينا كنترول عليه، الجزء ده اللى اسمه Lizard brain او ال Rectilian brain اللى بردو قولنا عليه المرة اللى فاتت.

ال Rectilian brain او ال Lizard brain ده  ليه 3 ميكانيكيات دفاعية بيستخدمها لما يكون متعرض لضغط أو لمواقف جديدة مش مألوفة بالنسباله، اللى هما:

1- الfreeze:

أو “التجمد” و رد فعلك يبقى زى رد فعل الحيطة لما تشتمها مثلا!

بالظبط، مافيش اى رد فعل اصلا ?

و ده المخ بيستخدمه علشان يدى لنفسه فرصه يلاقى رد فعل مناسب للموقف.

ايه بقى الحاجات اللى بنعملها لما يكون مخنا بيستخدم ال freeze:

  • ممكن فجأة تلاقى دماغك فضى، بقى صحراء، مش لاقى اى حاجة تقولها او تعملها ردا على اللى حصل!
  • فى ناس بيوصل معاها الموضوع للإغماء، الجسم بيعمل ريستارت لنفسه كده علشان يعرف يعالج الـ overload اللى حصل عليه!

2- ال flight:

او “الهروب” و هو انك تبعد تماما عن الحاجة اللى سببت لك التوتر ده، و بتبعد ازاى:

ممكن تلاقى نفسك بتغير الموضوع، او بتضحك و تهزر و تنسى انه محرج، او تمشى من المكان بحجة دخول الحمام او جالك تليفون، ال body language بتاعتك بتتغير وتلاقيك أخذت وضعية دفاعية كدة و ربعت ايدك وضميت رجلك او حطيت رجل على رجل.

3- ال fight:

ده الغباء بقى ?

اى موقف موتر للأعصاب تلاقى نفسك بتتخانق أو تتصرف بعدائية، فتلاقى النزعة التنافسية بتزيد، الصوت بيعلى و الخلق يضيق و التعامل مع الناس يبقى فيه نوع من الوقاحة، ال body language بتتغير و تلاقى نفسك قاعد ساند ظهرك و دقنك مرفوعة دليل على الثقة فى النفس، بس انت بتبقى بتدافع عن نفسك في حالة ضعف مش ثقة بالنفس نهائى!

الحقيقة دى مش تصرفات غريبة، و انت بتقرا اكيد لقيت نفسك فى حاجة من التلاتة دول، لان دى كلها ميكانيكيات دفاعية للمخ مش اضطراب فى السلوك مثلا!

عن الكاتب

إنجي عادل

"ماذا سيكون العالم، اذا تحدثنا بقوة، لأناسِ تنصت بوعىِ، فى مكانِ مهيأ لهذا الغرض تحديداً".