كيف اعرف ان زوجي مكتئب؟
لما جوزك يجيله اكتئاب، دا هيأثرعلي كل حياتك. علشان الاكتئاب بيجيب مشاعر اليأس والحزن، وعلشان يخف منه لازم تبقي جمبه.
كمان لازم يبقي عندك فكرة عن علامات الاكتئاب علشان تساعدي جوزك ونفسك و تخلصوا منه.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
تعرفي ازاي ان جوزك عنده اكتئاب؟
الست أكتر واحدة بتحس بجوزها، وبتلاحظ تصرفاته أكتر من أي حد تاني. وممكن تلاحظ أعراض الاكتئاب قبل ما هو نفسه ياخد باله. وعمومًا بردوا بيكون في اختلافات في الأعراض ما بين كل واحد والتاني. لكن الأعراض المشهورة زي النوم الوحش، وتغير والوزن والشهية. والأعراض المهمة التانية هي:
اللامبالاة
اللي عندهم اكتئاب مش بيبقوا مهتمين بأي حاجة، ومفيش حاجة بتبسطهم لا خروج ولا أصحاب ولاحتي بيبقوا مهتمين بشريك حياتهم. حتي الجنس مش بيبسطم وبيميلوا أنهم يقعدوا لوحدهم، وبيبعدوا عن أي أماكن فيها ناس.
تقلب المزاج
الاكتئاب ممكن يسبب تغيرات كتيرة في الحالة المزاجية بالرغم أن مفيش حاجة حصلت تستاهل .التغيرات دي ممكن تكون زي احساس بالفراغ والبعد عن اللي بنحبهم والغضب وردود الأفعال القوية. كمان مينفعش تحكم على التغير دا في يوم ولا حتي أسبوع لازم يبقي التغيير دا أديله كتير ويكون دا أصلًا مش طبعه.
القلق
علي الرغم أن القلق والاكتئاب حالتين منفصلين، بس غالبا اللي عنده اكتئاب بيعاني منهم. هتلاقي جوزك متوتر، وبينفعل بسرعة، وبيعرق كتير، وقلبه بيدق بسرعة، وتركيزه بيقل ومبيقدرش ياخد قرار. كمان ممكن يميل للإدمان والقاعدة علي النت لفترات طويلة.
مشاكل النوم
الاكتئاب بيأثر علي النوم عمومًا، ممكن يخلي جوزك مينمش ودا بيزود عنده، أو ممكن يخليه ينام كتير ويفقده طاقته. علشان كدا لازم تلاحظي طريقة نوم جوزك ولو فيها أي تغيير.
تغيرات الشهية
الاكتئاب بيغير طريقة الأكل بشكل كبير، وهيخلي جوزك يإما يبطل أكل خالص أو يبقي عايز ياكل علطول. كمان بيميل للأكل التقيل، ودا بيخليه يفقد نشاطه ومش قادر يقوم بأي مجهود، وبمرور الوقت بيحصله مشاكل في الهضم والمعدة ملهاش تفسير. وعلشان كدا لازم تلاحظي كمية أكل جوزك ووقته كمان. لأن مشاكل الأكل دي لو فضلت كتير، هتخلي جوزك فالأخر ياما يبقي رفيع خالص ياما يبقي تخين جدًا.
أفكار ومحاولات الانتحار
مش كل اللي عندهم اكتئاب بيفكروا في الانتحار، بس لو دا حصل فدا يبقي كارثه كبيرة. هما عايزين ينهوا حزنهم وفشلهم في الحياة بأي طريقة حتى لو كانت الانتحار. فبمجرد ماتلاقي جوزك بيفكر في الأفكار دي أو حتي بيجيب سيرة الموت، لازم متستهونيش وتطلبي الدكتور بسرعة.
إزاي أساعد جوزي لو عنده اكتئاب؟
اسمعيه
ممكن مثلًا تديلوا فرصة للكلام. اسمعيه من غير ماتردي، وسبيه يحكي عن وحدته ومشاعره، وكمان اتعاملي مع كلامه بجد حتي لو كلامه ملوش دعوه بالواقع.
اعرفي أكتر عن الاكتئاب
اقري كتير عن الاكتئاب، لو انتي عارفة علاماته ممكن تساعدي جوزك بشكل كبير. متخلهوش لوحده في الأوقات دي قوليلوا أن طرق العالج كتيره بس من غير ضغط، ولو رفض شوفي الناس اللي حواليه اللي بيستريح في الكلام معاهم دا هيخليه يخف بسرعة.
اطلبي المساعدة
لو حسيتي بالخطر في أي وقت أو جوزك بيفكر في الانتحار، متترديش في طلب المساعدة .
اهتمي بنفسك
خلي عندك حدود لمشاعرك نحيته، علشان مشاعر اليأس والاكتئاب متأثرش عليكي وأنتي بتساعديه. أه أنتي بتساعديه وبتهتمي بكل تفاصيله، بس لازم تهتمي بنفسك بردوا. خدي بالك اهتمامك بنفسك وبشغلك هيساعد جوزك بشكل كبير، وهيخليه ان يركز في شغله وحياته هو كمان. هيساعدك كمان يتخلص من الأفكار السلبية.
اعترفوا بالاكتئاب
قولوا أن فيه اكتئاب واتكلموا عنه متكسفوش، واتكلموا مع بعض عن إزاي الاكتئاب مأثر عليكم وشوفوا حل. كمان حاولوا تنسوه بطريقة مختلفة، يعني مثلًا اخرجوا، سافروا، اعملوا حاجات جديدة واتعملوا معاه كأنه مجاش أصلًا.
عيشوا لحظتكم الحلوة
فكروا بعض باللحظات والذكريات اللي كانت بينكم قبل الجواز، وإزاي كنتوا بتتمنوا وجودكم معا بعض. كمان حسنوا من حالتكم المادية علشان تقدروا تعيشوا حياة حلوة مع بعض.
