هل الاكتئاب عادي؟
الاحساس بالحزن وتقلب المزاج من وقت للتاني حاجة طبيعية. أما الاكتئاب فحالة الدماغ فيها مش بينظم المزاج بطريقة طبيعية، ومش بس بيسبب الحزن، لأ بيسبب مشاعر وحشة كتيرة وبيأثر على الحياة كلها.
علشان كدا الاكتئاب مش عادي، دا مرض زي باقي الأمراض بيحتاج الاهتمام والعلاج علشان ميتطورش والحالة تسوء أكتر. كمان الاكتئاب معقد وملوش سبب محدد، لكن في حاجات كتيرة ممكن تسبب ظهوره. زي الوراثة والتجارب الوحشة، والتوتر الكتير، وحتى الموسم يعني مثلُا، الاكتئاب الموسمي بيحصل غالبًا في الشتاء. حتى الأدوية ممكن بعضها يسبب أعراض الاكتئاب.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
ما مدى شيوع الاكتئاب؟
الاكتئاب بييجي لأي حد، بغض النظر عن العمر أو العرق أو الحالة الاجتماعية والاقتصادية أو الجنس. كمان دلوقتي مبقاش الكلام عنه مرفوض زي الأول. الناس الوعي بتاعها بيزيد، أنك تواجهه مش معناه أنك شخص ضعيف أو غلطان أو مجنون. لأ دا مرض ومحتاج علاج.
الاكتئاب من أكتر حالات الصحة العقلية شيوعًا ، لأنه بيصيب أكتر من 264 مليون شخص في العالم. كل سنة، وحوالي 6.7% من الكبار عندهم اكتئاب، يعني 1 من كل 15 واحد من حواليك ممكن يكون عنده اكتئاب. كمان خطر الإصابة بالاكتئاب مدى الحياة حوالي 16.6٪ من الناس اللي بيجلها.
إزاي تعالج الاكتئاب؟
مينفعش نسيب الاكتئاب من غير علاج، لأنه هيزيد ويفضل علطول. كمان ممكن يسبب أعراض جسدية زي الصداع والتعب والغثيان والألم المزمن.
غالبًا بيكون العلاج بمضادات الاكتئاب والعلاج النفسي. على الرغم من أن العلاجات دي فعالة لناس كتيرة، لكن مع ناس ممكن متشتغلش كويس أو متشتغلش خالص. يعني مثلُا مضادات الاكتئاب مبتخففش الأعراض لحوالي 1/3 اللي بياخدوها. علشان كدا لو المريض جرب اتنين أو أكتر من مضادات الاكتئاب وحس بتأثير ضعيف أوي، فممكن يكون عنده اكتئاب مقاوم للعلاج. وفي ناس مبتقدرش تستحمل الآثار الجانبية لمضادات الاكتئاب، علشان كدا بتفكر في علاج اسمه التحفيز المغناطيسي عبر الجمجمة TMS.
العلاج دا فعال لحوالي 62.5% من الناس اللي مش بيرتاحوا مع مضادات الاكتئاب. الطريقة دي بتستخدم نبضات مغناطيسية بسيطة علشان تحفز الأعصاب في أماكن معينة من الدماغ والمسؤولة عن تنظيم المزاج والعواطف، وكمان بيساعد الدماغ على أنها تعمل الوظائف دي. علاج TMS مش جراحي خالص، ودورة العلاج بتستمر من 6 إلى 9 أسابيع. عامة الدكتور هو اللي هيقدر يحدد العلاج المناسب.
افتكر أنك مش لوحدك، لأ الاكتئاب بييجي لناس كتيرة وبيلاقوا علاجهم. لكن ممكن العلاج يختلف من حد للتاني، على حسب الحالة والاستجابة وحاجات تانية بيعرفها الدكتور خلال فترة العلاج وعلى أساس كدا ممكن يغير من دواء لغيره.
أعراض الاكتئاب
الاكتئاب مرض شائع وخطير بيأثر على المشاعر وطريقة التفكير والتصرفات. وبيتسبب في مشاعر الحزن واليأس وفقد الاهتمام بكل شيء، وبيسبب مشاكل في البيت والشغل أو المدرسة. كمان أعراضه بتختلف من خفيفة لمتوسطة أو شديدة على حسب نوعه، والأعراض المشهوة هي:
- شعور بالحزن
- فقدان الاهتمام أو الاستمتاع بالأنشطة
- خسارة الوزن من غير دايت أو زيادة الوزن
- صعوبة النوم أو نوم لفترات طويلة
- فقدان الطاقة أو زيادة التعب
- زيادة النشاط من غير قصد يعني مثلًا المريض ميقدرش يقعد من غير ما يتحرك كتير، أو سريع، أو بيشد أيده كتير. كمان ممكن يسبب بطء في الحركة أو الكلام. لكن لازم التغييرات دي تكون واضحة وملحوظة لأي حد.
- احساس بعدم القيمة أو بالذنب
- صعوبة في التفكير أو التركيز أو أخد القرارات
- أفكار عن الموت أو الانتحار
الأعراض لازم تستمر أسبوعين على الأقل. كمان لازم نستبعد وجود أي أمراض تانية. لأن في أمراض ممكن تسبب أعراض الاكتئاب زي؛ مشاكل الغدة الدرقية أو ورم المخ أو نقص الفيتامينات.
حاجات بتزود فرصة الاكتئاب
- الكيمياء الحيوية: يعني الاختلافات في بعض المواد الكيميائية في الدماغ ممكن يسبب ظهور أعراض الاكتئاب.
- علم الوراثة: الاكتئاب ممكن ينتشرفي العائلات. مثلًا، لو كان واحد من اتنين تؤام مصاب بالاكتئاب، فالتاني عنده فرصة 70٪ للإصابة بالاكتئاب بردوا في أي وقت في حياته.
- الشخصية: الناس اللي مش بيقدروا نفسهم، واللي بيتوتروا بسهولة، والمتشائمين هما أكتر عرضة للاكتئاب.
- العوامل البيئية: يعني مثلًا التعرض المستمر للعنف أو الإهمال أو سوء المعاملة أو الفقر بيخلي ناس يجلها اكتئاب.
